ខេត្តបន្ទាយមានជ័យ៖ ក្នុង មួយ ថ្ងៃៗ មានរថយន្ត ដឹកទំនិញ បើកបរ ឆ្លង កាត់ កំណាត់ ផ្លូវ ជាតិ លេខ៥ ចាប់ ពី ទី រួម ខេត្ត បន្ទាយ មានជ័យ ទៅកាន់ក្រុង ប៉ោយប៉ែត រាប់រយ រាប់ពាន់ គ្រឿងសុទ្ធ តែផ្ទុកលើសទម្ងន់ ហើយស្ថានីយ៍ថ្លឹង រថយន្តនៅ ចំណុច កូន ដំរី ស្ថិត នៅសង្កាត់ និម្មិត ក្រុងប៉ោយប៉ែត ក្រោម ការគ្រប់គ្រង ដោយ ផ្ទាល់របស់ លោកព្រំ វីរៈ ជាអនុប្រធាន មន្ទីរ សាធារណការ ខេត្ត បន្ទាយ មាន ជ័យ មិនដែល មានវិធានការទប់ស្កាត់ការដឹកជញ្ជូនលើសទម្ងន់ម្តងណាឡើយគឺលោកព្រំ វីរៈ បាន ត្រឹមតែចាត់តាំង មន្ត្រី ក្រោមឱវាទដែលប្រចាំការនៅចំណុចជញ្ជីងនោះ ឲ្យចាំប្រមូលលុយពីរថយន្តដឹកលើសទម្ងន់យកទៅ ច្រក ហោប៉ៅ ធ្វើ មាន ធ្វើ បានផ្ទាល់ខ្លួននិងបន្តវេចខ្ចប់យកទៅបែងចែកជូនលោកគឹម សុវណ្ណ ដែលជាប្រធានមន្ទីរដើម្បីធ្វើឲ្យអ្វីៗមានភាពរលូនល្អ។
ប្រជាពលរដ្ឋបានរាយការណ៍ថាស្ថានីយ៍ជញ្ជីងថ្លឹងរថយន្តនៅកូនដំរីមិនបានអើពើបង្ក្រាបទប់ស្កាត់សកម្មភាពរថយន្តដឹកជញ្ជូនទំនិញលើសទម្ងន់នោះទេហើយលោកព្រំ វីរៈដែលមានសិទ្ធិអំណាចគ្រប់គ្រងស្ថានីយ៍ថ្លឹងរថយន្តនេះដោយផ្ទាល់គឺជាកំពូលជនពុករលួយបានចាត់តាំងមន្ត្រីជំនិតៗរបស់ខ្លួនឲ្យចាំរាប់ក្បាលឡានយកលុយទៅតាមតម្លៃដែលបានកំណត់ដូច្នេះហើយបានជាគេ សង្កេតឃើញថារថយន្តដឹកទំនិញផ្ទុកលើសទម្ងន់រាប់រយរាប់ពាន់គ្រឿងបានឈប់បន្តកន្ទុយគ្នាចូលបង់លុយថ្លៃក្បាលឡាននៅពេលពួកគេបើកបរឆ្លងកាត់ជញ្ជីងថ្លឹងរថយន្តផ្ទុកលើសទម្ងន់នៅចំណុចកូនដំរីមិនដែលមានផលរមាស់អ្វីឡើយ។
នៅចំណុចជញ្ជីងថ្លឹងរថយន្តនេះផងដែរគេសង្កេតឃើញមានមន្ត្រីជំនាញមកពីក្រសួងសាធារណការទទួលបន្ទុកការងារបច្ចេកទេសនិងមន្ត្រីកងរាជអាវុធហត្ថមន្ត្រីនគរបាលរួមទាំងតំណាងសាលាខេត្តបន្ទាយមានជ័យប៉ុន្តែលោកព្រំ វីរៈមានសិទ្ធិក្តោបក្តាប់សមត្ថកិច្ចចម្រុះទាំងនោះហើយក៏ជាអ្នកបែងចែកលាភសក្ការៈទៅឲ្យផ្នែកពាក់ព័ន្ធយ៉ាងរលូនផងដែរ។
ក្រុមជំនាញបច្ចេកទេសមកពីក្រសួងសាធារណការដែលប្រចាំការនៅចំណុចជញ្ជីងថ្លឹងរថយន្តកូនដំរីមានចំនួន៣នាក់ក្រោមការគ្រប់គ្រងរបស់លោកម៉ៅ រស់ប៉ុន្តែគេដឹងថាលោកព្រំ វីរៈមានកិច្ចសហការយ៉ាងស្អិតរមួតជាមួយលោកម៉ៅ រស់ក្នុងការឃុបឃិតគ្នាប្រមូលលុយពីរថយន្តដឹកជញ្ជូនលើសទម្ងន់មិនដែលខ្វល់ខ្វាយពីការបង្ក្រាបទប់ស្កាត់ឲ្យស្របតាមបទបញ្ជារបស់ថ្នាក់លើម្តងណាឡើយ។
វាគ្មានអ្វីលាក់បាំងនោះទេនៅពេលដែលលោកម៉ៅ រស់និងលោកព្រំ វីរៈត្រូវដៃត្រូវជើងគ្នាប្រមូលក្រុមឈ្មួញរកស៊ីដឹកទំនិញតាមរថយន្តខ្សែឲ្យចូលបង់លុយប្រចាំខែប្រចាំជើងជាថ្នូរនៃការមិនត្រួតពិនិត្យការដឹកជញ្ជូនលើសទម្ងន់។ជាធម្មតាគ្រប់រថយន្តយីឌុបដឹកទំនិញនិងក្រួសថ្មខ្សាច់ឆ្លងកាត់ជញ្ជីងថ្លឹងរថយន្តកូនដំរីផ្ទុកទម្ងន់ចាប់ពី៥០តោនដល់៦០តោនគឺពួកគេមិនចាំបាច់ចូលជញ្ជីងថ្លឹងរថយន្តនោះទេដោយគ្រាន់តែចូលបង់លុយឲ្យក្រុមមន្ត្រីដែលប្រចាំការនៅជញ្ជីងថ្លឹងរថយន្តនោះចាប់ពី១០ម៉ឺនរៀលទៅ២០ម៉ឺនរៀលសម្រាប់ការដឹកជញ្ជូនលើសទម្ងន់១ជើង។
គេនៅចាំបានថាលោកយឹម ឆៃលីធ្លាប់បានចុះណែនាំផ្សព្វផ្សាយបទបញ្ជារបស់រាជរដ្ឋាភិបាលក្នុងការបង្ការបង្ក្រាបទប់ស្កាត់ការដឹកជញ្ជូនលើសទម្ងន់ដើម្បីថែរក្សាផ្លូវស្ពានប្រើប្រាស់យូរអង្វែងដែលក្នុងនោះលោកគឹម សុវណ្ណនិងលោកព្រំ វីរៈត្រូវយកចិត្តទុកដាក់បង្ក្រាបការទប់ស្កាត់ការដឹកជញ្ជូនលើសទម្ងន់ឲ្យមានប្រសិទ្ធភាពប៉ុន្តែគេមិនដែលឃើញលោកព្រំ វីរៈអនុវត្តន៍តាមបទបញ្ជាថ្នាក់លើនោះទេគឺសុខស្រួលក្នុងការប្រមូលលុយពីការដឹកជញ្ជូនលើសទម្ងន់មិនខ្វល់ខ្វាយពីការបង្ក្រាបម្តងណាឡើយហើយផលប្រយោជន៍ដែលប្រមូលបានលោកព្រំ វីរៈចេះចាត់ចែងវេចខ្ចប់យកទៅបង់ជូនលោកគឹម សុវណ្ណដែលជាប្រធានមន្ទីរទើបអ្វីៗអាចរលូនល្អដោយគ្មានឧបសគ្គ។
យ៉ាងណាក៏ដោយគេចង់ឃើញរាជរដ្ឋាភិបាលកម្ពុជាយកចិត្តទុកដាក់ត្រួតពិនិត្យមើលភាពអសកម្មរបស់លោកព្រំ វីរៈនិងលោកគឹម សុវណ្ណ ឡើងវិញផងព្រោះផ្លូវចន្លោះពីទីរួមខេត្តបន្ទាយមានជ័យទៅកាន់ក្រុងប៉ោយប៉ែតដែលត្រូវបានស្ថាបនាក្រោមប្រាក់កម្ចីពីបរទេសកំពុងខូចខាតប្រេះស្រុតជាច្រើនកន្លែងដូចដែលប្រជាពលរដ្ឋមួយចំនួនបានលើកឡើងថាការដឹកជញ្ជូនលើសទម្ងន់របស់ក្រុមឈ្មួញធំៗបូករួមជាមួយអំពើពុករលួយរបស់មន្ត្រីដែលប្រចាំការនៅជញ្ជីងថ្លឹងរថយន្តកូនដំរីកំពុងបង្កផលលំបាកធ្ងន់ធ្ងរគំរាមកំហែងដល់ផ្លូវជាតិលេខ៥ដែលទើបតែស្ថាបនាបានរួចរាល់ក៏រងនូវការខូចខាតប្រេះស្រាំទៅវិញ។
គេកំពុងតាមដានយ៉ាងយកចិត្តទុកដាក់ថាតើអង្គភាពប្រឆាំងអំពើពុករលួយនិង លោកគោ ស៊ុំសារឿត ដែលជាអភិបាលខេត្តបន្ទាយមានជ័យនឹងចាត់វិធានការដូចម្តេចចំពោះភាពអសកម្មនៃក្រុមជញ្ជីងថ្លឹងរថយន្តនៅចំណុចកូនដំរីដែលកំពុងប្រព្រឹត្តអំពើពុករលួយបែបជាប្រព័ន្ធយ៉ាងចំហនេះ៕
