ក្រុងប៉ោយប៉ែត ៖ មានសេចក្តីរាយការណ៍ពីក្រុងប៉ោយប៉ែតថា ទំនិញគេចពន្ធនាំចូលពីប្រទេសថៃកំពុងសម្រុកដឹកជញ្ជូនចូលទាំងយប់ទាំងថ្ងៃចូលតាមច្រកនានាក្នុងភូមិសាស្ត្រ ខ្សែបន្ទាត់ព្រំដែនឈរជើងរបស់វរៈសេនាតូចនគរបាលការពារព្រំដែនគោកលេខ៨៩១ ក្រោមការគ្រប់គ្រងរបស់លោក ហាំ វណ្ណៈ ជាមេបញ្ជាការ ។ គេមើលឃើញសកម្មភាពសម្រុកដឹកជញ្ជូនទំនិញសព្វសារពើឆ្លងដែនពីប្រទេសថៃមានសភាពខ្លាំងក្លាខុសពីសព្វមួយដង ដោយគ្មានការទប់ស្កាត់បង្ក្រាបបន្តិចណាសោះពីមន្ត្រីជំនាញនានាជាពិសេសក្រុមមន្ត្រីគរបាលរបស់លោក ហាំ វណ្ណៈ ដែលកំពុងឈរជើងគ្រប់ប៉ុស្តិ៍តាមច្រករបៀងទាំងអស់នោះ។
ប្រភពមួយបានរាយការណ៍ឲ្យដឹងថា នគរបាលការពារព្រំដែនគោកលេខ៨៩១ ដែលឈរជើងនៅចំណុច ខាងត្បូងផ្លូវជាតិលេខ៥ ក្រោមការគ្រប់គ្រងនិងបញ្ជាផ្ទាល់ដោយលោក ហាំ វណ្ណៈ មេបញ្ជាការប៉ូលិសការពារព្រំដែនគោកលេខ៨៩១ បានបណ្តែត បណ្តោយឲ្យកូនចៅក្រោមឱវាទឃុបឃឹតជាមួយឈ្មួញនាំទំនិញគេចពន្ឋ ចេញចូលតាមច្រករបៀងដូចគេហែរកឋិនទាំងថ្ងៃទាំងយប់។ មន្ត្រីប៉ុស្តិ៍ច្រករបៀងនិមួយៗបែរជាសប្បាយនឹងរាប់ក្បាលឡានដឹកទំនិញគេចពន្ឋយកលុយទៅវិញ ទង្វើនេះគឺផ្ទុយពីបទបញ្ជា និងការណែនាំរបស់ថ្នាក់លើទាំងស្រុង។
គេសង្កេតឃើញថា ចាប់ពីចំណុចមាត់ច្រកទ្វារអន្តរជាតិប៉ោយប៉ែត រហូតដល់ ច្រកអូរល្ហុងក្នុងភូមិសាស្ត្រខាងត្បូងផ្លូវជាតិលេខ៥ លោក ហាំវណ្ណៈ មេបញ្ជាការបានរាយកូនចៅប្រចាំច្រឆ្លងចេញចូល តាមបន្ទាត់ព្រំដែន ដូចជាលោក ណុលម៉ាប់ហៅស្តេចខ្លាធំ បុរសមាឌធំខ្មៅម្នាក់នេះជាមេប៉ុស្តិ៍ប្រចាំច្រកដើមពោធិ៍ មានការចរាចណ៏ បើកដៃអោយពលករខ្មែរលួចឆ្លងដែនខុសច្បាប់ផងដែរ។ នៅចំណុចច្រកបុរីថ្មីស្ថិតក្នុងភូមិអូរជ្រៅ ក្រុងប៉ោយប៉ែតច្រកនេះគ្រប់គ្រងដោយលោក ភោគ វិបុល បុរសមុខប្រជាប្រិយមានរហ័សនាមថាផ្ការីកគ្រប់រដូវ ច្រកមួយនេះគេអាចនិយាយបានថា ជាប៉ុស្តិ៏លេខ១សម្រាប់វរការពារព្រំដែនគោក លេខ៨៩១ ពីព្រោះលោក ភោគ វិបុល មានជំនាញខាងកាប់ដាវក្នុងការនាំទំនិញល្អៗ គេចពន្ឋ ដូចជាហ្គាសយ៉ាងច្រើនបំផុត ។
លោកភោគ វិបុល បានធ្លាប់នាំទំនិញឆ្លងដែន ដែលត្រូវបានមន្ត្រីជំនាញនានាចុះចាប់និងទប់ស្កាត់ ជាច្រើនដងនាពេលកន្លងមក ដូចជាការចុងអង្ករនាំសត្វមាន់រស់ ធុងហ្គាសតាមអំពើចិត្ត ហើយធ្លាប់ត្រូវបានមន្ត្រីជំនាញចុះចាប់ជាច្រើនលើកច្រើនសារ។ ប៉ុន្តែបើទោះជាមានការបង្ក្រាបជាច្រើនសារ គេឃើញលោកភោគវិបុលកាន់តេប្រព្រឹត្តបទល្មើសលើសដើម។ ច្រករបៀងមួយទៀតគឹច្រកដើមអង្គ្រង ដែលគ្រប់គ្រងដោយលោក សុខ គឿនដែលជាកូនចៅ លោក ភោគ វិបុល មានជំនាញខាងនាំសត្វមាន់រស់ និងបក្សាបក្សីគ្រប់ប្រភេទ ពីប្រទេសថៃចូលទឹកដីខ្មែរ គ្មានការត្រួតពិនិត្យពីមន្ត្រីពេទ្យសត្វអ្វីឡើយ។
បញ្ហានេះបានបង្កអោយមានការព្រួយបារម្ភជាខ្លាំងអំពីសុវត្តិភាពប្រជាពលរដ្ឋខ្មែរងាយឆ្លងនិងជំងឺផ្តាសសាយបក្សី។ ក្រៅពីច្រករបៀងខាងលើនេះនៅមានច្រករបៀងជាច្រើនទៀតដែលកំពុងប្រព្រឹត្តទង្វើដូចៗគ្នានេះ។ ការបណ្តែតបណ្តោយឲ្យមានការរត់ពន្ធទំនិញដ៏ច្រើនសន្ធឹកសន្ធាប់ដែលគ្មានវិធានការទប់ស្កាត់ពីប្រធានអង្គភាពតួយ៉ាងដូច លោក ហាំ វណ្ណៈ មេបញ្ជាការវរៈសេនាតូចនគរបាលការពារព្រំដែនគោកលេខ៨៩១ នេះគឺបានធ្វើឲ្យរដ្ឋបាត់ចំណូលពន្ធជាច្រើន ដែលប្រការនេះទាមទារឲ្យមន្ត្រីជំនាញពាក់ព័ន្ធ និងថ្នាក់លើគួរមានវិធានការលុបបំបាត់ជាបន្ទាន់៕
