បច្ចុប្បន្ននេះ លោក ខឹម វិចិត្រា ហៅចិត្រ ជាប្រធានស្នាក់ការ នគរបាលអន្តោប្រវេសន៍ប្រចាំច្រកព្រំដែនទ្វេភាគីជ្រៃធំ ស្ថិតនៅក្នុងស្រុកកោះធំខេត្តកណ្តាល កំពុងមានអំណាចពេញដៃក្នុងការសម្របសម្រួលឲ្យក្រុមឈ្មួញដឹកជញ្ជូនឈើប្រណីតទាំងតាមផ្លូវទឹកនិងតាមផ្លូវគោកចេញទៅស្រុកយួនយ៉ាងអនាធិបតេយ្យបំផុត។ ពេលខ្លះទៀតលោក ខឹម វិចិត្រា ក៏បានប្រើប្រាស់សិទ្ធិអំណាចរបស់ខ្លួនក្នុងការបំពានលើតួនាទីរបស់មន្ត្រីជំនាញដទៃដែលចុះទៅប្រចាំការនៅច្រកព្រំដែនជ្រៃធំទៅតាមអនុក្រឹត្យរបស់រាជរដ្ឋាភិបាល ដែលទាមទារឲ្យអង្គភាពប្រឆាំងអំពើពុករលួយជាពិសេសលោកស្នងការ អ៊ាវ ចំរើន មេត្តាពិនិត្យមើលភាពអសកម្មនិងអំពើពុករលួយរបស់លោក ខឹម វិចិត្រា ឡើងវិញផងដែរ។
មន្ត្រីមួយចំនួនបានបង្ហើបឲ្យដឹងថា លោក ខឹម វិចិត្រា ហៅចិត្រ គឺជាមន្ត្រីដែលពូកែអួតអាងនិងក្រអឺតក្រទមបំផុតចាប់តាំងពីពេលដែលគាត់បានផ្តួលមេចាស់ ហើយកាន់តំណែងជាប្រធាននគរបាលអន្តោប្រវេសន៍ប្រចាំច្រកព្រំដែនទ្វេភាគីជ្រៃធំ គាត់ធ្វើអ្វីៗតាមតែអំពើចិត្តគ្មានក្រែងញញើតពីច្បាប់ទម្លាប់នោះទេ តាមរយៈការឃុបឃិតឲ្យក្រុមឈ្មួញទាំងតូចទាំងធំរកស៊ីនាំចូលទំនិញគេចពន្ធ និងទំនិញខុសច្បាប់មកពីស្រុកយួន ហើយឈើប្រណីតដែលក្រុមឈ្មួញដឹកជញ្ជូនយកទៅលក់នៅស្រុកយួនតាមផ្លូវទឹកដោយឆ្លងកាត់តាមច្រកព្រំដែនជ្រៃធំ ក៏ជាប្រភពសេដ្ឋកិច្ចមិនចេះរីងស្ងួតរបស់លោក ខឹម វិចិត្រា ផងដែរ។ មន្ត្រីក្រោមឱវាទរបស់លោក ខឹម វិចិត្រា មួយចំនួនដែលមិនសូវចេះអែបអបយកចិត្តយកថ្លើមមេការ រកតែលុយចាក់សាំងម៉ូតូជិះទៅធ្វើការ ឬរកលុយធ្វើសោហ៊ុយទៅលេងប្រពន្ធកូនសឹងមិនបានផង ព្រោះតែលោក ខឹម វិចិត្រា ពូកែក្តោបប្រភពចំណូលយកទៅច្រកហោប៉ៅផ្ទាល់ខ្លួន។
ឈ្មួញរកស៊ីដឹកជញ្ជូនឈើខុសច្បាប់ទ្រង់ទ្រាយធំជាងគេប្រចាំច្រកជ្រៃធំនេះ មានឈ្មោះ ហេង ទឹកសុទ្ធ ឬ ហេង ស្ទឹងមានជ័យហើយតាហុង ក៏មានចំណែកដឹកជញ្ជូនឈើយ៉ាងអនាធិបតេយ្យមកពីតាមបណ្តាខេត្តនានា ជាពិសេសមកពីតាមផ្លូវជាតិលេខ៥ បើកឆ្លងកាត់រាជធានីភ្នំពេញ ឆ្ពោះទៅក្រុងតាខ្មៅ ឡើងតាមផ្លូវជាតិលេខ២១បេ ចេញទៅច្រកជ្រៃធំ ដោយគ្មាននរណាហ៊ានហើបមាត់នោះទេ។ មន្ត្រីជំនាញនិងសមត្ថកិច្ចពាក់ព័ន្ធច្រើនស្អេកស្កះត្រូវបានដាក់ឲ្យប្រចាំការឬបង្កើតប៉ុស្តិ៍ជជុះយ៉ាងអនាធិបតេយ្យតាមផ្លូវជាតិលេខ ២១បេបានត្រឹមតែអង្គុយរាប់ក្បាលឡានដឹកឈើយកលុយមិនដែលខ្វល់ខ្វាយពីការបង្ក្រាប បទល្មើសម្តងណាឡើយ ហើយគេដឹងថាឈ្មួញដែលរកស៊ីដឹកជញ្ជូនឈើធំៗទាំងនោះសុទ្ធតែមានទំនាក់ទំនងល្អជាមួយមន្ត្រីជំនាញនិងនគរបាលសេដ្ឋកិច្ចដែលប្រចាំការតាមដងផ្លូវនោះ។
ការដឹកជញ្ជូនកសិផលរបស់ប្រជាពលរដ្ឋចេញទៅស្រុកយួនតាមច្រកជ្រៃធំ ក៏រងនូវការកោសរូសបង្ខំឲ្យបង់លុយពីលោក ខឹម វិចិត្រា ដោយគ្មានការយោគយល់នោះទេ ដូចដែលប្រជាពលរដ្ឋមួយចំនួនបានឲ្យដឹងថា ក្រៅពីប្រធានស្នាក់ការច្រកជ្រៃធំ លោក ទេព សុធី ដែលទើបត្រូវបានតែងតាំងជំនួសលោក រស់ សុធា ដែលត្រូវបានដកចេញពីតំណែងដោយសារតែរឿងអាស្រូវពុករលួយ គាបជំរិតប្រជាពលរដ្ឋរកស៊ីដឹកជញ្ជូនកសិផលចេញទៅស្រុកយួន គឺលោក ខឹម វិចិត្រា ជាអ្នកអនុវត្តន៍ការគាបជំរិតប្រជាពលរដ្ឋ ដោយគ្មានក្រែងញញើត ពីច្បាប់ទម្លាប់អ្វីឡើយ។ សិទ្ធិអំណាចរបស់លោក ខឹម វិចិត្រា ធំណាស់បើទោះបីជាគាត់ស្ថិតនៅក្រោមការគ្រប់គ្រងរបស់ស្នងការដ្ឋាននគរបាលខេត្តកណ្តាលក៏ដោយ គឺគាត់ហ៊ានបំពានទៅលើបទបញ្ជារបស់រដ្ឋាភិបាលដែលបានយោគយល់និងអនុគ្រោះចំពោះពលរដ្ឋដែលរកស៊ី ដឹកជញ្ជូនកសិផលចេញទៅលក់នៅក្រៅប្រទេសគ្មានក្រែងញញើតពីការរឹតបន្តឹងរបស់អង្គភាពប្រឆាំងអំពើពុករលួយនោះទេ។
ប្រជាពលរដ្ឋក៏បានរអ៊ូរទាំផងដែរថា លោក ខឹម វិចិត្រា ក៏បានចាត់តាំងឲ្យមន្ត្រីក្រោមឱវាទរបស់គាត់កោសរូសប្រជាពលរដ្ឋឲ្យបង់លុយនៅពេលមានធុរៈឆ្លងដែនចូលទៅស្រុកយួនតាមច្រកជ្រៃធំ ដោយបង្ខំឲ្យបង់លុយក្នុងម្នាក់ ២ម៉ឺនទៅ៣ម៉ឺនរៀល ចំពោះប្រជាពលរដ្ឋដែលមានលិខិតស្នាមសម្រាប់ឆ្លងដែន ប៉ុន្តែសម្រាប់អ្នកជំងឺដែលត្រូវសង្គ្រោះបន្ទាន់នាំទៅស្រុកយួនតាមច្រកជ្រៃធំ ហើយគ្មានលិខិតស្នាមត្រូវនគរបាលអន្តោប្រវេសន៍របស់លោក ខឹម វិចិត្រា កោសរូសបង្ខំឲ្យបង់លុយចាប់ពី ២០ម៉ឺនរៀល ដល់៣០ម៉ឺនរៀលសម្រាប់អ្នកជំងឺម្នាក់ៗ។ ក្នុងករណីសុំបញ្ចុះតម្លៃលោក ខឹម វិចិត្រា បានឲ្យប្រជាពលរដ្ឋដែលមានធុរៈទាំងនោះឡើងមកសុំលិខិតស្នាមពីថ្នាក់លើនៅស្នងការដ្ឋាននគរបាលខេត្តកណ្តាល ជាការផ្ចាញ់ផ្ចាល់ចំពោះប្រជាពលរដ្ឋយ៉ាងកំរោល ដូច្នេះអំពើពុករលួយរបស់លោក ខឹម វិចិត្រា បានធ្វើឲ្យប្រជាពលរដ្ឋក្រីក្រនៅក្នុងស្រុកស្អាងនិងស្រុកកោះធំត្រូវ រងទុក្ខវេទនាគ្មានទីបញ្ចប់។
ដោយឡែកសម្រាប់ជនជាតិយួន ឲ្យតែមានលុយបង់ឲ្យលោក ខឹម វិចិត្រា ចាប់ពី១០ដុល្លារដល់៣០ដុល្លារ ឡើងទៅអាចឆ្លងដែនចេញចូលប្រទេសកម្ពុជា គ្មាននរណាត្រួតពិនិត្យលិខិតស្នាមនោះទេ ហើយក្នុងមួយថ្ងៃៗគ្រាន់តែជនជាតិយួនដែលញៀនល្បែងស៊ីសងនាំគ្នាមកលេងល្បែងបញ្ជល់មាន់ បៀ អាប៉ោង តៃស៊ីវ នៅក្នុងស្រុកស្អាង និងស្រុកកោះធំ ឬនៅក្នុងកាស៊ីណូជាប់ព្រំដែន មានចំនួនរាប់រយនាក់សុទ្ធតែត្រូវបង់លុយឲ្យមន្ត្រីនគរបាលអន្តោប្រវេសន៍របស់លោក ខឹម វិចិត្រា តិចបំផុត២ម៉ឺនរៀល ដល់៤ម៉ឺនរៀល។
ក្នុងតំណែងជាប្រធាននគរបាលអន្តោប្រវេសន៍ប្រចាំច្រកព្រំដែនទ្វេភាគីជ្រៃធំ លោក ខឹម វិចិត្រា មានការផ្លាស់ប្តូរជីវភាពថ្មីយ៉ាងឆាប់រហ័សផ្តើមចេញពីអំពើពុករលួយនៃការបង្ខំឲ្យអ្នកដំណើរឆ្លងដែនបង់លុយ ក៏ដូចជាការឃុបឃិតជាមួយក្រុមឈ្មួញរកស៊ីដឹកជញ្ជូនឈើខុសច្បាប់យ៉ាងអនាធិបតេយ្យមិនខ្វល់ពីបទបញ្ជា ០០២របស់រាជរដ្ឋាភិបាលនោះទេ ដូច្នេះសូមលោកស្នង ការ អ៊ាវ ចំរើន ពិនិត្យមើលភាពអសកម្មនិងភាពអនាធិបតេយ្យនៃការដឹកជញ្ជូនឈើខុសច្បាប់តាមច្រកព្រំដែនជ្រៃធំឡើងវិញផង។ ជាមួយគ្នានេះអង្គភាពប្រឆាំងអំពើពុករលួយមិនត្រូវបណ្តោយឱ្យខឹម វិចិត្រា ធ្វើអ្វីៗស្រេចតែអំពើចិត្តតទៅទៀតនោះទេ៕
