លោក ប៉ុល សៀង ជាប្រធានការិយាល័យរដ្ឋបាលសរុបនៃនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានក្លាយជាមន្ត្រីរីកមុខគ្រប់រដូវទោះជាមានការដោះដូរប្រធាននាយកដ្ឋានប៉ុន្មានជំនាន់រួចហើយក៏ដោយ ក៏លោក ប៉ុល សៀង នៅតែមានសិទ្ធិអំណាចកាន់ការងារផ្នែកចាត់តាំង ប្រមូលលុយពីនគរបាលសេដ្ឋកិច្ចដែលត្រូវចុះប៉ុស្តិ៍តាមផ្លូវជាតិ តាមខេត្តនិងតាមផែស្ងួតជាដើមឲ្យបង់លុយទៅតាមចំនួនដែលបានកំណត់សម្រាប់ការទិញប៉ុស្តិ៍ជាថ្នូរនៃការទទួលបានលិខិតបេសកកម្មរយៈពេល៣ខែម្តង។ ចង់មន្ត្រីនគរបាលសេដ្ឋកិច្ចអស់ទាំងនោះធ្វើអ្វីក៏ធ្វើទៅឲ្យតែបានលុយយកមកបង់ជូនថ្នាក់លើឲ្យគ្រប់ចំនួននិងទៀងទាត់ពេលវេលា បង្កទៅជាភាពអនាធិបតេយ្យនាំឲ្យមានការរិះគន់យ៉ាងខ្លាំងក្លាពីក្រុមអ្នករកស៊ីដឹកទំនិញក៏ដូចជាប្រជាពលរដ្ឋ ហើយមិនដឹងមកពីខាងណាខ្លះទេ ព្រោះគ្រាន់តែនគរបាលសេដ្ឋកិច្ចត្រូវបង់ដល់ទៅ៣ជាន់ឯណោះ។
ក្រុមអ្នករកស៊ីដឹកជញ្ជូនទំនិញបានឲ្យដឹងថា រាល់ថ្ងៃពួកគាត់ដឹកទំនិញឬកសិផលចេញទៅលក់នៅស្រុកយួន ក៏ដូចជាទំនិញនាំចូលមកលក់ចែកចាយក្នុងប្រទេសកម្ពុជា ត្រូវជំនាញគយបង្គាប់ឲ្យបង់ពន្ធទៅតាមច្បាប់ដែលបានកំណត់ ក៏ត្រូវតែបង់លុយឲ្យប៉ុស្តិ៍ជជុះរបស់សមត្ថកិច្ចនៅជាប់ព្រំដែន មិនតិចជាង១០កន្លែងនោះទេ ហើយពេលដឹកជញ្ជូនទំនិញចូលមកដល់ក្នុងប្រទេសកម្ពុជា ត្រូវបង់លុយឲ្យនគរបាលសេដ្ឋកិច្ចប្រចាំខេត្តនីមួយៗ ប្រសិនបើឆ្លងកាត់៣ខេត្ត គ្រាន់តែបង់ឲ្យនគរបាលសេដ្ឋកិច្ចខេត្តចំនួន៣កន្លែងបាត់ទៅហើយ នៅសល់នគរបាលសេដ្ឋកិច្ចក្រសួង ក៏មាន៣កន្លែង គឺទី១ នគរបាលសេដ្ឋកិច្ចកាន់ផ្នែកទំនិញ ហើយនគរបាលសេដ្ឋកិច្ចក្រសួង ដែលកាន់ផ្នែកបទល្មើសព្រៃឈើ ក៏មកទារលុយពីឡានដឹកទំនិញ ជាពិសេសនគរបាលសេដ្ឋកិច្ចក្រសួងដែលចុះតាមផ្លូវជាតិ ក៏ត្រូវបង់លុយសឹងតែវ័ណ្ឌកទៅហើយ។ ដូចដែលក្រុមអ្នករកស៊ីដឹកទំនិញមួយចំនួនបានលើកឡើងថា គ្រាន់តែបង់លុយឲ្យប៉ុស្តិ៍ជជុះតាមផ្លូវរាប់សិបកន្លែង ពេលនាំទំនិញមកដាក់លក់តាមហាងតាមផ្ទះ មាននគរបាលសេដ្ឋកិច្ចមួយក្រុមទៀត ចុះមកប្រមូលលុយប្រចាំខែ ចាប់ពី៥ដុល្លារ ដល់២០០ដុល្លារ ទៅតាមហាងធំឬតូច បើមិនព្រមបង់លុយទេ គេសុំត្រួតពិនិត្យបង្កការរំខានសព្វបែបយ៉ាងថែមទៀត។
ក្រុមអ្នករកស៊ីដឹកទំនិញមួយចំនួនទៀតបានលើកឡើងថា សម្រាប់ពួកគាត់ជាអ្នករកស៊ីតូចតាចជួបផលលំបាកច្រើនណាស់ ដោយសារតែនគរបាលសេដ្ឋកិច្ចទាំងខេត្ត ទាំងក្រសួង នាំគ្នាដាក់ប៉ុស្តិ៍ជជុះយ៉ាងប្រសេចប្រសាចតាមផ្លូវ មិនគោរពឬអនុវត្តន៍គោលការណ៍បទបញ្ជារបស់អគ្គស្នងការនគរបាលជាតិនោះទេ ហើយអ្នករកស៊ីដឹកទំនិញខ្លះ បានសំណូមពរឲ្យលោក នេត សាវឿន ក៏ដូចជាក្រសួងមហាផ្ទៃពិចារណាអំពីការចាត់តាំងមន្ត្រីនគរបាលសេដ្ឋកិច្ចឲ្យចុះប៉ុស្តិ៍ ដោយបញ្ជាក់ថា នៅតាមបណ្តាខេត្តមាននគរបាលសេដ្ឋកិច្ចប្រចាំខេត្តទៅហើយ មិនគួរចាត់តាំងឲ្យមាននគរបាលសេដ្ឋកិច្ចពីក្រសួងមហាផ្ទៃចុះទៅប្រចាំការតាមខេត្តទៀតទេ។ ជាពិសេសនគរបាលសេដ្ឋកិច្ចក្រសួងមហាោផ្ទៃដែលចុះកាន់ផ្លូវជាតិធំៗកំពុងត្រូវប៉ាន់ក្នុងការប្រមូលលុយពីការដឹកជញ្ជូនទំនិញតាមបែបពុករលួយ ហើយរឿងសំខាន់មួយទៀតនោះ នគរបាលសេដ្ឋកិច្ចក្រសួងមហាផ្ទៃ គួរតែបង្រួមចូលគ្នាពេលបញ្ជូនឲ្យចុះតាមខេត្ត មិនគួរបែងចែកជាពីរក្រុម ដូចជាខេត្តខ្លះ មានផ្នែកទំនិញ និងផ្នែកបង្ក្រាបបទល្មើសព្រៃឈើនៅដាច់ពីគ្នា ប៉ុន្តែពួកគេធ្វើសកម្មភាពដាក់ប៉ុស្តិ៍ជជុះដូចតែគ្នា។ ក្រុមអ្នករកស៊ីមួយចំនួនទៀតក៏បានទទូចឡើងថា ប្រសិនបើក្រុមនគរបាលសេដ្ឋទាំងនោះចុះប៉ុស្តិ៍សំដៅបង្ក្រាបបទល្មើសទៅតាមគោលការណ៍ច្បាប់គឺជារឿងល្អ ព្រោះមានជំនាញគយប្រចាំច្រកព្រំដែន និងនៅតាមបណ្តាខេត្តចាំប្រមូលពន្ធបង់ចូលរដ្ឋរួចហើយ ដូច្នេះនគរបាលសេដ្ឋកិច្ចក្រសួងមហាផ្ទៃគួរតែគ្មានភារកិច្ចចុះទៅប្រមូលលុយច្រកហោប៉ៅតាមអំពើចិត្តទៀតទេ។
យ៉ាងណាក៏ដោយតាមគោលការណ៍របស់អគ្គស្នងការនគរបាលជាតិ បានតម្រូវឲ្យនគរបាលសេដ្ឋកិច្ចក្រសួងមហាផ្ទៃចុះប៉ុស្តិ៍ដើម្បីស៊ើបអង្កេតប្រមូលទិន្នន័យស្ថិតិបទល្មើសេដ្ឋកិច្ចដើម្បីរាយការណ៍ជូនថ្នាក់លើ ឬសុំកម្លាំងសហការ ដើម្បីបង្ក្រាបបទល្មើសទាំងនោះ ប្រមូលលុយបង់ចូលជាថវិកាជាតិ។ ប៉ុន្តែនៅពេលនគរបាលសេដ្ឋកិច្ចចុះប៉ុស្តិ៍ ត្រូវសុំលិខិតបេសកកម្មឆ្លងកាត់លោក ប៉ុល សៀង តម្រូវឲ្យមានការបង់លុយជាថ្នូរនៃការទិញប៉ុស្តិ៍ ដូច្នេះនគរបាលសេដ្ឋកិច្ចក្រសួងមហាផ្ទៃដែលចុះទៅតាមខេត្ត តាមផ្លូវជាតិ និងតាមផែស្ងួតពួកគេ ត្រូវបង្ខំចិត្តដាក់ប៉ុស្តិ៍ជជុះតាមរថយន្តសម្រាប់ប្រដេញឡានដឹកឈើ ឬឡានដឹកទំនិញឲ្យចូលបង់លុយ ក៏ដូចជាការតម្រូវឲ្យក្រុមឈ្មួញបង់ខែ ដើម្បីប្រមូលចំណូលយកមកបង់ថ្លៃទិញប៉ុស្តិ៍ឲ្យបានគ្រប់ចំនួននិងបានទាន់ពេលវេលា មានន័យថារឿងសំខាន់ដែលបង្កើតឲ្យមានភាពអនាធិបតេយ្យ ផ្តើមចេញពីការិយាល័យរបស់លោក ប៉ុល សៀង តែម្តង។
ដោយឡែក លោក ប៉ុល សៀង ក៏មានសិទ្ធិអំណាចក្តោបក្តាប់ផ្លូវជាតិសំខាន់ៗចំនួន៣តាមរបៀបផ្តាច់មុខ គឺផ្លូវជាតិលេខ១ លេខ២ និងលេខ៣ រួមទាំងនៅតាមផែស្ងួតផងដែរ ដូច្នេះលោក ប៉ុល សៀង មានឱកាសច្រើនណាស់ ក្នុងការចាត់តាំងមន្ត្រីជំនិតៗរបស់ខ្លួនឲ្យចុះដាក់ប៉ុស្តិ៍ជជុះតាមផ្លូវជាតិទាំង៣នេះ និងតាមផែស្ងួត ទីដែលមានការដឹកជញ្ជូនទំនិញមកពីស្រុកយួនយ៉ាងគគ្រឹកគគ្រេង។ មន្ត្រីនគរបាលសេដ្ឋកិច្ចជាច្រើន រួមទាំងលោក ប៉ុល សៀង ផងដែរ មានបានខ្លាំងសម្បើមណាស់ ហាក់ដូចជាមិនមានតុល្យភាពទៅនឹងប្រាក់ខែក្នុងក្របខ័ណ្ឌជានគរបាលនោះទេ ហើយគេចង់ឃើញអង្គភាពប្រឆាំងអំពើពុករលួយចាត់វិធានការពិនិត្យមើលភាពអសកម្មរបស់សមត្ថកិច្ចដែលមិនបានបំពេញតួនាទីប្រមូលពន្ធជូនរដ្ឋ បែរជាចុះទៅប្រមូលលុយយ៉ាងប្រសេចប្រសាចតាមផ្លូវយកទៅច្រកហោប៉ៅធ្វើមានធ្វើបានផ្ទាល់ខ្លួនរាប់ទសវត្សន៍មកហើយគ្មានការកែទម្រង់នោះទេ មន្ត្រីនគរបាលសេដ្ឋកិច្ចមួយចំនួននៅតែបន្តប្រព្រឹត្តអំពើពុករលួយតាមគ្រប់រូបភាពមិនដែលខ្វល់ពីចំណាត់ការរបស់ថ្នាក់លើឡើយ៕
