ក្រុមហ៊ុន ឧកញ៉ា ទ្រី ភាព ទទួលបានអាជ្ញាប័ណ្ណ ប្រមូលទិញឈើពីក្រុមហ៊ុនសម្បទានសេដ្ឋកិច្ចចំនួន ២៧តំបន់ នៅតាមបណ្តាខេត្តចំនួន១២ ទីដែលមានការបំផ្លាញព្រៃឈើយ៉ាងវិនាសហិនហោច ហើយជ្រកក្រោមអាជ្ញាប័ណ្ណប្រមូលទិញឈើ ពីតាមក្រុមហ៊ុនសម្បទាន និងឈើដែលបានមកពីការបង្ក្រាប របស់សមត្ថកិច្ចនិងមន្ត្រីជំនាញ ក្រុមហ៊ុន ទ្រី ភាព បានបង្កើតឲ្យមានកូនដៃ ចាំប្រមូលទិញឈើខុសច្បាប់ ពីប្រជាពលរដ្ឋឬឈ្មួញតូចតាចដទៃទៀត ក្នុងតម្លៃថោកៗ បន្តដឹកតាមរថយន្តកុងតឺន័រ ឬរថយន្តយីឌុប ចេញទៅលក់នៅក្រៅប្រទេស យ៉ាងសុខស្រួលបំផុត មិនដែលមាននរណា ហ៊ានប៉ះពាល់ទេ។
ដោយឡែកនៅក្នុងខេត្តព្រះវិហារ ក្រុមហ៊ុន ឧកញ៉ា ទ្រី ភាព បានចាត់តាំងមេការដ៏មានអំណាចម្នាក់ ជ្រកក្រោមស្បែកជាសមត្ថកិច្ចផងដែរ គឺលោក ម៉េង ដើម្បីចាត់ចែងប្រមូលទិញឈើពីប្រជាពលរដ្ឋ ក្នុងតម្លៃថោកផងដែរ។ នៅក្នុងខេត្តព្រះវិហារ ក្រុមហ៊ុនឧកញ៉ា ទ្រី ភាព មានសិទ្ធិគ្រប់គ្រង ការប្រមូលទិញឈើនៅក្នុងស្រុកឆែប ស្រុកជ័យសែន ស្រុករវៀង និងដែនជម្រកសត្វព្រៃបឹងពែរ ដែលនៅទីនោះក្រុមហ៊ុនឧកញ៉ា ទ្រី ភាព ក៏មានដីសម្បទានសេដ្ឋកិច្ច សម្រាប់វិនិយោគអភិវឌ្ឍន៍ ដាំដំណាំកៅស៊ូ ដំឡូងមី និងធ្វើចំការម្រេចផងដែរ។ ការគ្រប់គ្រងលើអាជីវកម្ម ប្រមូលទិញឈើពីតំបន់ដីសម្បទាន និងឈើដែលបានមកពីការបង្ក្រាប របស់សមត្ថកិច្ចនិងមន្ត្រីជំនាញ គឺជាឱកាសដែលលោក ម៉េង អាចបង្កឲ្យមានភាពអនាធិបតេយ្យ នៃការបំផ្លាញព្រៃឈើ តាមតែអំពើចិត្ត។
នៅក្នុងខេត្តព្រះវិហារ មានតែក្រុមហ៊ុន ទ្រី ភាព ក្រោមការចាត់ចែង របស់លោក ម៉េង ប៉ុណ្ណោះ ដែលចេញមុខខ្លាំងជាងគេ ក្នុងការប្រមូលទិញឈើ ពីឈ្មួញតូចតាច និងប្រជាពលរដ្ឋដែលចូលព្រៃ កាប់ឈើប្រណីត តាមតំបន់អភិរក្ស និងតំបន់ព្រៃការពារ យកទៅលក់ឲ្យក្រុមហ៊ុន ទ្រី ភាព ក្នុងតម្លៃថោកបំផុត ហើយគ្មានក្រុមហ៊ុន ឬឈ្មួញណាម្នាក់ ហ៊ានប្រជែងចូលទៅប្រមូលទិញឈើ ក្នុងតំបន់ដែលក្រុមហ៊ុន ទ្រី ភាព គ្រប់គ្រងនោះទេ។ លោក ម៉េង ដែលជាមេការ របស់ក្រុមហ៊ុន ទ្រី ភាព ប្រចាំខេត្តព្រះវិហារ បានត្រូវដៃត្រូវជើង ជាមួយសមត្ថកិច្ច និងមន្ត្រីជំនាញគ្រប់ជាន់ថ្នាក់ ហើយចេញបញ្ជា ឲ្យមានការបង្ក្រាបសកម្មភាព ដឹកជញ្ជូនឈើខុសច្បាប់ របស់ឈ្មួញមួយចំនួន ដែលមិនព្រមដឹកឈើ យកមកលក់ឲ្យក្រុមហ៊ុន ទ្រី ភាព ជាការបំបាក់ស្មារតី មិនឲ្យឈ្មួញដទៃចូល ទៅរកស៊ីប្រជែង ជាមួយលោក ម៉េង។
ក្រុមហ៊ុន ទ្រី ភាព បានធ្វើអាជីវកម្ម កាប់បំផ្លាញព្រៃឈើ និងដឹកជញ្ជូនឈើប្រណីត មកពីគ្រប់តំបន់ ដែលមានការបំផ្លាញព្រៃឈើយ៉ាងរាលដាល នៅទូទាំងប្រទេសកម្ពុជា ដោយសារតែក្រុមហ៊ុននេះ មានទំនាក់ទំនងយ៉ាងជិតដិត ជាមួយអ្នកកាន់អំណាច និងមានសម្ព័ន្ធភាពជាមួយ កងកម្លាំងប្រដាប់អាវុធ មន្ត្រីបរិស្ថាន មន្ត្រីជំនាញរដ្ឋបាលព្រៃឈើ មន្ត្រីអភិរក្ស និងសមត្ថកិច្ចដទៃទៀត ហើយក្នុងខេត្តព្រះវិហារនេះ លោក ម៉េង មានទំនាក់ទំនងល្អ ជាមួយថ្នាក់ដឹកនាំ និងសមត្ថកិច្ចគ្រប់ជាន់ថ្នាក់ ទើបអាជីវកម្មប្រមូលទិញឈើខុសច្បាប់ និងការបង្កើតទីតាំងស្តុកឈើ ជាច្រើនកន្លែងរបស់លោក ម៉េង មិនដែលមានសមត្ថកិច្ចណាមួយ ហ៊ានទៅក្បែរទាល់តែសោះ៕
