ប៉ោយប៉ែត៖ សិប្បកម្មស្លយកសំណរអាគុយចាស់ៗមួយកន្លែងដែលគេប្រមូលទិញពីប្រទេសថៃយកមកពុះហើយបង្ហូរទឹកអាស៊ីតយកសំណរមកស្លប្រមូលផ្តុំដើម្បីនាំចេញដែលមានទីតាំងស្ថិតនៅក្នុងភុមិសាស្ត្រភូមិទួលប្រាសាទសង្កាត់ ក្រុងប៉ោយប៉ែត ខេត្ត បន្ទាយមានជ័យ មានចម្ងាយប្រហែលជា១០០ម៉ែត្រពីទំនប់ក៥ ដែលបច្ចុប្បន្ននេះកំពុងតែបង្កើតខ្លិនអាស៊ីតនិងសំណរបំពុលបរិស្ថាននិងសាយភាយសារជាតិវិទ្យុសកម្មធ្វើឱ្យប៉ះពាល់ដល់សុខភាពប្រជាពលរដ្ឋប្រមាណជា៥០០គ្រួសារដែលមានលំនៅដ្ឋានក្បែរៗនោះ ដោយពុំដែលឃើញមានមន្ត្រីបរិស្ថានណាម្នាក់ចុះមកធ្វើការត្រួតពិនិត្យឬធ្វើការហាមឃាត់ឱ្យបញ្ឈប់នោះទេ បើតាមច្បាប់កាកសំណល់ដូចជាថ្មពិលចាស់ អាគុយចាស់ គឺសុទ្ធតែហាមឃាត់មិនឱ្យនាំចូលពីបរទេសនិងហាមការយកមកដាក់នៅលើដីក្នុងប្រទេសកម្ពុជា ដូចជានៅឆ្នាំណានោះមានបញ្ហារនៅក្រុងកំពង់សោម ដែលមន្ត្រីជាអ្នកអនុញ្ញាតិឱ្យនាំចូលពេលនោះទទួលរងការផ្តន្ទាទោសនិងអ្នកខ្លះត្រូវបានដកហូតមុខតំណែង។
តាមប្រភពពីប្រជាពលរដ្ឋរស់នៅតំបន់នោះបានលើកឡើងថាសិប្បកម្មនេះគឺជាកម្មសិទ្ធរបស់ឯក ឧត្តម សាន តេង ទីប្រឹក្សាសម្តេចពញាចក្រី ហេង សំរិន ប្រធានរដ្ឋសភាជាតិ និងជាប្អូនបង្កើតលោកឧកញ៉ា សាន ស៊ាងហូ ដែលអតីតជាមេឃុំប៉ោយប៉ែត ពលរដ្ឋបានបន្តរថា ជារៀងរាល់ថ្ងៃក្លិនអាស៊ីត និងសំណរបានជះចូលពេញភូមិ អ្នកណាម្នាក់ក៍បានស្រូបយកក្លិននោះដែរ តែមិនដឹងធ្វើម៉េចបើផ្ទះនៅទីនោះគ្មានលុយដើម្បីរើចេញ គាត់បន្តរថាតាំងពីហឹតក្លិននឹងមក សុខភាពដូចជាចុះខ្សោយ ហើយមានស្នាមកន្ទួលៗនៅលើស្បែក ហើយរមាស់ និងខ្សោយកម្លាំង។
បញ្ហារនេះប្រជាពលរដ្ឋបានស្នើដល់ក្រសួងបរិស្ថានគួរតែទៅពិនិត្យដោយយកចិត្តទុកដាក់ដើម្បីការពារដល់សុខភាពប្រជាពលរដ្ឋនៅទីនោះ ព្រោះបើបណ្តោយឱ្យបន្តរទៅទៀតវាគឺជាការនាំជម្ងឺមកឱ្យប្រជាពលរដ្ឋនិងប៉ះពាល់ដល់ច្បាប់ដែលហាមឃាត់។ ករណីខាងលើនេះយើងមិនអាចទាក់ទងសុំការបំភ្លឺពីម្ចាស់សិប្បកម្មបានទេព្រោះគ្មានលេខទូរសព្ទ័ ចំណែកលោកប្រធានមន្ទីរបរិស្ថានក៍ពុំអាចទាក់ទងបានដែរ៕
