អនុប្រធានការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកណ្តាល ម្នាក់ មានជំនាញខ្លាំងណាស់ខាងដាក់កុងត្រូលជជុះដូចកុកចាំចឹកចំណី ក្នុងការប្រមូលលុយពីក្រុមអ្នករកស៊ីល្មើសច្បាប់ ទំនិញគេចពន្ធ និងឈើប្រណីតតាមផ្លូវជាតិ ២១B ក្នុងស្រុកស្អាង និងស្រុកកោះធំ ហើយនិងបានបង្កើតប៉ុស្តិ៍ជជុះ មួយប្រចាំច្រកទ្វារជ្រៃធំ ដែលបោះទីតាំងនៅខាងក្រោយប៉ុស្តិ៍ប៉ូលិសការពារព្រំដែននៅជាប់មាត់ទន្លេបាសាក់ ដោយឱ្យកូនចៅស្នាក់ឈរជើងនៅទីនោះ សំកុកចាំជម្រិតទារលុយពីប្រជាកសិករ ដែលនាំកសិផលដូចជា ស្រូវ ពោត សណ្តែក ទៅលក់នៅប្រទេសយួនយ៉ាងមមាញឹក ។
ប្រភពព័ត៌មានបានឱ្យដឹងថា លោក សេង សុទ្ធ បានប៉ាវផ្តាច់ផ្លូវលេខ ២១B មិនមានមន្ត្រីណាអាចឈានចូល ទឹកដីស្រុកស្អាង កោះធំ ធ្វើផ្តេសផ្តាស់បានឡើយ មុននឹងធ្វើអ្វីទាល់តែសួរលោក សេង សុទ្ធ សិនពីព្រោះ អី សេង សុទ្ធ គឺសាច់ឈាមជាមួយលោក អ៊ាវ ចំរើន ស្នងការខេត្តកណ្តាលខាងប្រពន្ធ និងប្រពន្ធត្រូវជាបងប្អូនជីដូនមួយ ។
គួរបញ្ជាក់ថា ផ្លូវជាតិលេខ ២១B គឺជាផ្លូវដ៏សំខាន់សម្រាប់អីវ៉ាន់គេចពន្ធចេញចូលរវាងប្រទេសយួន-កម្ពុជា ទាំងផ្លូវទឹក និងផ្លូវគោក ដែលអាចឱ្យលោក សេង សុទ្ធ ធ្វើជាអធិរាជកើបយកលាភសក្ការៈធ្វើមានធ្វើបានយ៉ាង ត្រជាក់ថ្លើមបំផុត ។
តាមប្រភពដដែលបានបន្តទៀតថា ទំនិញគេចពន្ធពីយួនដូចជា អីវ៉ាន់ចាប់ហួយ គ្រឿងទេសសម្ភារៈ ប្រើប្រាស់ ថ្នាំបំពុលសត្វ ថ្នាំកសិកម្ម ថ្នាំពេទ្យ សម្រាប់ព្យាបាលមនុស្ស និងសត្វគ្រប់ប្រភេទទៀតផង ។ អ្នករកស៊ីទាំងអស់សុទ្ធតែរងនូវការគាបសង្កត់ ឱ្យបង់លុយប្រចាំថ្ងៃខែ ឬឆ្នាំទៅឱ្យ សេង សុទ្ធ ទាំងអស់បើពុំនោះទេ និងត្រូវចាប់មកពិន័យ ឬគោះលុយស្ងាត់ៗយ៉ាងចាស់ដៃមិនខាន ។
ដោយឡែកទំនិញគេចពន្ធពីកម្ពុជាវិញមានដូចជា សត្វព្រៃគ្រប់ប្រភេទ និងឈើប្រណីតជាច្រើនទៀត ក៏មិនអាចគេចផុតពីកណ្តាប់ដៃលោក សេង សុទ្ធ បានដែរ គេតែងតែឃើញលោក សេង សុទ្ធ នៅមុខមន្ទីរពេទ្យ បង្អែក ស្រុកស្អាងជារៀងរាល់ថ្ងៃទី ១ ឬថ្ងៃទី ២ ក្នុងដើមខែនីមួយៗ មិនដែលភ្លេចទេ គឺជាថ្ងៃដែលឈ្មួញណាត់បង់ លុយ ។
