នគរបាលសេដ្ឋកិច្ចខេត្តកណ្តាលឈរជើងលើផ្លូវជាតិលេខ២ និងលេខ៣ ដែល ពួកគាត់ស្រេចតែអំពើចិត្ត។ ប្រជាពលរដ្ឋបានអំពាវនាវឱ្យលោក អ៊ាវ ចំរើន ស្នងការនគរបាលខេត្តកណ្តាល ពិនិត្យមើលសកម្មភាពរបស់មន្ត្រីនគរបាលសេដ្ឋកិច្ចពុករលួយទាំងនោះជាបន្ទាន់ ព្រោះទង្វើរបស់ពួកគេមិនខុសពីអារ.កក្តាមយកឈាមឡើយ។
ប្រជាពលរដ្ឋរស់នៅក្នុងខេត្តតាកែវ បានឱ្យដឹងថាពួកគាត់រកស៊ីដឹកកសិផលដូចជាពោត សណ្តែក ត្រសក់ ល្ហុង ដំឡូង ល្ពៅ ដែលដាំតាមធម្មជាតិយកមកលក់ក្នុងទីផ្សាររាជធានីភ្នំពេញគ្រាន់បានកម្រៃខ្លះដើម្បីដោះស្រាយជីវភាពប្រចាំថ្ងៃ។ ប៉ុន្តែនៅពេលពួកគាត់មកដល់ទឹកដីស្រុកកណ្តាលស្ទឹង ខេត្តកណ្តាល តាមផ្លូវជាតិលេខ២ មានជនមួយក្រុមខ្លះស្លៀកពាក់ស៊ីវិល ខ្លះទៀតស្លៀកពាក់ឯកសណ្ឋាននគរបាលបានដេញស្ទាក់រថយន្តរបស់ពួកគាត់បង្ខំឱ្យបង់លុយ។ ក្រុមសមត្ថកិច្ចទាំងនោះបានឱ្យដឹងថាពួកគេគឺជាមន្ត្រីនគរបាលសេដ្ឋកិច្ចខេត្តកណ្តាល ហើយបង្ខំឱ្យពួកគាត់បង់លុយក្នុងមួយជើងចាប់ពី៤មឹនរៀល ទៅ១០មឹនរៀលតាមរថយន្តធុនតូច ឬរថយន្តធុនធំ ដោយគ្មានការយោគយល់អ្វីទាំងអស់។ បើទោះបីពួកគាត់ខំព្យាយាមអង្វរករឱ្យពួកគេបញ្ចុះតម្លៃ ក៏ក្រុមនគរបាលសេដ្ឋកិច្ចទាំងនោះមិនយកត្រចៀកស្តាប់ដែរ គឺគេព្រមានអូសយករថយន្តបញ្ជូនទៅស្នងការដ្ឋាននគរបាលខេត្ត ហេតុនេះហើយទើបពួកគាត់សុខចិត្តបង់លុយទាំងឈឺចាប់។
ពាក់ព័ន្ធនឹងបញ្ហាខាងលើនេះគេមិនដែលឃើញលោក អ៊ាវ ចំរើន ស្នងការនគរបាលខេត្តកណ្តាល ជិះរថយន្តទៅពិនិត្យមើលសកម្មភាព របស់សមត្ថកិច្ចនគរបាលសេដ្ឋកិច្ចឈរជើងលើផ្លូវជាតិលេខ២ និងផ្លូវជាតិលេខ៣នោះទេ។ បញ្ហានេះប្រភពពីមន្ត្រីនគរបាលតូចតាច ធ្វើការនៅក្នុងស្នងការដ្ឋាននគរបាលខេត្តកណ្តាល បានបង្ហើបឱ្យដឹងថាលោក អ៊ាវ ចំរើន និងក្រុមស្នងការរងមួយចំនួនសុទ្ធតែបានទទួលចំណែកពីក្រុមនគរបាលសេដ្ឋកិច្ចដែលជំរិតយកលុយពីប្រជាពលរដ្ឋនោះដែរ។
សេចក្តីរាយការណ៍ពីប្រជាពលរដ្ឋដែលដឹកជញ្ជូនកសិផលតាមរថយន្តពីខេត្តតាកែវ និងខេត្តកណ្តាលឆ្លងកាត់ផ្លូវជាតិលេខ២ និងផ្លូវជាតិលេខ៣ មកលក់តាមទីផ្សារក្នុងរាជធានីភ្នំពេញ បានអំពាវនាវឱ្យនាយឧត្តមសេនីយ៍ នេត សាវឿន អគ្គស្នងការនគរបាលជាតិធ្វើការដាស់តឿនលោក អ៊ាវ ចំរើន ស្នងការនគរបាលខេត្តកណ្តាលខ្លះផង៕
