ខេត្តរតនគិរី ៖ តាមការធ្លាយចេញពីមន្ត្រីអាជ្ញាធរនិងសមត្ថកិច្ចក្នុងស្រុកអូរយ៉ាដាវបានឲ្យដឹងថាបច្ចុប្បន្នឈ្មួញមួយចំនួនដែលមានខ្នងបង្អែករឹងមាំជាពិសេសមានទំនាក់ទំនងល្អជាមួយសមត្ថកិច្ចពុករលួយប្រចាំច្រកទ្វារអន្តរជាតិអូរយ៉ាដាវនៅតែធ្វើសកម្មភាពដឹកជញ្ជូនឈើចេញទៅស្រុកយួនយ៉ាងរលូន។ ជាងនេះទៅទៀតបទល្មើសដឹកជញ្ជូនឈើចេញតាមច្រករបៀងភូមិភិនិងច្រករបៀងភ្នំក្រហមក៏នៅតែកើតមានឡើងយ៉ាងច្រើនព្រោះមន្ត្រីជំនាញនិងសមត្ថកិច្ចពាក់ព័ន្ធមិនចាត់វិធានការបង្ក្រាបបទល្មើសឡើយហើយពួកគេគិតតែពីរឿងផលប្រយោជន៍ដោយគ្មានញញើតអ្វីទាំងអស់។
ប្រភពបានឲ្យដឹងទៀតថាក្រៅពីបទល្មើសនាំឈើចេញនៅតែបន្តកើតឡើងយ៉ាងអនាធិបតេយ្យនៅច្រកទ្វារអន្តរជាតិអូរយ៉ាដាវគឺករណីឈ្មួញនាំចូលទំនិញគេចពន្ធនិងទំនិញបង់ពន្ធមិនគ្រប់ក៏កំពុងកើតមានយ៉ាងពេញបន្ទុកដែរព្រោះមានការឃុប ឃិតពីសមត្ថកិច្ចពុករលួយដោយមានការបែងចែកផលប្រយោជន៍ជាប្រចាំ។
លោក ឡុង រុក្ខា អតីតមេនគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ ដែលត្រូវរបូតចេញពីតំណែងនោះ ត្រូវបានគេដឹងថាជាប់ពាក់ព័ន្ធនឹងអំពើពុករលួយបើកដៃឲ្យឈ្មួញដឹកជញ្ជូនឈើទៅស្រុកវៀតណាមនិងបើកដៃឲ្យឈ្មួញនាំទំនិញគេចពន្ធចូលស្រុកខ្មែរយ៉ាងពេញបន្ទុកនិងការស៊ីដាច់លុយកូនចៅ។ ជាងនេះទៅទៀតលោក ឡុង រុក្ខា បានឃុបឃិតឲ្យជនជាតិវៀត ណាម ចូលមកជីករ៉ែមាសខុសច្បាប់តាមតំបន់ព្រំដែន ហើយស្នាក់នៅក្នុងផ្ទះរបស់ខ្លួនទៀតផង ដែលរឿងអាស្រូវបែបនេះជាមូលហេតុធ្វើឲ្យមានការរិះគន់យ៉ាងខ្លាំង។
ហើយការតែងតាំងនេះបានធ្វើឲមន្រ្តីអាជ្ញាធរនិងសមត្ថកិច្ចក្នុងខេត្តរតនគិរីមានការចាប់អារម្មណ៏យ៉ាងខ្លាំងហើយអ្វីដែលគេហ៊ានវាយតំលៃទុកជាមុននោះគឺអ្នកថ្មីអាចត្រាប់តាមអ្នកចាស់ក្នុងការស្វែងរកផលប្រយោជន៏ធ្វើមានធ្វើបានផ្ទាល់ខ្លួន ដូចេ្នះហើយទើបគេរង់ចាំតាមដានដោយយកចិត្តទុកដាក់នៅវិធានការរបស់លោក អ៊ី ចំរើនក្នុងនាមជាមេនគរបាលអន្តោប្រវេសន៏ច្រកទ្ចារអន្តរជាតិអូរយ៉ាដាវថ្មីនេះ។
តែដោយឡែកគួរអោយកត់សំគាល់នោះក្រោយពីប្រកាសផ្ទេរភារកិច្ចលោកវរសេនីយ៍ឯក ឡុង រុក្ខា នាយប៉ុស្តិ៍អន្តោប្រវេសន៍ច្រកអូរយ៉ាដាវទៅកាន់នាយការិយាល័យនិតិកម្មនៃនាយកដ្ឋានអន្តោប្រវេសន៍ក្រសួងមហាផ្ទៃរួចមកបានតែពីរថ្ងៃប៉ុណ្ណោះត្រូវអតីតកូនចៅក្រោមឱវាទរបស់លោក វរៈសេនីយ៏ឯក ឡុង រុក្ខា អតីតនាយប៉ុស្តិ៍ អន្តោប្រវេសន៏ ច្រកទ្វាអន្តរជាតិ អូរយ៉ាដាវ បានដុតធូបបញ្ចេរអង្ករឲទៅឲឆ្ងាយ។
