បាត់ដំបង៖ លោក ប៉ាង វណ្ណថា បានចាត់ចែងឲ្យមន្ត្រីគយចល័តរបស់ខេត្តបាត់ដំបងចុះដាក់ ប៉ុស្តិ៍ តាមផ្លូវជាតិលេខ១០ និងផ្លូវជាតិលេខ៥ដើម្បីរាប់ក្បាលឡានដឹកជញ្ជូនទំនិញមកពី ច្រកព្រំដែននៃខេត្តបន្ទាយមានជ័យនិងខេត្តប៉ៃលិនឲ្យចូលបង់លុយ តាមរបៀបពុករលួយព្រោះការបង់លុយថ្លៃក្បាលឡាននោះ គ្មានវិក្កយបត្រឬលិខិតស្នាមអ្វីទេ។ជាធម្មតាក្រុមឈ្មួញរកស៊ី ដឹកជញ្ជូនទំនិញខុសច្បាប់ឬទំនិញបង់ពន្ធមិនគ្រប់មកពីព្រំដែនសៀម មានទំនាក់ទំនងល្អជាមួយជំនាញគយដែលប្រចាំការតាមដងផ្លូវជាពិសេសឈ្មួញ ធំៗសុទ្ធតែមានទំនាក់ទំនងជិតដិតជាមួយលោក ប៉ាង វណ្ណថា ដែលជាប្រធានសាខាគយខេត្តបាត់ដំបងព្រោះថាបើសិនជាប្រធានសាខាគយមិន ហ៊ានហាមាត់ ទៅហើយនោះជំនាញគយនៅតាមផ្លូវបានត្រឹមតែនាំគ្នាសុំលុយថ្លៃបាយឬ រាប់ក្បាលឡានយកលុយទៅតាមជំនាញ ។
ចាប់តាំងពីពេលដែលលោក ប៉ាង វណ្ណថា បានឡើងធ្វើជាប្រធានសាខាគយនិងរដ្ឋាករប្រចាំខេត្តបាត់ដំបង ជំនួសលោក ស្រី សៀងគេមិនដែលឃើញលោក ប៉ាង វណ្ណថាចាត់វិធានការទប់ស្កាត់បង្ក្រាបការដឹកជញ្ជូនទំនិញគេចពន្ធនិង ទំនិញខុសច្បាប់ឆ្លងកាត់ទឹកដី ខេត្តបាត់ដំបងឲ្យមានប្រសិទ្ធភាពម្តងណាឡើយពោលគឺមន្ត្រីជំនាញគយដែល ប្រចាំការតាមច្រកព្រំដែននិងត្រូវបានពង្រាយតាមដងផ្លូវដែលពូកែរកលុយ យកទៅបង់ជូនមេកើយសុទ្ធសឹងជាមន្ត្រីមុខខ្លាញ់ដែលថ្នាក់លើចាត់ទុកជា គ្រាប់ពេជ្រដ៏មានតម្លៃសម្រាប់ការប្រើប្រាស់ឲ្យប្រមូលសេដ្ឋកិច្ច យកទៅចែកគ្នាធ្វើមានធ្វើបានផ្ទាល់ខ្លួន។ហើយប្រសិនបើមានការ ផ្លាស់ប្តូរតំណែងលោក ប៉ាង វណ្ណថាឬដាក់សម្ពាធឲ្យមានការបង្ក្រាបអំពើរត់ពន្ធទំនិញខុសច្បាប់ គេជឿជាក់ថា ចំណូលពន្ធនៅក្នុងខេត្តបាត់ដំបងនឹងកើនឡើងទ្វេដងបានជាប្រយោជន៍ សម្រាប់អភិវឌ្ឍន៍ប្រទេសជាតិនិងហេដ្ឋរចនាសម្ព័ន្ធផ្សេងៗយ៉ាងងាយស្រួល ។
មន្ត្រីមួយចំនួនបានលើកឡើងផងដែរថាគ្រប់ការដឹកជញ្ជូនទំនិញទាំងតាម រថយន្តតូចនិងរថយន្តធំៗឆ្លងកាត់ក្នុងទឹកដីខេត្តបាត់ដំបងដូចជាមកពី ចំណុចព្រំដែនស្រុកកំរៀងស្រុកសំពៅលូន និងស្រុកភ្នំព្រឹក ភាគច្រើនជាប្រភេទគ្រឿងសំណង់និងប្រភេទទំនិញខុសច្បាប់ត្រូវតែចូល បង់លុយជូនជំនាញគយរបស់លោក ប៉ាង វណ្ណថាហើយត្រូវជូនដំណឹងជាមុនរាល់ការដឹកជញ្ជូនទំនិញឆ្លងកាត់ទឹកដី ខេត្តបាត់ដំបង បើមិនដូច្នេះទេលោក ប៉ាង វណ្ណថានឹងចាត់ចែងឲ្យមន្ត្រីក្រោមឱវាទចាប់ឃាត់នាំយកទៅផាកពិន័យ ទ្វេដងពីបទមិនជូនដំណឹងឬការបើកហួសប៉ុស្តិ៍ភ្លេចចូលបង់លុយជាដើម។ ដោយឡែកការដឹកជញ្ជូនទំនិញមកពីខេត្តប៉ៃលិនតាមផ្លូវជាតិលេខ១០ក៏មាន សកម្មភាពយ៉ាងគគ្រឹកគគ្រេងដែលជំនាញគយរបស់លោក ប៉ាង វណ្ណថាមានឱកាសកៀងគរក្រុមឈ្មួញធំៗទាំងអស់ឲ្យចូលបង់លុយទៅតាម ស្ថានភាពជាក់ស្តែងនៃការដឹកជញ្ជូនទំនិញហើយបើទោះបីជាឈ្មួញរកស៊ី ដឹកជញ្ជូនទំនិញតាមខេត្តប៉ៃលិនសុទ្ធសឹងជាភរិយាអ្នកមានអំណាចនិង ស្ថិតក្នុងជួរកម្លាំងប្រដាប់អាវុធក៏ដោយ ក៏ត្រូវចេះឱនលំទោនចូលបង់លុយឲ្យជំនាញគយទើបការរកស៊ីដឹកជញ្ជូនទំនិញ អាចដំណើរការដោយរលូនល្អគ្មាននរណាហ៊ានសួរនាំនោះទេ។
ក្នុងមួយថ្ងៃៗបើបូកសរុបការដឹកជញ្ជូនទំនិញតាមរថយន្តធំៗឆ្លងកាត់ ខេត្តបាត់ដំបង មានចំនួនរាប់ពាន់គ្រឿងហើយនេះមិនទាន់គិតដល់ការដឹកជញ្ជូនទំនិញតាម រថយន្តតូចៗឬការដឹកជញ្ជូនឈើខុសច្បាប់ដែលជំនាញគយរបស់លោក ប៉ាង វណ្ណថាកោសរូសបង្ខំឲ្យបង់លុយតាមតែអំពើចិត្តនៅឡើយទេ។
ចាប់់តាំងពីពេលដែលលោក ប៉ាង វណ្ណថា ឡើងធ្វើជាប្រធានសាខាគយខេត្តបាត់ដំបងអ្វីៗស្ងៀមស្ងាត់មិនដឹងជាមាន អាថ៌កំបាំងអ្វី ព្រោះគេមិនដែលឃើញលោកប៉ាង វណ្ណថា បង្ហាញស្នាដៃបង្អួតថ្នាក់លើនោះទេម្យ៉ាងទៀតតែលោក ប៉ាងវណ្ណថា ក៏ពូកែវេចខ្ចប់ប្រមូលផលប្រយោជន៍យកទៅបង់ជូនមេកើយផងដែរទើបច្រើន ឆ្នាំកន្លងមកនេះ គេមិនដែលឃើញថ្នាក់លើដាក់ពិន័យឬកោះហៅលោកប៉ាង វណ្ណថា ទៅសួរនាំទ្បើយ៕
