កោះកុងៈ ជ្រកក្រោមតួនាទីយ៉ាងដុះស្លែលោកម៉ៅ ចាន់វិជ្ជា មេប៉ូលិសសេដ្ឋកិច្ចកោះកុង ត្រូវបានក្រុម ឈ្មួញរកស៊ីតូចតាចជាច្រើន បានបកអាក្រាតថា បានយកតួនាទីកាងរថយន្តដឹកសាច់មាន់និងជង្គង់មាន់ពីប្រទេសថៃ តាម ច្រកកោះកុង ដែលមានមេឈ្មួញ ឈ្មោះ ម៉ែ អាម៉េង និងតាគ្រួច ជាអ្នកដឹកសាច់មាន់ និងជង្គង់មាន់ខូចគុណ ភាព ចូលមកប្រទេសកម្ពុជាយ៉ាងល្បីល្បាញដែលមិនមាន សមត្ថកិច្ចណាចាប់ ឬហ៊ានឃាត់ឡើយ ។
ក្រុមអ្នករកស៊ី និងក្រុមអាជ្ញាធរក៏បានអះអាងថាក្រុមប៉ូលិសក្រសួងដែលមានឈ្មោះ ម៉ៅ ចាន់វិជ្ជា ជាមេទទួលផែនបង្ក្រាប និងទប់ស្កាត់បទល្មើសសេដ្ឋកិច្ចទិសកោះកុង ក្លាយជាអ្នកមើលផ្លូវនិងជាខ្នងបង្អែក ឱ្យឈ្មួញយ៉ាងកាក់កបរឹងមាំបំផុត។
ភាពអំណួតរបស់ ម៉ៅ ចាន់វិជ្ជា គឺត្រូវបានមេឈ្មួញម៉ែអាម៉េង និងតាគ្រួច អួតអាងគំរាមមន្ត្រីតាមដងផ្លូវថា គ្មាននរណាអាចប៉ះពាល់ម៉ៅ ចាន់វិជ្ជា បានទេ ព្រោះតែគាត់មានបង្អែកខ្នងក្រាស់ក្នុងអគ្គស្នងការនគរបាលជាតិ ហើយ សូម្បីតែចៅហ្វាយខេត្តកោះកុង ស្នងការកោះកុងក៏មិនហ៊ានប៉ះពាល់ ម៉ៅ ចាន់វិជ្ជា នោះទេ ! ។
ផ្ទុយពីភាពអំណួតរបស់មេឈ្មួញនោះ ហើយទើបបានជាគេឃើញ ម៉ៅ ចាន់វិជ្ជា ធ្វើព្យុះធ្វើភ្លៀងកាងជំនួញ
នាំមាន់ទាខុសច្បាប់របស់ម៉ែអាម៉េង និងតាគ្រួចនាំចូលមកក្នុងប្រទេសកម្ពុជា រំលោភច្បាប់រដ្ឋាភិបាលកម្ពុជាយ៉ាង គឃ្លើនបំផុតមិនគួរបើអគ្គស្នងការនគរបាលជាតិ និងក្រសួងមហាផ្ទៃ មើលរំលងបញ្ហានេះទេ ! ។
តាមមន្ត្រីនិយាយថា សាច់និងជង្គង់មាន់ខូចគុណភាពត្រូវបានគេដឹងថា ឈ្មួញបានដឹកតាមរថយន្តពីប្រទេស ថៃក្នុងមួយថ្ងៃៗមិនតិចជាង ២០ តោននោះទេ ហើយត្រូវបានក្រុមសមត្ថកិច្ចនិងជំនាញប៉ូលិសសេដ្ឋកិច្ចក្រសួងដែល មើលការខុសត្រូវតាំងពីព្រំដែនខេត្ត កោះកុង រហូតមក ដល់ក្រុងភ្នំពេញបន្តបើកដៃឱ្យមេឈ្មួញធំៗដឹកយ៉ាងគគ្រឹក គគ្រេងជា រៀងរាល់ថ្ងៃ ដែលមេឈ្មួញ ក្រៅពីមានអំណាចខ្សែក្រាស់ហើយក៏បានជះលុយបិទមាត់មន្ត្រីក្រោមដងផ្លូវ យ៉ាងប៉ិនប្រសប់បំផុត ។
ប្រភពបានឱ្យដឹងទៀតថាក្នុងមួយថ្ងៃៗរថយន្តរបស់មេឈ្មួញខាងលើបានដឹក សាច់មាន់ និងជង្គង់មាន់មិនតិចជាង ២០តោនឡើយ ហើយរថយន្តនេះក៏មិនដែលបង់ពន្ធចូលរដ្ឋឱ្យបាន១០០ភាគរយនោះដែរ ពោលក្នុង ជាង ២០ តោន គឺបង់ត្រឹម ៦ ទៅ ៧តោន តែប៉ុណ្ណោះ ដោយមានមេប៉ូលិសនៅច្រកព្រំដែនម្នាក់ទៀតជា អ្នកចេញមុខកាងរត់ការជាមួយមន្ត្រីជំនាញកាំកុងត្រូលផងដែរ ដែលនាំចូលស្ទើរគ្រប់ច្រកស្រប និងខុសច្បាប់ក្នុង ខេត្តកោះកុងទាំងអស់ ។
បើតាមសេចក្តីរាយការណ៍បន្តថាមេឈ្មួញដ៏ធំមួយនេះនៅពេលចេញដំណើរពី ខេត្តកោះកុងមកកាន់ក្រុងភ្នំពេញ គេបានរត់ការបង់លុយទៅឱ្យកាំកុងត្រូល គយនិងប៉ូលិសសេដ្ឋកិច្ចដែលនៅតាមផ្លូវគ្រប់ៗគ្នា ទើបការដឹកជញ្ជូន ប្រព្រឹត្តទៅដោយរលូនជារៀងរាល់យប់។
ឯក្រុមប្រជាពលរដ្ឋរកស៊ីតូចតាចបានលើកឡើងថាមេប៉ូលិសសេដ្ឋកិច្ចម៉ៅ ចាន់វិជ្ជា បាន សម្របសម្រួលជា អ្នកបើកផ្លូវ និងការពារឱ្យឈ្មួញធ្វើអាជីវកម្មនាំទំនិញខុសច្បាប់ចូលស្រុក និងទៅកាន់ទីផ្សារភ្នំពេញយ៉ាងសុវត្ថិភាព និងល្បីល្បាញបំផុត ។ បច្ចុប្បន្នហើយដែលគេមិនដឹងថា តើខ្សែ ម៉ៅ ចាន់វិជ្ជា នៅក្នុងអគ្គស្នងការនោះ ប៉ិនណាបាន ជាកាង ម៉ៅ ចាន់វិជ្ជា ឱ្យកាងឈ្មួញនាំចូលទំនិញខុសច្បាប់ឱ្យមានការគៃលួចបំបាត់ពន្ធរដ្ឋបែបនេះ ។
