ការកាន់កាប់តំណែងជាប្រធានស្នាក់ការកាំកុងត្រូលប្រចាំច្រកអន្តរជាតិប៉ោយប៉ែត ឡើងដុះស្លែទៅហើយ នោះ គេ សង្កេតឃើញលោក អ៊ុត សុភាព បានរក្សាទុកនូវយន្តការពុករលួយឃុបឃិតឱ្យមន្រ្តីជំនិតៗរបស់ខ្លួនចំនួន ៣នាក់ចេញប្រមូលលុយពីគ្រប់ច្រកល្ហកយកទៅច្រកហោប៉ៅធ្វើមានធ្វើបានផ្ទាល់ខ្លួន មិនដែលខ្វល់ខ្វាយពីការ ចាប់ពិន័យក្រុមឈ្មួញ ដែលរកស៊ីដឹកជញ្ជូនម្ហូបអាហារ និងទំនិញមានជាតិពុល ខូចគុណភាព ដើម្បីប្រមូលថវិកា ជូនជាតិនោះទេ ។
មួយថ្ងៃៗ គេសង្កេតឃើញលោក អ៊ុត សុភាព តឺនុយធ្វើដំណើរទៅកាន់បរិវេណ កាស៊ីណូ នៅក្រុងប៉ោយប៉ែត គេមិនដឹងថា គាត់ណាត់ជួបជាមួយមេឈ្មួញធំៗនៅទីនោះ ឬចូលទៅត្រួតពិនិត្យអ្នកលេង ល្បែងស៊ីសងបន្ថែម លើជំនាញកាំកុងត្រូល ឬយ៉ាងណានោះទេ។
តាមសកម្មភាពរបស់មន្រ្តីជំនាញកាំកុងត្រូលក្រោមការគ្រប់គ្រងរបស់លោក អ៊ុត សុភាព បានធ្វើការគាបជម្រិតកោសរូសឱ្យកម្មកររអូសរទេះដឹកទំនិញបង់លុយទៅតាមអំពើចិត្តរបស់ពួកគេ មិនដែលយកចិត្តទុកដាក់អនុវត្តតួនាទី ក្នុងការបង្រ្កាប និងទប់ស្កាត់ការដឹកជញ្ជូនចំណីអាហារខូចគុណភាពមានជាតិពុល ដែលនាំឱ្យប៉ះពាល់ដល់សុខភាពប្រជាពលរដ្ឋជាអ្នកបរិភោគនោះទេ។ ឈ្មួញធំៗជាច្រើនដែលមានអាជីពរកស៊ីដឹកជញ្ជូនទំនិញគេចពន្ធ ឬទំនិញខូចគុណភាពឆ្លងកាត់តាមច្រកប៉ោយប៉ែតដូចជាឈ្មោះ ថោង គឹមឡេង, ឈ្មោះ ជិវ ឈ្មោះ ចែ មុំ ឈ្មោះ ចែស្រី និងយាយហ៊យ គឺមេឈ្មួញទាំង៥ នាក់នេះបានរក្សា ទំនាក់ទំនងល្អជាមួយលោក អ៊ុត សុភាព ហើយមានការបង់លុយបង់កាក់ជាប់ជាប្រចាំ ដើម្បីកុំឱ្យជំនាញកាំកុលត្រូលធ្វើការត្រួតពិនិត្យឬបង្រ្កាបទំនិញរបស់គេ។
លោក អ៊ុត សុភាព បានចាត់តាំងមន្រ្តីជំនិតៗរបស់ខ្លួនចំនួន ៣នាក់ ឱ្យចុះប្រមូលលុយពីក្រុមឈ្មួញយ៉ាងអនាធិបតេយ្យ ទី១ ឈ្មោះ ស៊ាន ស៊ីណាត មានតួនាទីជាអនុប្រធានស្នាក់ការកាំកុងត្រូល ប្រចាំច្រកអន្តរជាតិ ប៉ោយប៉ែត ដើម្បីចាត់ចែងមន្រ្តីកាំកុងត្រូលឱ្យចាំរាប់រទេះ ដឹកទំនិញប្រមូលលុយ ទី២ឈ្មោះ ខៀវ ពេជ្រ តារាវឌ្ឍនា មានតួនាទីទំនាក់ទំនងជាមួយក្រុមឈ្មួញសម្រាប់ការបង់លុយប្រចាំខែ និងទី៣ឈ្មោះ ស៊ាន តារា ដែលមានតួនាទីដើរល្បាតពិនិត្យមើលទំនិញគេចពន្ធ និងទំនិញខុសច្បាប់ ដើម្បីកោសរូសបង្ខំឱ្យបង់លុយក្នុងកម្រិតខ្ពស់។
ដោយសារតែច្រកអន្តរជាតិប៉ោយប៉ែតមានសកម្មភាពមមាញឹកក្នុងការដឹកជញ្ជូនទំនិញទាំងស្របច្បាប់ និងខុសច្បាប់ ទាំងតាមរទេះ និងតាមរថយន្ត គេសង្កេតឃើញលោក ស៊ាន ស៊ីនាត បានចាត់តាំងជនស៊ីវិលចំនួន ២នាក់ទៀត ឲ្យជួយការងាររបស់ពួកគេសម្រាប់ការប្រមូលលុយពីកម្មករអូសរទេះដឹកទំនិញយ៉ាងក្រអើតក្រទមឥតអៀនខ្មាស់។
តាមឈ្មួញបញ្ជាក់ផងដែរថា សម្រាប់ឈ្មួញធំៗ ពួកគេបានជួលកម្មករ ឱ្យអូសរទេះ ដឹកទំនិញរបស់ ពួកគេឆ្លង កាត់ព្រំ ដែន ហើយក៏មានការសរសេរឈ្មោះ ឱ្យកម្មករទាំងនោះទុកសម្រាប់បង្ហាញជំនាញកាំកុងត្រូល ហើយគេក៏បានកត់ត្រា តួលេខ នៃចំនួនរទេះរបស់ក្រុមឈ្មួញនិមួយៗ សម្រាប់ការទូទាត់លុយកាក់ជាមួយក្រុមឈ្មួញនៅពេលល្ងាច ឬទូទាត់ ប្រចាំសប្តាហ៍។ ករណីខ្លះទៀត ជំនាញកាំកុងត្រូលបានគាបសង្កត់កម្មករអូសរទេះដែលប្រើកម្លាំងបាយសុទ្ធសាធដើម្បី បានលុយមកទិញបាយចម្អែតក្រពះ និងទុកទ្រទ្រង់ជីវភាពប្រចាំថ្ងៃ តាមរយៈការត្រួតពិនិត្យរទេះ បើរកឃើញ ទំនិញ មិន ប្រក្រតី ត្រូវជំនាញកាំកុងត្រូលទាំងនោះបង្ខំឱ្យបង់លុយតាមតែអំពើចិត្ត ហើយកម្មករដែលគ្មានលុយបង់ ត្រូវគេរឹប អូស យកទំនិញ មិនដែលមានការយោគយល់ចំពោះកម្មករអូសរទេះ ដែលភាគច្រើនជាជនពិការស្រ្តីមេម៉ាយ និង ទុរគត ជននោះទេ។
តាមការសង្កេតភាពអនាធិបតេយ្យរបស់ជំនាញកាំកុងត្រូលប្រចាំច្រកអន្តរជាតិប៉ោយប៉ែត ដែលកំពុងសុខ ស្រួល ក្នុង ការប្រមូលលុយពីក្រុមឈ្មួញរកស៊ីនាំទំនិញគេចពន្ធ និងទំនិញខុសច្បាប់ពីស្រុកសៀម តាមរបៀបពុករលួយ ផ្ទុយពីការ លើកឡើងរបស់លោក ឱម យ៉ិនទៀង ដែលបានកំណត់ថា យកខេត្តបន្ទាយមានជ័យធ្វើជាគំរូល្អមុនគេ ក្នុងការ ប្រយុទ្ធ ប្រឆាំងអំពើពុករលួយ ដែលក្នុងនោះ មានការឃាត់ខ្លួនមន្ត្រីធំៗទៅផ្តន្ទាទោសតាមច្បាប់មួយចំនួនរួចមកហើយ។
ដូច្នេះភាពអសកម្មដែលលោក អ៊ុត សុភាព កំពុងពង្រាយមន្រ្តីក្រោមឱវាទ ចុះប្រមូលលុយ តាមគ្រប់ច្រកល្ហក ពីការដឹក ជញ្ជូនទំនិញខុសច្បាប់ និងចំណីអាហារខូចគុណភាព ដែលផ្គើនទៅនឹងបទបញ្ជារបស់ក្រសួងពាណិជ្ជកម្ម ល្មមដល់ ពេល ថ្នាក់លើត្រួតពិនិត្យបញ្ហានេះ ដើម្បីនាំយកមន្រ្តីកាំកុងត្រូលពុករលួយខិលខូចទៅដាក់ពិន័យ ឬផ្តន្ទាទោសតាម ច្បាប់ជាបន្ទាន់ ដើម្បីបង្ការកុំឱ្យមានការហូរចូលទំនិញខុសច្បាប់ និងចំណីអាហារខូចគុណភាព ដែលជាប្រភពធំបំផុត នាំឱ្យប៉ះពាល់សុខភាពរបស់ប្រជាពលរដ្ឋ ៕
