ក្រុមអ្នកនិពន្ធសារព័ត៌មាន នៅព្រឹកថ្ងៃចន្ទនេះ ជំរុញឲ្យរាជរដ្ឋាភិបាលអាណត្តិថ្មី ធ្វើកំណែទម្រង់ និងអនុវត្តឲ្យបានម៉ឺងម៉ាត់ នូវកម្មវិធីគោលនយោបាយនានា ជាពិសេស កិច្ចសហការជាមួយបណ្តាញសារព័ត៌មាន ឲ្យមានអព្យាក្រឹត្យភាព សម្រាប់ការដឹកនាំរយៈពេល ៥ឆ្នាំខាងមុខ ដើម្បីឆ្លើយតបទៅនឹងតម្រូវការប្រជាពលរដ្ឋ។
ការជំរុញនេះ ធ្វើឡើងក្នុងវេទិកាអ្នកនិពន្ធសារព័ត៌មាន ក្រោមប្រធានបទ សម្លឹងមើលប្រទេសកម្ពុជានៅក្នុងរយៈពេល ៥ឆ្នាំខាងមុខ ក្រោមការដឹកនាំនៃរាជរដ្ឋាភិបាលថ្មី ក្រោមការរៀបចំរបស់ក្លឹបអ្នកកាសែតកម្ពុជា។
ប្រធានក្លឹបអ្នកកាសែតកម្ពុជា លោក ប៉ែន សមិទ្ធិ មានប្រសាសន៍ថា ការប្តេជ្ញាធ្វើកំណែទម្រង់បែបស៊ីជម្រៅរបស់រដ្ឋាភិបាល សម្រាប់អាណត្តិទី៥នេះ គឺឆ្លុះបញ្ចាំងពីដំណើរវិជ្ជមានមួយរបស់កម្ពុជា ឆ្ពោះទៅរកលទ្ធិប្រជាធិបតេយ្យ ខណៈដែលសំឡេងគាំទ្រគណបក្សប្រឆាំង បានស្ទុះឡើងគួរឲ្យកត់សំគាល់ ដែលបង្ហាញពីឆន្ទៈរបស់ប្រជាពលរដ្ឋ ទាមទារនូវការផ្លាស់ប្តូរ។ ត្រង់ចំណុចនេះ លោកសង្កត់ធ្ងន់ថា ប្រព័ន្ធផ្សព្វផ្សាយព័ត៌មានឯករាជ្យ គប្បីបំពេញតួនាទី នៅក្រៅការគ្រប់គ្រងរបស់រាជរដ្ឋាភិបាល ៖
និពន្ធនាយកវិទ្យុបារាំងអន្តរជាតិ លោក ប៉ែន បូណា សាទរចំពោះការជំរុញថ្មីរបស់រាជរដ្ឋាភិបាល គណបក្សប្រជាជនកម្ពុជា ឲ្យមន្ត្រីក្រោមឱវាទ តាមដានព័ត៌មាន និងសហការជាមួយអ្នកសារព័ត៌មាន ដើម្បីឆ្លើយតបទៅនឹងប្រតិកម្មរបស់សាធារណជន។ ជាមួយគ្នានេះ លោកយល់ថា ស្ថាប័នសារព័ត៌មានខ្លួនឯងផ្ទាល់ គឺគប្បីធ្វើកំណែទម្រង់ដើម្បីបង្ហាញពីឯករាជ្យភាពនៃគុណភាពព័ត៌មានរបស់ខ្លួន ប្រកបដោយគុណភាព វិជ្ជាជីវៈ និងតុល្យភាពត្រឹមត្រូវ ៖
និពន្ធនាយកកាសែតភ្នំពេញប៉ុស្តិ៍ភាសាខ្មែរ លោក កៃ គឹមសុង យល់ឃើញថា ច្បាប់ស្តីពីសិទ្ធិទទួលបានព័ត៌មាន គឺជាគន្លឹះសំខាន់ ដែលរដ្ឋាភិបាលគប្បីពិចារណាជំរុញបន្ថែម ក្នុងអាណត្តិថ្មីនេះ ដើម្បីឲ្យវិស័យនេះ កាន់តែទូលំទូលាយ និងប្រកបដោយប្រសិទ្ធិភាព ៖
ក្រោយពីកិច្ចប្រជុំគណៈរដ្ឋមន្ត្រី បង្កើតរដ្ឋាភិបាលថ្មី ដោយសមាជិកគណបក្សប្រជាជនកម្ពុជា តែមួយបក្សអស់ពេលជាង ៦ម៉ោង កាលពីថ្ងៃទី២៥ ខែកញ្ញា សង្គមស៊ីវិលបានសម្តែងការខកចិត្ត ខណៈដែលរដ្ឋាភិបាលកម្ពុជាអាណត្តិទី៥នេះ មានការកែទម្រង់ច្រើននៅក្នុងវិស័យផ្សេងៗ ប៉ុន្តែនៅក្នុងគោលនយោបាយ ថ្នាក់ជាតិរួមនោះ គេមិនឃើញមានដាក់ចេញពីការបង្កើតឲ្យមានច្បាប់ ស្តីពីសិទ្ធិទទួលបានព័ត៌មាននោះទេ៕
