ខេត្តកំពង់ចាម ៖ សម្តេច ហ៊ុន សែន បានប្តេជ្ញាជាថ្មីម្តងទៀតថា នឹងមិនអត់ឱនឬយោគយល់ ចំពោះមន្ត្រីពុករលួយណាម្នាក់ឡើយ នួវភាពអសកម្ម និងអំពើពុករលួយ រាប់សិបឆ្នាំរបស់លោក នួន គឹមហេង គួរតែជាកម្មវត្ថុដែលត្រូវ ស៊ើបអង្កេតឲ្យបានស៊ីជម្រៅឡើងវិញ ជាការរួមចំណែក អនុវត្តការប្តេជ្ញាចិត្ត របស់លោក ហ៊ុន សែន ឲ្យទទួលបានជោគជ័យ។
លោក នួន គឹមហេង បានកាន់តំណែងជា អនុប្រធានមន្ទីរសាធារណការ ខេត្តកំពង់ចាម ឡើងដុះស្លែ ក្នុងការគ្រប់គ្រងប្រាក់ ចំណូលសេដ្ឋកិច្ច យកមកផ្គត់ផ្គង់ បែងចែកថ្នាក់ដឹកនាំមន្ទីរ តាមគ្រប់មធ្យោបាយ ហើយគេដឹងថាចំណូលដ៏ធំបំផុត របស់លោក នួន គឹមហេង មាន២ផ្នែកធំៗគឺការគ្រប់គ្រងជញ្ជីង ថ្លឹងរថយន្តនៅចំណុចថ្នល់កែង ស្រុកបាធាយ និងនៅចំណុចថ្នល់ទទឹង ក្នុងស្រុកត្បូងឃ្មុំ ហើយម្តងម្កាល លោក នួន គឹមហេង ក៏បានបង្កើតទីតាំងចល័ត ដើម្បីគាបស៊ីក្រុមឈ្មួញ ដឹកទំនិញតាមផ្លូវនានា ហើយប្រភពចំណូលសំខាន់ មួយទៀតនោះ គឺការធ្វើស្លាកលេខយានយន្ត និងការបញ្ចេញប័ណ្ណបើកបរ តាមរបៀបពុករលួយផងដែរ។ក្រុមអ្នករកស៊ីដឹកជញ្ជូនទំនិញ ធ្លាប់បាននាំគ្នាប្រមូលផ្តុំ នៅមុខសាលាខេត្តកំពង់ចាម ដើម្បីបកអាក្រាតរឿងអាស្រូវ ពុករលួយរបស់លោក នួន គឹមហេង ក្នុងការប្រើប្រាស់ទីតាំង ជញ្ជីងថ្លឹងរថយន្តទាំងចល័ត និងអចល័ត ជាប្រយោជន៍ផ្ទាល់ខ្លួន ហើយកាលពីពេលថ្មីៗនេះ ស្ត្រីអាជីវករម្នាក់ បានធ្វើលិខិតប្តឹងផ្តល់ក្រុមជញ្ជីងចល័តរបស់លោក នួន គឹមហេង ផ្អើលដល់អភិបាលខេត្ត លន់ លឹមថៃ ផងដែរ។
គេនៅតែគ្មានសង្ឃឹមថា រដ្ឋមន្ត្រីក្រសួងសាធារណការ ហ៊ានធ្វើអ្វីលោក នួន គឹមហេង នោះទេ បើទោះបីជាគាត់បានប្រព្រឹត្ត អំពើខុសឆ្គងសឹងរាប់ភ្លេច ទៅហើយក៏ដោយ គឺទំនងណាស់ដែលថា ផលប្រយោជន៍ដែលលោក នួន គឹមហេង ប្រមូលបានក៏មានការ បែងចែកជូនថ្នាក់លើទើបអ្វីៗ អាចដំណើរការដោយរលូនល្អ គ្មាននរណាហ៊ានចាប់កំហុសលោក នួន គឹមហេង។ ក្រុមអ្នករកស៊ីដឹកជញ្ជូនទំនិញ បានអះអាងថា លោក នួន គឹមហេង បានបង្កើតក្រុមថ្លឹងរថយន្តចល័ត ដែលប្រើប្រាស់ជញ្ជីងកាស្យូ ធុនតូច ដើម្បីដើរល្បាតរកលុយ តាមដងផ្លូវទាំងតូចទាំងធំ នៅទូទាំងខេត្តកំពង់ចាម ហើយក្រុមជញ្ជីងចល័តនេះ កាប់ឆៅតែម្តង ដូចដែលក្រុមអាជីវករ រកស៊ីដឹកជញ្ជូនកសិផលមកពីខេត្តឧត្តរមានជ័យ និងខេត្តព្រះវិហារ បានរៀបរាប់ថា រថយន្តយីឌុប ដែលអាចផ្ទុកទម្ងន់ ច្រើនបំផុតត្រឹម ៣៥តោន មិនអាចលើសពីនេះបានទេ ហើយពួកគាត់ដឹកជញ្ជូន តាមដងផ្លូវ បានឡើងជញ្ជីងថ្លឹងរថយន្ត ក្នុងខេត្តសៀមរាប និងខេត្តកំពង់ធំ គឺមិនមានលើសទម្ងន់ទេ ប៉ុន្តែពួកគាត់នៅតែបង់លុយតាមមនោសញ្ចេតនា សម្រាប់ថ្លៃបាយទឹក ឲ្យក្រុមជញ្ជីងថ្លឹងរថយន្ត ទាំងនោះ ១ម៉ឺន ឬ២ម៉ឺនរៀល។
លោក នួន គឹមហេង ក៏ទទួលបានផលប្រយោជន៍ យ៉ាងច្រើនក្រាស់ក្រែលតាមរយៈ ការចាត់តាំងមន្ត្រីជំនិតរបស់គាត់ ឲ្យចុះទៅគ្រប់គ្រងដោយផ្ទាល់នៅ ស្ថានីយ៍ថ្លឹងរថយន្តថ្នល់ទទឹង ស្ថិតនៅក្នុងឃុំជប់ ស្រុកត្បូងឃ្មុំ និងស្ថានីយ៍ថ្លឹងរថយន្តមួយទៀត នៅឃុំថ្នល់កែង ស្រុកបាធាយ ខេត្តកំពង់ចាម ដែលនៅទីនោះ ទាំងរថយន្តផ្ទុកលើសទម្ងន់ និងមិនលើសទម្ងន់ សុទ្ធតែត្រូវបង់លុយទៅតាម ចំនួនដែលបានកំណត់។ លោក នួន គឹមហេង ក៏បែកគំនិតបង្កើតស្ថានីយ៍ ថ្លឹងរថយន្តចល័តមួយទៀត ដើម្បីប្រមូលលុយដុំ ហើយជញ្ជីងចល័តមួយនេះ ត្រូវបានក្រុមអ្នកដឹកជញ្ជូនទំនិញអះអាងថា ថ្លឹងពេលណាក៏ឃើញលើសទម្ងន់ ដល់ទៅជាង ១០តោនឯណោះ ហើយបើពិន័យឲ្យបង់លុយក្នុង១តោន ១លានរៀល ក៏មិនដឹងជាយកលុយ ទៅណាអស់ដែរ ប៉ុន្តែគេទទួលស្គាល់ថា លោក នួន គឹមហេង មានទេពកោសល្យ ក្នុងការប្រមូលលុយតាម របៀបពុករលួយ ៕
