ខេត្ដកោះកុង ៖ ក្នុងដែនសមុទ្រខ្មែរខេត្ដកោះកុងបានក្លាយទៅជាតំបន់នេសាទយ៉ាងអានាធិបតេយ្យគ្មានច្បាប់ទម្លាប់ពីអ្នកនេសាទជនជាតិថៃ ក្នុងមួយយប់ៗបានប្រមួលផលនេសាទ រាប់ពាន់តោនពីសមុទ្រខ្មែរ ក្រោមអំណាចអាជ្ញាធរខេត្តកោះកុង
មានសេចក្តីរាយការណ៍មកថា ពាក់ព័ន្ធនឹងសកម្មភាពនេសាទខុសច្បាប់ភ្លូកទឹកភ្លូកដីរបស់ជនជាតិថៃរាប់សិបឆ្នាំមកហើយនេះ គឺស្ថិតក្រោមការចាត់ចែងយ៉ាងស្ងាត់ស្ងៀមរបស់ លោក ឡេង ប៊ុណ្ណាត ដែលជាមន្ត្រី ទទួល បន្ទុកការចុះបញ្ជីទូកនេសាទ និងជាប្រធានផ្នែកហេរញ្ញិក ហើយគាត់ជាមនុស្សជំនឹតបំផុត របស់លោក ប៊ុន លើត ជាអភិបាលខេត្ដ កោះ កុងជាអ្នកគ្រប់គ្រងប្រមូលលុយ ទាំងអស់ពីការនេសាទទាំងនោះ ដែលគេមានការសង្ស័យថាជាសកម្មភាពពុករលួយ ។
ប្រភពរាយការណ៍ឲ្យដឹងថា កាលពី ចុងខែវិច្ឆិកា ឆ្នាំ២០០៩ មានការសម្រេច បង្កើតគណៈកម្មការបង្ក្រាបបទល្មើសនានា និងត្រួតពិនិត្យការពារការនេសាទក្នុង ដែនសមុទ្រ ខេត្ដកោះកុង តាមបណ្ដោយ ព្រំដែនសមុទ្រ កម្ពុជា-ថៃដែលក្នុងនោះ បែងចែកតួនាទីការងារយ៉ាងច្បាស់លាស់ ប៉ុន្ដែសមាជិកនិងថ្នាក់ដឹកនាំគណៈកម្ម ការមួយនេះមិនគោរពតាមបទបញ្ជា របស់ថ្នាក់លើនោះទេ ។
គណៈកម្មការបង្ក្រាបបទល្មើសលើផ្ទៃសមុទ្រក្នុងខេត្ដកោះកុងនេះ ស្ថិតក្រោម ការគ្រប់គ្រងដោយផ្ទាល់របស់លោក ប៊ុន លើត អភិបាលខេត្ដកោះកុង មិនបានយកចិត្ដទុកដាក់បង្ក្រាបបទល្មើសការដឹក ជញ្ជូនទំនិញគេចពន្ធ ក៏ដូចការឆ្លងដែនចូលមកសមុទ្រកម្ពុជាមក នេសាទល្មើសច្បាប់ ប្រព្រឹត្ដដោយទូកនេសាទថៃនោះទេ។ ហើយជាធម្មតាទូកនេសាទរបស់ជនជាតិថៃត្រូវបានគេផ្តល់សិទ្ធិឲ្យចូលមកនេសាទយ៉ាង អនាធិបតេយ្យលើផ្ទៃសមុទ្រខ្មែររយៈពេល៤ទៅ៥ថ្ងៃម្ដង ត្រូវចូលខ្លួនទៅបង់លុយឲ្យគណៈកម្មការនេះម្ដងទៅតាមគោលការណ៍ដែលគេធ្លាប់ធ្វើកន្លងមក ។
ជាទម្លាប់គណៈកម្មការនោះគ្រប់គ្រងដោយលោក ប៊ុន លើត នេះបានកោះហៅស្ថាប័នពាក់ព័ន្ធជាសមាជិកមកប្រជុំនៅសាលាខេត្ដរយៈពេល ៤-៥ថ្ងៃម្ដងដូចគ្នា ដើម្បីសម្រេចបែង ចែកប្រាក់ចំណូលទាំងនោះទៅកាន់មន្ដ្រីជំនាញពាក់ព័ន្ធទាំង១៣ស្ថាប័ន ។ ដល់ពេលយូរៗទៅគណៈកម្មការនេះស្ទើរតែស្ថិតក្រោមការគ្រប់គ្រងរបស់មនុស្ស ២នាក់ គឺលោកប៊ុន លើត ជាអភិបាល ខេត្ដកោះកុង និងលោកឡេង ប៊ុណ្ណាត ដែលជាអ្នកចុះបញ្ជីទូកនេសាទ និងជា ប្រធានផ្នែកហេរញ្ញិកប្រចាំសាលាខេត្ដកោះកុង។
ប្រភពបន្ដថានៅលើ ផ្ទៃសមុទ្រខេត្ដកោះកុងនៅពេលថ្ងៃមានទូកនេសាទ ជនជាតិខ្មែរតិចតួចប៉ុណ្ណោះ ប៉ុន្ដែនៅពេលយប់ឡើង មានទូកនេសាទ របស់ជនជាតិថៃប្រើឧបករណ៍ល្មើសច្បាប់ចូលមកចាប់ត្រីភ្លឺចិញ្ចែងចិញ្ចាច គ្មាននរណាអើពើបង្ក្រាបទេព្រោះវាជាប្រភពចំណូលដ៏សម្បើមអាចប្រមូលយកមកចែកគ្នាធ្វមានធ្វើបាន យ៉ាងសុខស្រួល គ្មានថ្នាក់លើណាទប់ស្កាត់នោះទេ។
ទូកអូសគូមួយគ្រឿងរបស់ជនជាតិថៃ ដែលចូលមកធ្វើការនេសាទ ដោយប្រើឧបករណ៍ល្មើសច្បាប់ យ៉ាងអនាធិបតេយ្យលើផ្ទៃសមុទ្រខេត្ដ កោះកុងក្រោមការបង់លុយជូនលោក ឡេង ប៊ុណ្ណាត យ៉ាងហោចណាស់មួយខែ២ម៉ឺន ៤ម៉ឺន និង៦ម៉ឺនបាតអាស្រ័យទៅតាម ប្រភេទទូកតូចឬធំ និងកម្លាំងម៉ាស៊ីន ហើយទូកថៃចូលមកនេសាទខុសច្បាប់នោះមានរាប់រយគ្រឿឯណោះ។ ជាមួយនឹងសិទ្ធអំណាច លោកឡេង ប៊ុណ្ណាត បានចុះបញ្ជី ទូកនេសាទរបស់ជនជាតិថៃដោយ បន្លំស្លាកលេខទូក មានការចុះស្លាកលេខជាន់គ្នា ដែលធ្វើឲ្យបាត់ចំណូល ពន្ធរដ្ឋ ។
ស្ថាប័នអង្គភាពដទៃៗជាសមាជិកយូរៗទៅ មិនសូវទទួលបាន ចំណែកពីគណៈកម្មការនេះទេ ដែលធ្វើឲ្យពួកគេបានបែកគំនឹតទៅធ្វើជាខ្នងបង្អែក កាងទូកនេសាទរបស់ជនជាតិថៃល្មើសច្បាប់ម្នាក់ៗ ៤ទៅ៥ទូកដើម្បីបានចំណូលផ្ទាល់ខ្លួន ដែលធ្វើឲ្យបញ្ហានេះកាន់តែកើតឡើងនូវភាពអនាធិបតេយ្យយ៉ាងធ្ងន់ធ្ងរ និងធ្វើឲ្យផលនេសាទសមុទ្ររងការមហន្តរាយ ហើយរដ្ឋក៏បាត់ថវិកាចំណូលរដ្ឋ ដោយសារតែគណៈកម្មការបង្ក្រាបបទល្មើសលើផ្ទៃសមុទ្រក្នុងខេត្ដកោះកុងអនុវត្តការងារ គ្មានតម្លាភាព។
