មន្ត្រីអង្គការអន្តរជាតិ និងអង្គការក្រៅរដ្ឋាភិបាលដែលឃ្លាំមើលបទល្មើសបំផ្លាញព្រៃឈើនៅក្នុងប្រទេសកម្ពុជា បានលើកឡើងថា មេឈ្មួញ ទ្រី ភាព ដែលទទួលបានដីសម្បទានសេដ្ឋកិច្ចជាច្រើនម៉ឺនហិកតានោះ បានបំបែកជាក្រុមហ៊ុនតូចៗចំនួន១៥ ដើម្បីនាំឈើចេញទៅលក់នៅក្រៅប្រទេស។ មានន័យថាក្រុមហ៊ុនរបស់មេឈ្មួញ ទ្រី ភាព ស្នើសុំដីសម្បទានសេដ្ឋកិច្ចពីរដ្ឋាភិបាលកន្លងមក មិនមែនសម្រាប់ដាំដំណាំកសិ-ឧស្សាហកម្ម និងអភិវឌ្ឍន៍ពិតប្រាកដទេ គឺគ្រាន់តែជាលេសបិទបាំងបទល្មើសបំផ្លាញព្រៃឈើនិងដឹកជញ្ជូនឈើធ្វើអាជីវកម្មខុសច្បាប់យ៉ាងអនាធិបតេយ្យ។ មន្ត្រីអង្គការក្រៅរដ្ឋាភិបាលបានលើកឡើងថាលោក ហ៊ុន សែន ជាអ្នកទទួលខុសត្រូវទាំងស្រុងចំពោះមហន្តរាយព្រៃឈើដែលបង្កឡើងដោយមេឈ្មួញ ទ្រី ភាព ព្រោះលោក ហ៊ុន សែន ជាអ្នកស៊ីញ៉េផ្តល់ដីសម្បទានឱ្យមេឈ្មួញរូបនេះ។
តាមរបាយការណ៍របស់ក្រុមការងារពិសេសឃ្លាំមើលបទល្មើសបំផ្លាញព្រៃឈើ ក្នុងប្រទេសកម្ពុជា បានលាតត្រដាងអំពីសកម្មភាពប្រមូលទិញឈើនិងដឹកជញ្ជូនឈើរបស់ក្រុមហ៊ុនមេឈ្មួញ ទ្រី ភាព ដោយភ្ជាប់ស្លាកសញ្ញារបស់ក្រុមហ៊ុននិងលេខសម្គាល់នៅក្បាលរថយន្តផ្នែកខាងលើលេខ១១៦៨។ តាមរបាយការណ៍នោះបានឱ្យដឹងថាក្រុមហ៊ុនរបស់មេឈ្មួញ ទ្រី ភាព បានធ្វើអាជីវកម្មកាប់ឈើ និងដឹកជញ្ជូនឈើប្រណីតនៅគ្រប់តំបន់ដែលមានព្រៃឈើក្នុងប្រទេសកម្ពុជា ដោយសារក្រុមហ៊ុននេះមានទំនាក់ទំនងជិតស្និទ្ធជាមួយមេដឹកនាំជាន់ខ្ពស់នៃគណបក្សប្រជាជន។ ជាពិសេសក្រុមហ៊ុនរបស់មេឈ្មួញ ទ្រី ភាព មានទំនាក់ទំនងយ៉ាងជិតស្និទ្ធជាមួយកងកម្លាំងប្រដាប់អាវុធ មន្ត្រីបរិស្ថាន មន្ត្រីរដ្ឋបាលព្រៃឈើ មន្ត្រីអភិរក្សធនធានធម្មជាតិ ក៏ដូចជាក្រសួងឧស្សាហកម្ម ក្រសួងកសិកម្ម និងក្រុមហ៊ុនមួយចំនួនទៀតដែលមានដីសម្បទានសេដ្ឋកិច្ច។
របាយការណ៍បានលាតត្រដាងទៀតថា ក្រុមហ៊ុនរបស់មេឈ្មួញ ទ្រី ភាព ត្រូវបានរដ្ឋាភិបាលលោក ហ៊ុន សែន ផ្តល់អាជ្ញាប័ណ្ណប្រមូលទិញឈើពីក្រុមហ៊ុនដីសម្បទានសេដ្ឋកិច្ចដែលមាន២៧តំបន់ ក្នុងខេត្តចំនួន១២ គ្របដណ្តប់ដោយព្រៃឈើក្នុងនោះមានគម្រោងអភិវឌ្ឍន៍ និងគម្រោងសម្បទានសេដ្ឋកិច្ច។ ជាក់ស្តែងគម្រោងអភិវឌ្ឍន៍មានដូចជានៅ ឧទ្យានជាតិរាម ខេត្តព្រះសីហនុ ព្រៃខៀវ ស្ថិតនៅក្នុងស្រុកចំនួន៣ នៃខេត្តក្រចេះ រតនគិរី តំបន់ឧទ្យានជាតិវីរៈជ័យ ស្ថិតនៅក្នុងស្រុកវ៉ឺនសៃ ស្រុកលំផាត់ ស្រុកអណ្តូងមាស និងនៅស្រុកកូនមុំ។ នៅក្នុងតំបន់ព្រៃឡង់និងនៅខេត្តព្រះវិហារ ក៏ក្រុមហ៊ុនរបស់មេឈ្មួញ ទ្រី ភាព ធ្វើសកម្មភាពបំផ្លាញព្រៃឈើ និងដឹកជញ្ជូនឈើធ្វើអាជីវកម្មខុសច្បាប់យ៉ាងអនាធិបតេយ្យដែរ ដោយមានការឃុបឃិតពីមេដឹកនាំនិងក្រុមមន្ត្រីពុករលួយ។ បើនិយាយពីសមត្ថកិច្ចតូចតាចមិនហ៊ានហើបមាត់ជាមួយមេឈ្មួញ ទ្រី ភាព នោះទេ រីឯមន្ត្រីអាជ្ញាធរតាមបណ្តាខេត្តនានា នាំគ្នារក្សាភាពស្ងប់ស្ងាត់ដើម្បីទទួលផលប្រយោជន៍បន្តិចបន្តួចពីមេឈ្មួញបំផ្លាញព្រៃឈើស្រុកខ្មែរឱ្យរលត់រលាយរូបនេះ។
នៅក្នុងរបាយការណ៍របស់ក្រុមកិច្ចការពិសេសបានឱ្យដឹងទៀតថា ក្រុមហ៊ុនរបស់មេឈ្មួញទ្រី ភាព ទទួលបានដីសម្បទានសេដ្ឋកិច្ចពីរដ្ឋាភិបាលលោក ហ៊ុន សែន ចំនួន ៦៨ ០៨៨ហិកតា នៅក្នុងខេត្តចំនួន១២ តាមរយៈការបំបែកឈ្មោះជាក្រុមហ៊ុនតូចៗដោយក្រុមហ៊ុនខ្លះបានយកឈ្មោះអ្នកស្រី ម៉ៅ ម៉ុម ដែលជាភរិយារបស់លោក ទ្រី ភាព មកឈរឈ្មោះតែម្តង។ ដីសម្បទានសេដ្ឋកិច្ចទាំងនោះមានដូចជានៅតំបន់សេដ្ឋកិច្ចពិសេសអូរយ៉ាដាវ ខេត្តរតនគិរី ចំនួន១៣៦ហិកតា ស្រុកវាលវែង ខេត្តពោធិ៍សាត់ចំនួន ៦៤៣៦ហិកតា នៅឧទ្យានជាតិវីរៈជ័យ ក្នុងខេត្តរតនគិរី ចំនួន១៨៨៥៥ហិកតា ដែនជម្រកសត្វបឹងពែរ ខេត្តព្រះវិហារចំនួន៩៩១៦ហិកតា ភ្នំសំកុស ខេត្តពោធិ៍សាត់១០៧៧៤ហិកតា សិទ្ធិសំអាតតំបន់អាងស្តុកទឹកទំនប់វារីអគ្គិសនីស្ទឹងតាតៃខេត្តកោះកុង៦៧៧១ហិកតា ដីសម្បទានរ៉ែនៅខេត្តស្ទឹងត្រែង ១៥០០០ហិកតា និងដីនៅកោះទន្សាយខេត្តកំពត ទំហំ២០០ហិកតា។
តាមរយៈអាជ្ញាប័ណ្ណដីសម្បទានទាំងនេះក្រុមហ៊ុនរបស់មេឈ្មួញ ទ្រី ភាព បានកាប់បំផ្លាញព្រៃឈើនិងដឹកជញ្ជូនឈើធ្វើអាជីវកម្មយ៉ាងពេញបន្ទុកដោយមានការឃុបឃិតពីមន្ត្រីពុករលួយពីគ្រប់ស្ថាប័ន។ ទន្ទឹមនឹងនេះតាមប្រភពពីមន្ត្រីក្រសួងកសិកម្មបានឱ្យដឹងថា ពេលលោក ច័ន្ទ សារុន នៅកាន់តំណែងជារដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទគឺមេឈ្មួញ ទ្រី ភាព មានទំនាក់ទំនងយ៉ាងជិតស្និទ្ធជាមួយរដ្ឋមន្ត្រីល្បីល្បាញខាងប្រព្រឹត្តអំពើពុករលួយរូបនេះផងដែរ។ ប្រការនេះធ្វើឱ្យគេសង្ស័យថាការដែលក្រុមហ៊ុនរបស់មេឈ្មួញ ទ្រី ភាព បំផ្លាញព្រៃឈើនិងដឹកជញ្ជូនឈើធ្វើអាជីវកម្មខុសច្បាប់យ៉ាងពេញបន្ទុកនៅពេលកន្លងមក គឺមានការបើកដៃពីលោក ច័ន្ទ សារុន ទើបអ្វីៗអាចប្រព្រឹត្តទៅដោយរលូនរហូតដល់ព្រៃឈើស្ទើរតែរលត់រលាយពីទឹកដីខ្មែរ។
របាយការណ៍របស់ក្រុមកិច្ចការពិសេសឃ្លាំមើលបទល្មើសបំផ្លាញព្រៃឈើក្នុងប្រទេសកម្ពុជាមានកម្រាស់៥២ទំព័រ បានរៀបរាប់ទៀតថា ក្រុមហ៊ុនរបស់មេឈ្មួញ ទ្រី ភាព បានឈ្លានពានចូលដល់តំបន់ព្រៃការពារនិងព្រៃសហគមន៍ ហើយបុគ្គលិករបស់ក្រុមហ៊ុននេះ បានដើរប្រមូលទិញឈើពីប្រជាពលរដ្ឋនៅតាមបណ្តាខេត្តទាំង១២ ដែលដឹកតាមរទេះគោ និងទិញឈើពីប្រជាពលរដ្ឋដែលឆ្លងចូលទៅកាប់តាមព្រំដែនសៀម។ ក្រុមហ៊ុនរបស់មេឈ្មួញ ទ្រី ភាព បានចាត់តាំងមេការនៅតាមគោលដៅរង់ចាំទិញនិងប្រមូលដឹកយកឈើទៅស្តុកទុកនៅតាមឃ្លាំងនៃគោលដៅនីមួយៗ បន្ទាប់មកទើបដឹកជញ្ជូនទៅលក់នៅប្រទេសយួន។ ក្រុមហ៊ុនរបស់មេឈ្មួញ ទ្រី ភាព ដឹកឈើចេញទៅស្រុកយួនតាមច្រកសំខាន់ៗនៅក្នុងខេត្តមណ្ឌលគិរី ច្រកអូរយ៉ាដាវ ខេត្តរតនគិរី ច្រកស្នួល ខេត្តក្រចេះ ច្រកអន្លង់ជ្រៃ ខេត្តព្រៃវែង ច្រកកំពង់ផែអន្តរជាតិ ខេត្តព្រះសីហនុ ច្រកកំពង់ផែរាម ច្រកសមុទ្រខេត្តកំពត និងច្រករបៀងលេខ១៩ ជាដើម។
ក្រុមមន្ត្រីអង្គការក្រៅរដ្ឋាភិបាលបានលើកឡើងថា ក្រុមហ៊ុនរបស់មេឈ្មួញ ទ្រី ភាព បានចិញ្ចឹមនិងជួយឧបត្ថម្ភកម្លាំងប្រដាប់អាវុធ មន្ត្រីរាជការ នៅក្នុងតំបន់ដីសម្បទានរបស់ខ្លួនដោយជួយឧបត្ថម្ភសាងសង់អគាររដ្ឋបាល មន្ទីរ ការិយាល័យ គណបក្សប្រជាជន ប៉ុន្តែមិនបានជួយធ្វើឱ្យប្រសើរឡើងដល់ជីវភាពរស់នៅរបស់ប្រជាពលរដ្ឋនោះទេ។ ផ្ទុយទៅវិញមេឈ្មួញល្បីល្បាញខាងបំផ្លាញព្រៃឈើស្រុកខ្មែររូបនេះ បានធ្វើឱ្យប៉ះពាល់ដល់ដីកសិកម្មរបស់ប្រជាពលរដ្ឋយ៉ាងតិច ១៤៤៥ គ្រួសារ ដោយពុំមានសំណងសមរម្យឡើយ។ ក្រុមមន្ត្រីអង្គការក្រៅរដ្ឋាភិបាលបានលើកឡើងថាដោយសារតែមេឈ្មួញ ទ្រី ភាព មានទំនាក់ទំនងជិតស្និទ្ធជាមួយក្រុមអ្នកកាន់អំណាចនៅក្នុងប្រទេសកម្ពុជា និងមានការឃុបឃិតពីមន្ត្រីស្ថាប័នពាក់ព័ន្ធ ទើបគេអាចបំផ្លាញព្រៃឈើក្នុងខេត្តចំនួន១២ យ៉ាងកំរោល។ អំពើរបស់ក្រុមហ៊ុនមេឈ្មួញ ទ្រី ភាព គឺជាការបំផ្លាញជាតិដែលមិនអាចអត់ឱនឱ្យបានឡើយ ហើយលោក ហ៊ុន សែន ក៏មិនអាចគេចផុតពីការទទួលខុសត្រូវចំពោះមហន្តរាយព្រៃឈើបានដែរ។
តាមឯកសាររបស់មន្ត្រីអង្គការក្រៅរដ្ឋាភិបាលបានលើកឡើងថារហូតមកដល់ពេលនេះមេឈ្មួញ ទ្រី ភាព មិនទាន់បញ្ឈប់សកម្មភាពកាប់បំផ្លាញព្រៃឈើនិងដឹកជញ្ជូនឈើធ្វើអាជីវកម្មខុសច្បាប់នៅឡើយទេ។ ជាក់ស្តែងនៅក្នុងខេត្តព្រះវិហារ និងនៅក្នុងឃុំថ្មដា ស្រុកវាលវែង ខេត្តពោធិ៍សាត់ ក្រុមហ៊ុនរបស់មេឈ្មួញ ទ្រី ភាព បានបន្តធ្វើសកម្មភាពកាប់ឈើនិងដឹកជញ្ជូនឈើធ្វើអាជីវកម្មខុសច្បាប់ដោយគ្មានសមត្ថកិច្ច ឬស្ថាប័នពាក់ព័ន្ធណាហ៊ានចាត់វិធានការទប់ស្កាត់ទាល់តែសោះ។ ដូច្នេះការប្តេជ្ញារបស់លោក ហ៊ុន សែន ក្នុងការទប់ស្កាត់បទល្មើសបំផ្លាញព្រៃឈើ គឺពុំមានតម្លៃអ្វីទាំងអស់ពីព្រោះមកដល់ពេលនេះមេឈ្មួញទ្រី ភាព នៅតែអាចកាប់ឈើនិងដឹកជញ្ជូនឈើធ្វើអាជីវកម្មខុសច្បាប់យ៉ាងគគ្រឹកគគ្រេងបំផ្លាញផ្លូវបំផ្លាញស្ពានតាមអំពើចិត្តគ្មានមន្ត្រីអាជ្ញាធរ និងសមត្ថកិច្ចពាក់ព័ន្ធទប់ស្កាត់ឡើយ៕
