កំពង់ស្ពឺ ៖ អ្នករកស៊ីកាប់ឈើលក់ ដឹកតាមគោយន្តកន្ត្រៃ ឈ្មោះ ជា ចយ បាននិយាយអោយដឹងថា ពួកគេបានចូលទៅកាប់ ឈើនៅតំបន់ភូមិចាស់ ចំណុចសាំងជ្រុំ ក្នុងទឹកដីខេត្តពោធិ៍សាត់ ដោយឆ្លងកាត់ទឹកដី ស្រុកទឹកផុស ខេត្តកំពង់ឆ្នាំង ឆ្ពោះទៅអារនៅរោងម៉ាស៊ីន ក្នុងភូមិក្រាំងចេក ទឹកដីខេត្តកំពង់ស្ពឺ ។ ឈើប្រណិតប្រភេទឈើធ្នង់ គ្រញូង និងឈើប្រភេទលេខ ១ ដូចជាផ្ចឹក សុក្រម រាជថ្កុល ជាដើម បច្ចុប្បន្នត្រូវបាន គេមើលឃើញថា ឈ្មួញបាននឹងកំពុង សស្រាក់ស្រាំក្នុងការកាប់ និងដឹកជញ្ជូន តាមរទេះគោ និងរទេះក្របី គោយន្ត រថយន្តស៊េរីទំនើបៗ និងរថយន្តកូរ៉េ ធ្វើអាជីវកម្មយ៉ាងគគ្រឹកគ្រេង ដូចគេហែកឋិនទាន ពីទឹកដីខេត្តពោធិ៍សាត់ ឆ្ពោះទៅកាន់ខេត្តកំពង់ស្ពឺ ចូលទៅរាជធានីភ្នំពេញ ។
សម្រាប់ឈើធ្នង់ក្នុង ១គោយន្តកន្ត្រៃ ត្រូវបង់លុយអោយសមត្ថកិច្ច ពាក់ព័ន្ធនៅតាមផ្លូវជាច្រើនកន្លែង ក្នុងមួយកន្លែង សមត្ថកិច្ចមាន ៥ជំនាញ ក្នុង១ជំនាញៗ ១០ម៉ឺនរៀល សម្រាប់ឈើគ្រញូង និងឈើគ្រប់ប្រភេទ គឺគេធ្វើការបង់លុយ តាមប្រភេទឈើផ្សេងៗគ្នា សមត្ថកិច្ច ៥ជំនាញ មាន មេព្រៃ នគរបាល ទាហាន បរិស្ថាន អាវុធហត្ថ។
