ភ្នំពេញ៖ បន្ទាប់ពីលោក ប៉ា សុជាតិវង្ស បានឡើងកាន់កាប់តំណែង ជាអភិបាល សាលារាជធានីភ្នំពេញរួចមក គាត់បានធ្វើការផ្លាស់ប្ដូរ មុខតំណែងមន្ត្រីៗ ដុះស្លែមួយចំនួន ដូចជាមុខតំណែង មានខ្លាញ់ដុះស្លែរបស់លោក ប៊ុន សេរី ជាប្រធានគណនេយ្យ ក្រោយមកក្លាយជា នាយកទីចាត់ការហិរញ្ញវត្ថុ សាលារាជធានីភ្នំពេញ ជាច្រើនអាណត្តិមកហើយនោះជាដើម ។ មុខតំណែងខ្លាញ់ដែលលោក ប៊ុន សេរី អាចប្រមូលលុយកាក់ យកទៅធ្វើមានបានយ៉ាងច្រើននោះ ឥឡូវត្រូវគេផ្លាស់ប្ដូរវេន ចែកគ្នាស៊ីរបៀបវិលជុំហើយ ពោលគឺគេឲ្យលោក អ៊ុក សុផល ឡើងកាន់កាប់ជំនួសម្ដងវិញ ដោយឲ្យលោក ប៊ុន សេរី ឡើងទៅធ្វើជា នាយករងរដ្ឋបាល សាលារាជធានីភ្នំពេញ មិនទៅណាឆ្ងាយ ពីកន្លែងកាន់លុយ នោះឡើយ ។
តាមមន្ត្រីៗមួយចំនួន នៅសាលារាជធានីភ្នំពេញ និងមានខ្លះទៀត បម្រើការងារនៅ តាមបណ្ដាខណ្ឌនានា បាននិយាយថា វាជាការល្អប្រសើរហើយ ដែលលោកអភិបាលថ្មី នៃសាលារាជធានីភ្នំពេញ ប៉ា សុជាតិវង្ស អាចធ្វើការកែទម្រង់ រចនាសម្ព័ន្ធមន្ត្រីៗ ដុះស្លែនៅទីនោះ បានមួយចង្កោមធំ នៅជិតបំណាច់ឆ្នាំ២០១៣នេះ ។ ប៉ុន្តែពួកគាត់សំណូមពរថា សូមកុំឲ្យការធ្វើកំណែទម្រង់នោះ ក្លាយទៅជាមួយដំបរ និងបួន (ឬដូចគេដកកងទ័ពវៀតណាម ដាក់បន្ថែមមកវិញច្រើនឡើងៗ នូវជនអន្តោប្រវេសន៍យួន) ឲ្យសោះ… ព្រោះការធ្វើបែបនេះ អាចនឹងធ្វើឲ្យមានគ្រោះថ្នាក់ កាន់តែធ្ងន់ធ្ងរឡើងៗ ជាងពេលមុនទៅទៀត ។
ក្នុងពិធីនោះ លោកអភិបាលថ្មី សាលារាជធានីភ្នំពេញ ប៉ា សុជាតិវង្ស បាននិយាយថា ពីពេលនេះតទៅ សាលារាជធានីភ្នំពេញ លែងដើរតួនាទី ជាកីឡាករផង និងអាជ្ញាកណ្តាល ផងទៀតហើយ ពោលគឺត្រូវប្រគល់ភារកិច្ច ទៅតាមជំនាញ ទទួលខុសត្រូវរៀងៗខ្លួន មានន័យថា ត្រូវប្តូររបៀបរបបធ្វើការ ឲ្យឆ្លើយតបទៅនឹង ស្ថានភាពជាក់ស្តែង និងមិនត្រូវឆ្លើយដាក់គ្នាទេ ។
បើតាមការនិយាយ របស់លោកអភិបាលថ្មី សាលារាជធានីភ្នំពេញ ប៉ា សុជាតិវង្ស ដូចខាងលើគឺគេអាចសន្និដ្ឋានបានថា ថ្នាក់ដឹកនាំ និងមន្ត្រីៗបម្រើការងារនៅ សាលារាជធានីភ្នំពេញ កាលពីពេលមុនៗកន្លងមក (ជាពិសេស ក្នុងសម័យលោក កែប ជុតិមា ធ្វើជាអភិបាល) តែងតែដឹកនាំដើរតួនាទី ជាកីឡាករផង និងអាជ្ញាកណ្តាលផង ដោយឱបក្រសោបយក ការងារសំខាន់ៗ (ពាក់ព័ន្ធនឹងលុយកាក់) ទៅធ្វើតែបុគ្គល បក្ខពួកនិយម មួយក្ដាប់តូច ដោយគ្មានការទទួលខុសត្រូវ ។ ពេលមានបញ្ហាអ្វីកើតឡើង ពួកមន្ត្រីៗទាំងនោះ តែងឆ្លើយទម្លាក់កំហុសដាក់គ្នា ឬឆ្លើយដាក់កូនចៅថ្នាក់ក្រោមៗ ដោយអយុត្តិធម៌បំផុត (ស្វាស៊ីបាយ យកទៅលាបមាត់ពពែ) ដែលជាការធ្វើឲ្យ កើតមានភាពអសកម្ម លើកិច្ចការងារជាច្រើន មិនអាចឆ្លើយតបទៅនឹង ស្ថានភាពជាក់ស្តែងបានទេ ។
ភាពអសកម្មការងារ និងការប្រព្រិត្តអំពើពុករលួយ តាំងពីថ្នាក់លើដល់ក្រោម នៅសាលារាជធានីភ្នំពេញ ក្រោមការដឹកនាំ គ្រប់គ្រងដោយលោក កែប ជុតិមា ជាប្រធានគណបក្សប្រជាជនកម្ពុជា ប្រចាំរាជធានីភ្នំពេញនេះ បានធ្វើឲ្យបងប្អូន មន្ត្រីរាជការក្រីក្រតូចតាច និងប្រជាពលរដ្ឋភាគច្រើន រស់នៅភ្នំពេញទាំងមូល នាំគ្នាស្អប់ខ្ពើមយ៉ាងខ្លាំងបំផុត រហូតដល់ថ្ងៃបោះឆ្នោត ជ្រើសតាំងតំណាងរាស្ត្រ ខែកក្កដាថ្មីៗមកនេះ គណបក្សប្រជាជនកម្ពុជា បានចាញ់ឆ្នោត បាត់បង់អស់កៅអី សមាជិកសភាមិនតិចទេ ។
មានមូលហេតុមួយ ក្នុងចំណោមមូលហេតុ ជាច្រើនផ្សេងទៀត ដែលបានធ្វើឲ្យ គណបក្សប្រជាជនកម្ពុជា ចាញ់ឆ្នោតបាត់អស់ កៅអីសភាយ៉ាងច្រើន នៅរាជធានីភ្នំពេញនោះ ដោយសារថា នៅក្នុងរជ្ជកាលដែលលោក កែប ជុតិមា ធ្វើជាអភិបាល សាលារាជធានីភ្នំពេញ ដុះស្លែជាច្រើនឆ្នាំ ទោះបីគាត់ដល់អាយុត្រូវ ចូលនិវត្តន៍ទៅហើយក៍ដោយនោះ គឺមានប្រព័ន្ធផ្សព្វផ្សាយជាច្រើន បានសរសេររិះគន់ វាយប្រហារយ៉ាងធ្ងន់ៗ ស្ទើររៀងរាល់ថ្ងៃ ទៅលើលោក កែប ជុតិមា ជាប្រធានគណបក្ស ប្រជាជនកម្ពុជា ប្រចាំរាជធានីភ្នំពេញនេះ និងទៅលើមន្ត្រីៗជាច្រើននាក់ ដែលបម្រើការងារនៅ សាលារាជធានីភ្នំពេញ ពីបទឃុបឃិតគ្នា ប្រព្រិត្តអំពើពុករលួយ តួយ៉ាងដូចជាលោក ប៊ុន សេរី ជាដើម ។
ឥឡូវនេះចូលមកដល់ រជ្ជកាលដែលលោក ប៉ា សុជាតិវង្ស ឡើងធ្វើជាអភិបាល សាលារាជធានីភ្នំពេញ ជំនួសបន្តពីលោក កែប ជុតិមា វិញម្ដង ត្រូវបងប្អូនមន្ត្រីរាជការ និងសាធារណជន ជាច្រើនមជ្ឈដ្ឋាន នៅរាជធាភ្នំពេញ បាននាំគ្នានិយាយថា ចាំមើលលោកអភិបាលថ្មី ប៉ា សុជាតិវង្ស គ្រាន់បើជាងលោក កែប ជុតិមា ឬឌាតែខ្នូច ដូចតែគ្នា ឬក៍អន់ជាងលោក កែប ជុតិមា ទៅទៀតនោះ? មានអ្នកខ្លះថា កាលលោក កែប ជុតិមា ធ្វើជាអភិបាល រាជធានីភ្នំពេញ គាត់ (កែប ជុតិមា) បានធ្វើការអភិវឌ្ឈ រីកចម្រើនយ៉ាងខ្លាំង គឺអភិវឌ្ឈទ្រព្យសម្បត្តិផ្ទាល់ខ្លួន និងក្រុមគ្រួសារ បក្ខពួកមួយក្ដាប់តូច បានយ៉ាងច្រើនស្ទើររាប់ភ្លេច ដូចជាអភិវឌ្ឈនូវ លុយកាក់ដាក់នៅធនាគារ មិនតិចលានដុល្លារ, អភិវឌ្ឈវីឡាដ៍ស្កឹមស្កៃ ដីធ្លីជាច្រើនកន្លែង និងផ្ទះល្វែងទាំងជុងៗ មុនពេលគាត់ (កែប ជុតិមា) ចាកចេញពីតំណែង គួរឲ្យសោកស្ដាយបំផុតនេះ ។ ដូច្នេះគេចាំមើលថា តើលោក ប៉ា សុជាតិវង្ស ចឹងដែរអត់…?
មានម្ចាស់ឆ្នោតរាប់សែន រាប់លាននាក់នៅភ្នំពេញ ក៍កំពុងរង់ចាំមើលទៀតថា ក្រោយពីលោក ប៉ា សុជាតិវង្ស ដកលោក ប៊ុន សេរី ដាក់លោក អ៊ុក សុផល ឲ្យឡើងជានាយក ទីចាត់ការហិរញ្ញវត្ថុ សាលារាជធានីភ្នំពេញ សម្រាប់អាណត្តីទី៥ ឆ្នាំ២០១៣-២០១៨នេះ តើនឹងទទួលបាន លទ្ធផលប្លែកគ្នាយ៉ាងណា… ពោលគឺលោក អ៊ុក សុផល គ្រាន់បើជាងលោក ប៊ុន សេរី ឬឌាតែខ្នូច ដូចតែគ្នាដែរទេ ឬក៍អន់ជាងលោក ប៊ុន សេរី ឆ្ងាយទៅទៀតផង?
កន្លងមកមានកាសែត និងគេហទំព័រជាច្រើន ធ្លាប់បានសរសេរចុះផ្សាយ និងបង្ហោះផ្សាយថា ក្នុងរយៈកាលជាច្រើនឆ្នាំ និងច្រើនអាណត្តិ ដែលលោក ប៊ុន សេរី បានកាន់កាប់មុខតំណែងដុះស្លែ ជាប្រធានគណនេយ្យ ក្រោយមកក្លាយជា នាយកទីចាត់ការហិរញ្ញវត្ថុ សាលារាជធានីភ្នំពេញនេះ គាត់ (ប៊ុន សេរី) ប្រព្រិត្តអំពើពុករលួយ ប្រមូលលុយកាក់ ពីតួនាទីខ្លាញ់នោះ យកទៅធ្វើមានបាន ជាផលប្រយោជន៍ផ្ទាល់ខ្លួន និងក្រុមគ្រួសារ មិនតិចសែនលានដុល្លារទេ ។
ប្រព័ន្ធផ្សព្វផ្សាយទាំងនោះថា ដោយសារតែលោក ប៊ុន សេរី ប្រព្រិត្តអំពើពុករលួយ អាចរកលុយបានស្រួល និងបានច្រើពេក ដេកចាយមិនអស់… គាត់មិនត្រឹមតែផ្ដល់ឲ្យ ប្រពន្ធកូនដើមរបស់គាត់ រស់នៅមានជីវភាព ស្ដុកស្តម្ភប៉ុណ្ណោះទេ សូម្បីតែប្រពន្ធកូនចុង និងស្រីកំណាន់ជាច្រើនាក់ទៀត ក៍លោកប្ដី លោកឪ និងលោកបង ប៊ុន សេរី ជួយផ្គត់ផ្គង់ជាលុយកាក់, ជាសម្ផារៈ, ជាផ្ទះល្វែង, ជាមុខរបររកស៊ីផ្សេងៗ ដោយគ្មានការខ្វះខាតអ្វីឡើយ ។ កាលពីប៉ុន្មានខែមុនលោកប៉ា ប៊ុន សេរី បានទិញឡានទំនើបម៉ាក ឡង់រ៉ូវែរសេរីថ្មី តម្លៃរាប់សែនដុល្លារ ឲ្យកូនប្រុសគាត់ឈ្មោះ ប៊ុន រតនៈ ជិះដឹកស្រីស្នេហ៍ដើរលេង… ហើយផឹកស៊ីស្រាស្រវឹង បើកទៅបុកមនុស្សឲ្យស្លាប់ ៣នាក់ និងរងរបួសជាច្រើននាក់ ដោយគ្រាន់តែសង ជាសំណងលុយកាក់ បន្តិចបន្តួចប៉ុណ្ណោះ សម្រាប់អ្នកមានលុយច្រើន តួយ៉ាងដូចលោក ប៊ុន សេរី និងមន្ត្រីៗផ្សេងទៀត ។
ទីបំផុត កូនប្រុសរបស់លោក ប៊ុន សេរី ត្រូវបានដោះលែងឲ្យ មានសេរីភាពឡើងវិញ (ជាការផ្ទុយ ១០០% នឹងច្បាប់រដ្ឋ) ក្រោយពីសមត្ថកិច្ច ចាប់ខ្លួនដាក់គុក មានម៉ាស៊ីនត្រជាក់ និងមានអ្នកបម្រើ ស៊ីឆ្ងាញ់ ដេកស្រួល បានមួយរយៈពេលខ្លីរួចមក ។ ករណីនេះវាខុសគ្នាទាំងស្រុង និងជាគម្លាតមួយ ដូចមេឃ និងដី រវាងជីវភាពរស់នៅ របស់មន្ត្រីៗមានលុយ និងកូនចៅមន្ត្រីៗទាំងនោះ ជាមួយប្រជាពលរដ្ឋទូទៅ ដែលអត់មានលុយកាក់ ឬកូនអ្នកក្រីក្រភាគច្រើន នៅទូទាំងប្រទេស… ដែលបើបានបង្ក គ្រោះថ្នាក់ចរាចរធ្ងន់ធ្ងរ តួយ៉ាងដូចកូនប្រុសលោក ប៊ុន សេរី ម្នាក់នេះ ច្បាស់ជាសមត្ថកិច្ច និងតុលាការស្រុកខ្មែរ ចាប់ខ្លួនកាត់ទោសដាក់គុក ជាច្រើនឆ្នាំតាមច្បាប់កំណត់ ជាក់ជាមិនខានឡើយ ។
ហេតុដូចនេះហើយ បានជាសាធារណជន រង់ចាំមើលបន្តទៀតថា បន្ទាប់ពីលោក អ៊ុក សុផល ត្រូវបានតែងតាំង ជានាយកទីចាត់ការហិរញ្ញវត្ថុ សាលារាជធានីភ្នំពេញ ជំនួសលោក ប៊ុន សេរី… តើគាត់ (អ៊ុក សុផល) នឹងយកតួនាទីនោះ ទៅប្រព្រិត្តអំពើពុករលួយ ពួយរលីងដូចលោក ប៊ុន សេរី ដែរ ឬយ៉ាងណា? មិនពុករលួយសោះ ឬពុករលួយតិចជាង ឬពុករលួយ ដូចតែគ្នា ឬពុករលួយខ្លាំងជាង?
