សមត្ថកិច្ចចម្រុះដែលដឹកនាំដោយតំណាងអយ្យការបានចុះទៅត្រួតពិនិត្យឆែកឆេរទីតាំងស្តុកនិងកែច្នៃឈើប្រណីតដ៏ធំមួយកន្លែងក្បែរស្នាក់ការសន្តិសុខ ៧០៩ ហើយគេដឹងថា ទីតាំងនោះជារបស់លោក លន់ប៊ុនថុល ប៉ុន្តែទីបំផុតស្ថាប័នតុលាការ បែរជាមិនអាចធ្វើអ្វីលោក លន់ប៊ុនថុល បានឡើយ ។
មន្ត្រីមួយចំនួនបានឲ្យដឹងថាក្រោយពេលសមត្ថកិច្ចចម្រុះបង្ក្រាបទីតាំងកែច្នៃនិងស្តុកឈើប្រណីតខុសច្បាប់ របស់លោក លន់ ប៊ុនថុល ដែលធ្វើសកម្មភាពឡើងដុះស្លែទៅហើយនោះគេសង្កេតឃើញលោក លន់ ប៊ុនថុល រត់រកអន្តរាគមន៍និងព្យាយាមចាយលុយតាមគ្រប់រូបភាពដើម្បីឲ្យរួចផុតពីការចោទប្រកាន់តាមផ្លូវតុលាការ។ពិតជាមានប្រសិទ្ធភាពចំពោះអំណាចលុយដែលលោក លន់ ប៊ុនថុល បានយកទៅចាយវាយដើម្បីការពារមុខតំណែងនិងដើម្បីរួចផុតពីការកសាងសំណុំរឿងបញ្ជូនទៅកាន់តុលាការដែល លោក លន់ ប៊ុនថុលនៅតែមានសិទ្ធិសេរីភាពនិងអំណាចពេញដៃប្រឡូកជាមួយជំនួញឈើខុសច្បាប់ដដែល មិនខ្វល់ពីវិធានការកែទម្រង់ ឬបទបញ្ជារបស់ថ្នាក់លើនោះទេ។
សមត្ថកិច្ចចម្រុះធ្វើការឆែកឆេរត្រួតពិនិត្យរឹបអូសយកឈើបានហើយនោះ ត្រូវប្រឈមនឹងការកោះហៅទៅតុលាការឬឈានដល់ការឃុំខ្លួនដោយអនុវត្តន៍តាមច្បាប់មិនឲ្យរួចខ្លួននោះទេលើកលែងតែក្រុមឈ្មួញតូចតាចទាំងនោះមានលុយដាក់ធានាទើបអាចមានសេរីភាពវិញ។ ប៉ុន្តែសម្រាប់លោក លន់ ប៊ុនថុលដែលមានអំណាចប្រើស្បែកជាប៉េអឹមទៅប្រឡូកក្នុងជំនួញខុសច្បាប់ល្បីពេញតំបន់ កាបីក្នុងស្រុកស្នួលខេត្តក្រចេះត្រូវសមត្ថកិច្ចចម្រុះឆែកឆេររកឃើញឈើខុសច្បាប់ជាង១០០ម៉ែត្រត្រីគុណដែលស្តុកនិងកែច្នៃនៅក្នុងបរិវេណដ៏ធំមួយកន្លែងចម្ងាយប្រមាណ២០០ម៉ែត្រពីទីស្នាក់ការសន្តិសុខលេខ៧០៩ នៅតែមិនអាចធ្វើអ្វីលោក លន់ប៊ុនថុល បានទេមិនដឹងជាមានអាថ៌កំបាំងអ្វីព្រោះឈ្មួញតូចតាចមួយចំនួនគ្រាន់តែពាក់ព័ន្ធនឹងបទល្មើសឈើខុសច្បាប់២ទៅ៣ដុំត្រូវគេចាត់វិធានការកសាងសំណុំរឿងបញ្ជូនទៅតុលាការឬចាប់ឃុំខ្លួន មិនដែលមានការយោគយល់ទេ។
លោក លន់ ប៊ុនថុលបានបង្ហើបឲ្យដឹងថា កាលពី៥ឆ្នាំមុន លោក លន់ ប៊ុនថុលគឺជាមេឈ្មួញរកស៊ីប្រមូលទិញនិងដឹកជញ្ជូនឈើនាំចេញទៅស្រុកយួនល្បីពេញខេត្តកំពង់ចាម មិនដែលមាននរណាហ៊ានក្អកឬហ៊ានមើលមុខលោក លន់ប៊ុនថុល នោះទេប៉ុន្តែអំឡុងប្រតិបត្តិការបង្ក្រាបបទល្មើសព្រៃឈើទ្រង់ទ្រាយធំកាលពីឆ្នាំ២០១០ លោក លន់ ប៊ុនថុល បានរត់គេចខ្លួនមួយរយៈឲ្យរួចផុតពីបទចោទប្រកាន់ក្នុងបទល្មើសព្រៃឈើ ហើយមិនយូរប៉ុន្មានលោកលន់ ប៊ុនថុលបានចាយលុយរត់ការឡើងធ្វើជាប្រធានស្នាក់ការសន្តិសុខកងរាជអាវុធហត្ថលេខ៧០៩ ដែលមានមូលដ្ឋានឈរជើងក្នុងស្រុកស្នួល ខេត្តក្រចេះពោរពេញដោយឥទ្ធិពលអំណាច។
បញ្ហានេះលោក សរ ចំរ៉ុងជាអភិបាលខេត្តក្រចេះ តែងតែមើលរំលងពីភាពអសកម្មដែលលោក លន់ ប៊ុនថុលបានពង្រាយមន្ត្រីជំនិតៗរបស់ខ្លួនឲ្យដាក់ប៉ុស្តិ៍ជជុះចាំប្រដេញឡានដឹកឈើយកលុយរហូតដល់មានការរិះគន់ជាចំហថាស្នាក់ការសន្តិសុខលេខ ៧០៩ របស់លោក លន់ប៊ុនថុល គឺជាកុងត្រូលជជុះខុសច្បាប់ ៕
