បន្ទាប់ពីប្រជាពលរដ្ឋបានឃើញមានគ្រឿងចក្រជាច្រើនកំពុងធ្វើសកម្មភាពដឹកជញ្ជូនអាចម៏ដី ទៅចាក់លុបអូរធម្មជាតិមួយកន្លែងនៅតាមបណ្តោយផ្លូវជាតិលេខ៧៦ ឆ្ពោះទៅទឹកជ្រោះប៊ូស្រា ដែលមានទីតាំងនៅភូមិចំការតែ សង្កាត់ស្ពានមានជ័យ ក្រុងសែនមនោរម្យ មកនោះគឺប្រជាពលរដ្ឋមូលដ្ឋានបានបង្ហាញពីការភ្ញាក់ផ្អើលយ៉ាងខ្លាំង ហើយរិះគន់អាជ្ញាធរមូលដ្ឋានថាមិនចាត់វិធានការទប់ស្កាត់តាមផ្លូវច្បាប់ឡើយមកដល់ពេលនេះ។
ប្រជាពលរដ្ឋក្រុងសែនមនោរម្យ បានបញ្ជាក់ថាអូរខាងលើស្ថិតនៅកណ្តាលក្រុងសែនមនោរម្យតែម្តង បើសិនជាគេចាក់ដីពេញរួចធ្វើការអភិវឌ្ឍនោះ ប្រាកដជាបានចំណេញប្រាក់ច្រើនណាស់ ដូច្នេះហើយបានជាមានសកម្មភាពដឹកដីចាក់បំពេញចំណុចទីតាំងខាងលើដើម្បីផលប្រយោជន៍ណាមួយ ។ ប្រភពដដែលបានបញ្ជាក់ថា អាជ្ញាធរពាក់ព័ន្ធនៅខេត្តមណ្ឌលគិរី គប្បីចាត់វិធានការផ្លូវច្បាប់ដើម្បីដោះស្រាយបញ្ហាខាងលើប្រកបដោយដោយប្រសិទ្ធភាព ដើម្បីការពារផលប្រយោជន៍ប្រជាពលរដ្ឋមូលដ្ឋាន និងផលប្រយោជន៍សាធារណៈ។
សូមបញ្ជាក់ថាអូរធម្មជាតិនិងត្រពាំងទឹកដែលកំពុងរងការរំលោភបំពានពីឈ្មួញនោះ ត្រូវបានប្រជាពលរដ្ឋអះអាងថា មានទឹកហូរមិនដាច់ទោះរដូវប្រាំង ក៏ពួកគាត់អាចអាស្រ័យផលពីទឹកអូរនោះបានដែរ ដោយពួកគាត់អាចដងទឹកនោះសម្រាប់ស្រោចស្រពដំណាំ និងនេសាទត្រីម្តងម្កាលផងដែរ ។ ប្រភពដដែលបានបញ្ជាក់ថា បើការអភិវឌ្ឍគ្មានការសិក្សាពីផលប៉ះពាល់ ឬសួរយោបល់ប្រជាពលរដ្ឋមូលដ្ឋាន នោះការអភិវឌ្ឍនោះក៏គ្មានន័យដែរ ហើយថាឈ្មួញនិងមន្ត្រីពុករលួយនៅតែអាចធ្វើអ្វីៗតាមអំពើចិត្ត។
ជុំវិញបញ្ហាខាងលើនេះ ប្រជាពលរដ្ឋក្រុងសែនមនោរម្យ ខេត្តមណ្ឌលគិរី បានរិះគន់អាជ្ញាធរខេត្តថា ដើរក្រោយប្រជាពលរដ្ឋរហូត ព្រោះនៅពេលមានបញ្ហាណាមួយកើតឡើង បើប្រជាពលរដ្ឋរងគ្រោះមិនតវ៉ាខ្លាំងៗ ឬមានសារព័ត៌មានផ្សាយរិះគន់ នោះអាជ្ញាធរធ្វើមិនដឹងឬមិនដោះស្រាយជូនប្រជាពលរដ្ឋឡើយ។ ជាក់ស្តែងករណីចាក់ដីលុបអូរទន្ទ្រានយកធ្វើជាកម្មសិទ្ធិនេះ គឺបានកើតឡើងច្រើនខែហើយ តែអាជ្ញាធរនិងមន្ត្រីជំនាញគ្មានប្រតិកម្មតបអ្វីទេ ខណៈគ្រឿងចក្ររបស់ឈ្មួញកំពុងធ្វើសកម្មភាពយ៉ាងរលូន៕
