ក្រុមប្រជាពលរដ្ឋ និងអ្នករកស៊ីដឹកជញ្ជូនទំនិញឆ្លងកាត់ច្រកអន្តរជាតិអូរស្មាច់ ក្រុងសំរោង ខេត្តឧត្តរមានជ័យ បានសម្តែងការក្តៅក្រហាយយ៉ាងខ្លាំងចំពោះមន្ត្រីនគរបាលអន្តោប្រវេសន៍ក្រោមការ គ្រប់គ្រងរបស់លោក ខូង ទីន ដែលចាត់តាំងមន្ត្រីឱ្យប្រព្រឹត្តអំពើពុករលួយបង្ខំឱ្យអ្នកដំណើរឆ្លងកាត់ព្រំដែនបង់លុយតាម តែទំនើងចិត្តជាពិសេស គឺក្រុមឈ្មួញរកស៊ីនាំចូលទំនិញតាមរទេះត្រូវបានមន្ត្រីនគរបាលអន្តោប្រវេសន៍ទាំងនោះគាបជម្រិតបង្ខំឱ្យបង់លុយស្រេច និងក្បាលចិត្តដើម្បីយកទៅធ្វើមានបានផ្ទាល់ខ្លួនពួកគេ ។
អាជ្ញាធរក្រុងសំរោងហាក់មិនសប្បាយចិត្តចំពោះមន្ត្រីនគរបាលអន្តោប្រវេសន៍ប្រចាំច្រកអន្តរជាតិអូរស្មាច់នោះទេ ព្រោះអាជីវករជាច្រើនធ្លាប់បានប្តឹងឱ្យអាជ្ញាធរក្រុងសំរោងជួយដោះស្រាយបញ្ហារបស់ពួកគេនៅពេលដែលនគរបាល អន្តោប្រវេសន៍របស់លោក ខូង ទីន បង្ខំឱ្យបង់លុយចាប់ពី ១ម៉ឺនរៀល រហូតដល់ ៥ម៉ឺនរៀល តាមមុខទំនិញស្រេចតែអំពើចិត្ត ដោយមិនគិតថា ជាមេឈ្មួញធំ ឬប្រជាពលរដ្ឋក្រីក្រឡើយ។
ដូចជា ក្នុងមួយថ្ងៃៗយ៉ាងហោចណាស់ក៏មានរទេះដឹកទំនិញឆ្លងកាត់ច្រកអន្តរជាតិអូរស្មាច់យ៉ាងច្រើនសន្ធឹក សន្ធាប់ខ មិនដឹងជាមន្ត្រីនគរបាលអន្តោប្រវេសន៍ក្រោមបញ្ជារបស់លោក ខូង ទីន ប្រមូលយកលុយទៅបង់ឱ្យនរណា ឬ ខូង ទីន ច្រកហោប៉ៅផ្ទាល់ខ្លួនធ្វើមានបាននេះទេ។
បញ្ហាមួយទៀត គឺករណីឃុបឃិតឱ្យក្រុមពលករលួចឆ្លងដែនខុសច្បាប់តាមរយៈមេខ្យល់ប្រមាណ ៤ ទៅ ៥នាក់ ក៏ជាប្រភពចំណូល ដ៏សំខាន់របស់លោក ខូង ទីន ផងដែរ ។
ដូចជាមេខ្យល់ម្នាក់អាចនាំពលករឆ្លងដែនមួយក្រុមមានគ្នាចាប់ពី ៥ ទៅ ១០នាក់ ហើយក្នុង មួយថ្ងៃៗមានពលករឆ្លងដែនខុសច្បាប់ចាប់ពី ៥០ ទៅ ៨០នាក់ គេមិនដែលឃើញនគរបាលអន្តោប្រវេសន៍របស់លោក ខូង ទីន ទប់ស្កាត់ការធ្វើចំណាកស្រុកដោយខុសច្បាប់ឱ្យស្របតាមបទបញ្ជារបស់រាជរដ្ឋាភិបាលម្តងណាឡើយ ។ ហើយក្រុមមេខ្យល់បានយកប្រាក់ពីពលករចំណាកស្រុកក្នុងម្នាក់ៗចាប់ពី ២៥០០បាត ទៅបែងចែកឱ្យលោក ខូង ទីន ទើបអាចឆ្លងដែនដោយខុសច្បាប់ ដោយគ្មានការភ័យខ្លាចទៅបាន ។
ក្រុមអាជ្ញាធរបាននិយាយរិះគន់ថា សូម្បីតែដីនៅជាប់ស្នាក់ការនគរបាលអន្តោប្រវេសន៍ប្រចាំច្រកអន្តរជាតិអូរស្មាច់ ត្រូវបានលោក ខូង ទីន ពុះច្រៀកបែងចែកឱ្យសាច់ញាតិ និងមន្ត្រីជំនិតៗរបស់គាត់សង់តូបលក់ដូរទុកជួលក្នុងមួយខែៗ រាប់រយពាន់ដុល្លារទោធ្វើមានបានផ្ទាល់ខ្លួន និងបែងចែកឱ្យមេ ដោយលោក ខូង ទីន មិនខ្វល់ខ្វាយពីសុខទុក្ខរបស់មន្ត្រីតូចតាច នោះទេ ។
ផ្ទុយទៅវិញគេចង់ឃើញថ្នាក់លើមហាផ្ទៃគួរត្រួតពិនិត្យភាពអសកម្មរបស់លោក ខូង ទីន ឡើងវិញផង ព្រោះប្រជាពលរដ្ឋ និងក្រុមអ្នករកស៊ីដឹកជញ្ជូនទំនិញឆ្លងកាត់ច្រកអន្តរជាតិអូរស្មាច់មិនអាចទ្រាំទ្របានទៀតទេ ហើយគង់តែថ្ងៃណាមួយ ប្រជាពលរដ្ឋ និងក្រុមអាជីវករនាំគ្នាធ្វើបាតុកម្ម ដើម្បីបកអាក្រាតរឿងពុករលួយរបស់លោក ខូង ទីន មិនខាន។
