សេចក្តីរាយការណ៍ពីខេត្តមណ្ឌលគិរី បានឲ្យដឹងថា ក្នុងភូមិសាស្ត្រស្រុកកែវសីមា និងស្រុកកោះញែក នៅតែមានសកម្មភាពលួចនាំឈើប្រណីតចេញទៅស្រុកយួនយ៉ាងគគ្រឹកគគ្រេង ដឹកជញ្ជូនតាមរថយន្តយីឌុប និងរថយន្តកែច្នៃ ឆ្លងកាត់ព្រំដែនគ្មានការក្រែងញញើតអ្វីនោះទេ ហើយលោក តូច យន់ ជាស្នងការរងទទួលបន្ទុកការងារព្រំដែនមានសិទ្ធិធំធេងក្នុងការបង្ក្រាបឬបិទភ្នែកឲ្យក្រុមឈ្មួញនាំចេញឈើខុសច្បាប់គ្មាននរណាហ៊ាន មាត់ឡើយ ។
ហើយពេលខ្លះទៀតលោក តូច យន់ ដើរតួជានគរបាលយុត្តិធម៌ផង ជាតុលាការផង តាមរយៈការចាប់ឡានដឹកឈើ ហើយគោះយកលុយស្ងាត់ៗក៏ដោះលែងទៅវិញ មិនដែលខ្វល់ខ្វាយពីសេចក្តីណែនាំ របស់អភិបាលខេត្តលោក អេង ប៊ុនហៀង ដែលតែងតែប្រាប់ឲ្យសមត្ថកិច្ចគ្រប់ជំនាញជាន់ថ្នាក់ទាំងអស់ សហការជាមួយព្រះរាជអាជ្ញាក្នុងការបង្ក្រាបបទល្មើស ឬការដោះលែងវត្ថុតាងនៃបទល្មើសទេ។
រឿងដែលលោកស្នងការរង តូច យន់ ធ្លាប់បានប្រព្រឹត្តក្នុងការប្រមូលផលប្រយោជន៍ពីការដឹកជញ្ជូនឈើខុសច្បាប់ចេញទៅស្រុកយួនឡើងដុះស្លែទៅហើយនោះ នៅតែអនុវត្តន៍ដដែលគ្មានការកែទម្រង់នោះទេ ជាពិសេសការណែនាំរបស់លោក អេង ប៊ុនហៀង ជាអភិបាលខេត្តមណ្ឌលគិរី ត្រូវបានលោកស្នងការរង តូច យន់ យកទៅទ្រាប់អង្គុយមិនដែលអនុវត្តន៍តាមទេហើយ ឃុបឃិតបិទភ្នែកឲ្យក្រុមឈ្មួញនាំចេញឈើខុសច្បាប់យ៉ាងគគ្រឹកគគ្រេង ដោយប្រើប្រាស់ស្បែកនិងតួនាទីជានគរបាល។
គេចង់ឃើញលោក ញែម វ៉ាន់នី ចាត់វិធានការស៊ើបអង្កេត ដើម្បីរាយការណ៍មកក្រសួងមហាផ្ទៃពាក់ព័ន្ធភាពអសកម្មរបស់លោកស្នងការរង តូច យន់ ប្រសិនបើគ្មានការជំពាក់ជំពិនជាមួយបញ្ហាផលប្រយោជន៍ណាមួយទេនោះ ប៉ុន្តែគេជឿថា ភាពស្ងៀមស្ងាត់របស់លោក ញ៉ែម វ៉ាន់នី ពោរពេញដោយអាថ៌កំបាំង ទំនងជាផលប្រយោជន៍ដែលលោក តូច យន់រកបានមានការបែងចែកជូនលោក ញែម វ៉ាន់នី ខ្លះដែរហើយមើលទៅ ទើបអ្វីៗមានភាពស្ងៀមស្ងាត់និងរលូនល្អបែបនេះ។
ក្រុមឈ្មួញរកស៊ីដឹកជញ្ជូនឈើមិនចង់ឲ្យមានឧបសគ្គតាមដងផ្លូវ បានពឹងអាស្រ័យឲ្យលោក តូច យន់ ជួយរត់ការសម្របសម្រួលបើកផ្លូវ សម្រាប់ជំនួញឈើខុសច្បាប់របស់ ពួកគេព្រោះលោក តូច យន់ មាន ស្នាដៃល្អ បើគាត់យល់ព្រមរត់ការឲ្យឈ្មួញណាម្នាក់ហើយនោះការ ដឹកជញ្ជូនឈើនឹងរលូនល្អ គ្មាន ឧបសគ្គទេ ហើយចំណាយប្រាក់ អស់តិចផងដែរ។ យូរៗទៅលោក តូច យន់ ក៏បានបែកគំនិតរកស៊ី ដឹកជញ្ជូនឈើផ្ទាល់ខ្លួនចេញទៅ ស្រុកយួន បន្ថែមពីលើអាជីពជាអ្នកររត់ការឈើខុសច្បាប់ដែរ៕
