ប្រធានគណបក្សសង្គ្រោះជាតិ លោក សម រង្ស៊ី ប្រកាសថា លោកនឹងចេញទៅក្រៅប្រទេស នៅថ្ងៃចន្ទនេះ ប្រមាណជា២សប្តាហ៍ ដើម្បីជំរុញឲ្យសហគមន៍អន្តរជាតិ កុំទទួលស្គាល់រាជរដ្ឋាភិបាលកម្ពុជា និងរឹតបន្តឹងជំនួយមកកម្ពុជា។
លោកសម រង្ស៊ី ប្រកាសបែបនេះ កាលពីថ្ងៃអាទិត្យ នៅក្នុងសមាជមហាជន នៅទីលានប្រជាធិបតេយ្យ ជាការបង្ហាញជំហររបស់គណបក្ស និងកិច្ចការការទូតផ្សេងៗ ដែលលោក កំពុងតែធ្វើ។
លោក សម រង្ស៊ី មានប្រសាសន៍ថា លោក នឹងទៅប្រទេសមួយ
ចំនួន រួមមានសហរដ្ឋអាមេរិក អង្គការសហប្រជាជាតិ ទីក្រុងប្រ៊ុស្សែល ប្រទេសបែលហ្ស៊ិក អង់គ្លេស អាល្លឺម៉ង់ និងប្រទេសបារាំង ដើម្បីធ្វើចលនាកុំឲ្យអន្តរជាតិ ទទួលស្គាល់រាជរដ្ឋាភិបាលកម្ពុជា ដែលលោកចាត់ទុកថា «ខុសច្បាប់»។លោកបន្តថា លោក ក៏នឹងធ្វើចលនាជាមួយធនាគារពិភពលោក ធនាគារអភិវឌ្ឍន៍អាស៊ី មូលនិធិរូបិយវត្ថុអន្តរជាតិ ដើម្បីឲ្យស្ថាប័នអន្តរជាតិទាំងនោះ ដាក់លក្ខខណ្ឌ សម្រាប់ជំនួយមកកម្ពុជា។ លោកបញ្ជាក់ថា លោកនឹងជំរុញឲ្យស្ថាប័នទាំងនោះ ដាក់គំនាបឲ្យរាជរដ្ឋាភិបាលបច្ចុប្បន្ន ប្រគល់អំណាចជូនប្រជាពលរដ្ឋវិញ។
លោកនាយករដ្ឋមន្ត្រី ហ៊ុន សែន បានបង្កើតរាជរដ្ឋាភិបាលភ្លាមៗ បន្ទាប់ពីរដ្ឋសភា បានបើកសម័យប្រជុំលើកដំបូង និងបោះឆ្នោតផ្តល់សេចក្តីទុកចិត្ត។ តែគណបក្សសង្គ្រោះជាតិ បានថ្កោលទោស ដោយចាត់ទុកជាសភាឯកបក្ស និងប្រកាសមិនទទួលស្គាល់រាជរដ្ឋាភិបាល។ តែលោក ហ៊ុន សែន បានចាត់ទុកការប្រជុំសភា និងការបង្កើតរាជរដ្ឋាភិបាលនីតិកាលទី៥នេះ គឺស្របនឹងរដ្ឋធម្មនុញ្ញ។
សមាជមហាជនគណបក្សសង្គ្រោះជាតិ នៅថ្ងៃទី០៦ខែតុលានេះ បានសម្រេចនូវការទាមទារចំនួន ១០ចំណុច ដោយរកយុត្តិធម៌ជូនម្ចាស់ឆ្នោត និងទាមទារឲ្យមានការផ្លាស់ប្តូរតាមរយៈកែទម្រង់នូវគោលនយោបាយ និងស្ថាប័នជាតិសំខាន់ៗ ដើម្បីធានាការពារផលប្រយោជន៍ជាតិ និងផលប្រយោជន៍ប្រជាពលរដ្ឋ។ ចំណុចសំខាន់ៗចំនួន១០នោះ រួមមានទាមទារឲ្យបង្កើតគណៈកម្មការស្វែងរកការពិតជូនម្ចាស់ឆ្នោត និងផ្លាស់ប្តូរសមាសភាពរបស់គណៈកម្មាធិការជាតិរៀបចំការបោះឆ្នោត ទាមទារឲ្យមានតុល្យភាពអំណាចសភា និងទទួលស្គាល់គណបក្សប្រឆាំងដោយបង្កើតរាជរដ្ឋាភិបាលស្រមោល ទាមទារឲ្យគណបក្សសង្គ្រោះជាតិទទួលបានអាជ្ញាប័ណ្ណវិទ្យុ ទូរទស្សន៍ បញ្ឈប់ការផ្តល់ដីសម្បទានសេដ្ឋកិច្ច បញ្ឈប់ការកាប់បំផ្លាញព្រៃឈើ និងទាមទារឲ្យអនុវត្តច្បាប់អន្តោប្រវេសន៍ឲ្យមានប្រសិទ្ធភាពជាដើម។
គណបក្សសង្គ្រោះជាតិ គ្រោងនឹងធ្វើមហាបាតុកម្មលើកទី៣ នៅថ្ងៃទី២៣ខែតុលា ខាងមុខនេះ ដោយប្រមូលស្នាមដៃរបស់ប្រជាពលរដ្ឋជាម្ចាស់ឆ្នោតប្រមាណ៣លានស្នាម មេដៃ ធ្វើជាញត្តិដាក់ជូនអង្គការសហប្រជាជាតិ និងប្
