ខេត្តកំពត ៖ លោក តេង សួន បានឡើង ជាប្រធានគណៈកម្មការស្រាលបង្ក្រាបបទល្មើសលើផ្ទៃសមុទ្រចំណុះឲ្យ អគ្គស្នងការនគរបាលជាតិ។តែតាំងពីបានតួនាទី គេសង្កេតឃើញក្រុមមន្ត្រីនគរបាល បង្ក្រាបបទល្មើសលើផ្ទៃសមុទ្រក្រោម ការគ្រប់គ្រងរបស់លោក តេង សួន មិនដែលបានបង្ហាញស្នាដៃអ្វីទេគឺសម្ងំយ៉ាងសុខស្រួលក្នុងការប្រមូល លុយពីបទល្មើសនេសាទ ការដឹកជញ្ជូនឈើគ្រញូងខុសច្បាប់ និងការនាំចូលទំនិញគេចពន្ធនិងទំនិញខុសច្បាប់ដែលក្រុមឈ្មួញ ដឹកជញ្ជូនឆ្លងកាត់ផ្ទៃសមុទ្រខ្មែរ។
ក្រសួងមហាផ្ទៃបានចំណាយ លុយបេសកកម្មសម្រាប់ក្រុមបង្ក្រាបបទល្មើសលើផ្ទៃសមុទ្រ នេះក្នុងមួយខែៗរាប់សិបលានរៀល តែហាក់បីដូចជាមិនមានផល ប្រយោជន៍អ្វីសម្រាប់រដ្ឋនោះទេ បែរជាបង្ក ឱកាសឲ្យលោកតេងសួនប្រមូលផលប្រយោជន៍ទៅវីញ។ប្រភពពីមន្ត្រីនគរបាលមូលដ្ឋាននិយាយថា បទល្មើសឆ្លងកាត់លើផ្ទៃសមុទ្រមានជារៀងរាល់យប់តែលោកតេង សួន មិនអោយបង្ក្រាបព្រោះបទល្មើសទាំងនោះបានបង់លុយកាក់អោយមន្ត្រី ប៉ូលីសព្រំដែនទឹកអស់ហើយ ។
មន្ត្រីមួយ ចំនួនទៀតបានអោយដឹងថា ក្នុងមួយខែៗគឺនគរបាលបង្ក្រាបបទល្មើសលើផ្ទៃសមុទ្រប្រមូលលុយក្នុង មួយខែរាប់សិបលានយកមកចែកគ្នាដាក់ហោប៉ៅផ្ទាល់ខ្លួនយ៉ាងរំភើយមិនដែលខ្វល់ខ្វាយពីការបង្ក្រាប។សេចក្តីរាយការណ៏បង្ហើបអោយដឹងថា នៅលើផ្ទៃសមុទ្ររបស់កម្ពុជា ចាប់ពីខេត្តកំពត កោះកុង និងខេត្តព្រះសីហនុ គឺមានបទល្មើសគ្រប់ប្រភេទដូចជាទូកដឹកជញ្ជូនឈើគ្រញូងចេញពី ខេត្តកោះកុងយ៉ាងគគ្រឹកគគ្រេងនាំយកទៅលក់នៅស្រុកយួន ប្រព្រឹត្តដោយឈ្មួញធំ។
ដោយឡែក មានទូកដឹកជញ្ជូនប្រេងសាំងគេចពន្ធ រួមទាំងប្រេងម៉ាស៊ូត មកពីស្រុកសៀម ចូលខេត្តកោះកុង ខេត្តកំពត និងខេត្តព្រះសីហនុ មួយថ្ងៃៗរាប់ម៉ឺនលីត្រ ត្រូវជារាប់សិបតោន គេមិនដែលឃើញក្រុមបង្ក្រាបបទល្មើសលើផ្ទៃសមុទ្ររបស់លោក តេង សួន យកចិត្តទុកដាក់គិតគូរបង្ការបង្ក្រាបទប់ស្កាត់បទល្មើសទាំងនេះទេ។ សូម្បីតែទូកដឹកជញ្ជូនទំនិញគេចពន្ធនិងទំនិញខុសច្បាប់មកពីស្រុកយួន និងស្រុកសៀមរបស់ក្រុមឈ្មួញទាំងធំទាំងតូច ជាពិសេសទូកដឹកទំនិញមកពីចំណុចខ្លងស៊ុន នៃស្រុកសៀម មកលើកដាក់ទំនិញនៅចំណុចផែស្រែអំបិល ផែកែវផុស សុទ្ធតែមានទំនាក់ទំនងបង់លុយឲ្យលោក តេង សួន ជាប់ជាប្រចាំទើបមិនដែលមាននរណាហ៊ានប៉ះពាល់។
មន្ត្រីតូចតាចមួយចំនួនក៏បានបង្ហើបអំពីបញ្ហាទូកនេសាទ របស់យួន ដែលចូលមកធ្វើសកម្មភាពដោយខុសច្បាប់ក្នុងដែនសមុទ្រខ្មែរយ៉ាង អនាធិបតេយ្យក្នុងមួយយប់រាប់រយទូក ហើយទូកនេសាទសៀមនិងយួនទាំងនោះ ត្រូវបង់លុយឲ្យទូក១គួរតំលៃ១៣០០០$ទៅ១៥០០០$ក្នុង១ខែ។ បានប្រើប្រាស់ឧបករណ៍នេសាទល្មើសច្បាប់ដូចជា ទូកអូសគូទូក ប្រើភ្លើងហ្វា ប្រើអួនក្រឡាញឹក ឬអួនឆក់ បំផ្លិចបំផ្លាញធនធាន មច្ឆជាតិខ្មែរ ក្នុងដែនសមុទ្រ ក៏មិនដែលមានការបង្ក្រាប គឺពួកគេអាចធ្វើសកម្មភាពស្រេចតែអំពើចិត្ត ប្រការនេះធ្វើឲ្យគេជឿថាពួកប្រព្រឹត្តបទល្មើសទាំងនោះ។
ត្រង់ចំណុចនេះច្បាស់ណាស់ដែលថាបញ្ហាប្រយោជន៍បានធ្វើឲ្យក្រុម បង្ក្រាបបទល្មើសលើផ្ទៃសមុទ្ររបស់លោក តេង សួន មិនដែលហ៊ានហើបមាត់ពីបទល្មើសនេសាទរបស់ទូកសៀមនិង យួន ប៉ុន្តែគេឃើញកម្លាំងរបស់លោក តេង សួន បានបើកម៉ារីន បើកអូប័រ ទៅសំចតកណ្តាល សមុទ្រ ធ្វើជាទីតាំងសម្រាប់ឲ្យក្រុមឈ្មួញចូលបង់លុយយ៉ាងអនាធិបតេយ្យបំផុត។ ដូចដែលប្រជាពលរដ្ឋមួយចំនួនបានលើកឡើងថា ក្នុងប្រទេសកម្ពុជាមានប៉ុស្តិ៍ជជុះទាំងលើគោក ទាំងទឹក រហូតដល់ដែនសមុទ្រ ហើយក្រុមបង្ក្រាបបទល្មើសជើងទឹករបស់លោក តេង សួន ។
ក៏បានធ្វើសកម្មភាពប្រដេញចាប់ទូកនេសាទខ្មែរតូចៗដើម្បីយកលុយដោយ គ្មានការយោគយល់អ្វីឡើយ។ សម្រាប់ទូកនេសាទរបស់ សៀម និងយួន ដែលបានចូលមកនេសាទដោយប្រើប្រាស់ឧប ករណ៍នេសាទល្មើសច្បាប់ក្នុងដែនសមុទ្រខ្មែរយ៉ាងអនាធិបតេយ្យនោះ ត្រូវបានមន្ត្រីតូចតាចមួយចំនួនបង្ហើបឲ្យដឹងថា ទូកនេសាទ របស់សៀម យួន មួយគូៗត្រូវបង់លុយឲ្យលោក តេង សួន មិនតិចជាង ១៣០០០$ទៅ១៥០០០$ក្នុង១គួរនោះទេក្នុងមួយខែៗទើបគ្មានការបង្ក្រាប។ បើរួមបញ្ចូលទាំងទូក និងសាឡង់ ដែលដឹកជញ្ជូនឈើគ្រញូងយកទៅលក់នៅស្រុកយួនរបស់ឈ្មួញធំៗមួយចំនួនក៏ ក្រុមឈ្មួញបានបង់លុយឲ្យក្រុមបង្ក្រាបបទល្មើសលើផ្ទៃសមុទ្ររាប់សិបគួរនេសាទយ៉ាងរលូនល្អ រយះពេលយូរឆ្នាំមកហើយ៕
រាល់ពីព័ត៌មានទំាងនេះ យើងមិនទាន់ទាក់ទងសួរបាននៅឡើយដោយមិនមានលេខទូរសព្ទ័។
