ភ្នំពេញៈក្លឹបអ្នកកាសែតឯករាជ្យដែលមានច្រើនជាង១០អង្គភាពបានបើកប្រជុំមហាសន្និបាត នៅ ថ្ងៃទី០២ ខែ ឧសភា ឆ្នាំ ២០១៤ ដើម្បីសំរេចជ្រើសរើសប្រធានក្លឹបអ្នកកាសែតឯករាជ្យដែលប្រព្រឹត្តទៅនៅភោជនីយដ្ឋានទន្លេសេកុង រាជធានីភ្នំពេញ។
សមាភាពដែលបានចូលរួមក្នុងឱកាសនោះ រួមមាន លោក សុប គ្រីយ៉ា ចាងហ្វាងកាសែតបណ្តាញអ្នកស៊ើបការណ៍ពិសេស, លោក ប៉ាត សុក ចាងហ្វាងកាសែតរស្មីព្រះច័ន្ទកម្ពុជា, លោក រុន សារ៉េត ចាងហ្វាងកាសែត ឆន្ទៈខ្មែរ, លោក ប៉ែន ខេមរ៉ា ចាងហ្វាងកាសែតចាប់ដៃ, លោក ទេស វិបុល ចាងហ្វាងកាសែតនិស្សិតខ្មែរ, លោក លឹម សារី ចាងហ្វាង កាសែត វីរៈជ័យ, លោក លាង សុភ័ក្ត្រ ចាងហ្វាងកាសែតពុទ្ធិខ្មែរ, លោក ម៉េង សេរីវឌ្ឍនាជំនួយការចាងហ្វាង កាសែតទ្រទ្រង់ជាតិ, លោក សៀង សេង ចាងហ្វាងកាសែតមាគ៌ាកម្ពុជា, លោក ជី ពេជ្រ ចាងហ្វាងកាសែត សម្លេងខ្មែរស្នេហាជាតិ, លោក ហង្ស ចក្រា ចាងហ្វាងកាសែតខ្មែរម្ចាស់ស្រុក, លោក ហ៊ុន សុខា ប្រធានក្រុមប្រឹក្សា ភិបាលកាសែតបណ្តាញអ្នកស៊ើបការណ៍ពិសេស ។
ក្នុងនោះ ដោយសារលោក ហៀង វណ្ណរា ចាងហ្វាងកាសែតមរតកតេជោ និងលោក គ្លិន ចាន់ថន មានធុរៈជា ចាំបាច់ត្រូវបានអាក់ខានចូលរួមក្នុងមហាសន្និបាតក្លឹបអ្នកកាសែតឯករាជ្យ តែលោកបានប្រកាសគាំទ្ររាល់សេចក្តី សម្រេចរបស់មហាសន្និបាតទាំងស្រុង ។
អង្គមហាសន្និបាតទាំងមូល របស់ក្លឹបអ្នកកាសែតឯករាជ្យ បានសម្រេចជ្រើសរើសបេក្ខភាព អ្នកដែលមាន សមត្ថភាព និងលទ្ធភាពពេញលេញក្នុងការដឹកនាំក្លឹបនេះស្របតាមលក្ខន្តិកៈ ។
ឆ្លងតាមការផ្លាស់ប្តូរមតិយោបល់គ្នាយ៉ាងស្វិតស្វាញរួចមក អង្គមហាសន្និបាតបានសម្រេចជ្រើសរើស លោក ហ៊ុន សុខា ប្រធានក្រុមប្រឹក្សាភិបាលកាសែតបណ្តាញអ្នកស៊ើបការណ៍ពិសេស ធ្វើជាប្រធានក្លឹបអ្នកកាសែត ឯករាជ្យ ។
ជាមួយគ្នានេះអង្គមហាសន្និបាតក៏បានសម្រេចយកលោក ហង្ស ចក្រា ចាងហ្វាងកាសែតខ្មែរម្ចាស់ស្រុក ធ្វើជាអនុប្រធានទី ១, លោក ហៀង វណ្ណរា ចាងហ្វាងកាសែត មរតកតេជោ ជាអនុប្រធានទី ២ ។
ចំណែកលោក ទេស វិបុល ចាងហ្វាងកាសែតនិស្សិតខ្មែរ ត្រូវបានជ្រើសតាំងជាអគ្គលេខាធិការ, លោក លាង សុភ័ក្ត្រ ចាងហ្វាងកាសែតពុទ្ធិខ្មែរ ជាអគ្គលេខាធិការរងទី ១, លោក ប៉ែន ខេមរ៉ា ចាងហ្វាងកាសែត ចាប់ដៃ ជាអគ្គលេខាធិការរងទី ២ ។
ដោយឡែក អង្គមហាសន្និបាតបានសម្រេចផ្តល់តំណែងជាប្រធានក្រមសីលធម៌ក្លឹបអ្នកកាសែតឯករាជ្យជូន ទៅ លោក លឹម សារី ចាងហ្វាងកាសែត វីរៈជ័យ ។ អនុប្រធានទី ១ គឺលោក ប៉ាត សុក ចាងហ្វាងកាសែត រស្មីព្រះច័ន្ទកម្ពុជា និងអនុប្រធានទី ២ គឺលោក សៀង សេង ចាងហ្វាងកាសែតមាគ៌ាកម្ពុជា ។
ដោយយល់ឃើញថា កិច្ចការរដ្ឋបាលរបស់ក្លឹបអ្នកកាសែតឯករាជ្យមានការមមាញឹកខ្លាំង អង្គមហាសន្និបាត ក៏បានសម្រេចជ្រើសតាំងលោក សុប គ្រីយ៉ា ចាងហ្វាងកាសែតបណ្តាញអ្នកស៊ើបការណ៍ពិសេសឱ្យធ្វើជាប្រធាន រដ្ឋបាល ។ ចំណែកលោក រុន សារ៉េត ចាងហ្វាងកាសែតឆន្ទៈខ្មែរ ជាអនុប្រធានរដ្ឋបាល ។
ទន្ទឹមនឹងនេះ អង្គមហាសន្និបាត នៅបានផ្តល់ជូ់នតំណែងជាសមាជិកគណៈកម្មាធិការនាយកក្លឹបអ្នកកាសែត ឯករាជ្យ ដល់លោក ជី ពេជ្រ ចាងហ្វាងកាសែតសម្លេងខ្មែរស្នេហាជាតិ និងលោក គ្លិន ចាន់ថន ចាងហ្វាងកាសែត អប្សរា ផងដែរ ។
លោក ហ៊ុន សុខា ប្រធានក្លឹបអ្នកកាសែតឯករាជ្យ បានប្តេជ្ញាយ៉ាងម៉ឺងម៉ាត់ថា លោកនឹងព្យាយាមឱ្យអស់ពី សមត្ថភាព និងលទ្ធភាព ដើម្បីធ្វើឱ្យក្លឹបនេះ ឈានទៅមុខយ៉ាងរឹងមាំ និងប្រកបដោយជោគជ័យ ៕
