កំពតៈ ប្រភពខ្សឹបចេញពីមន្ទីរសុខាភិបាលខេត្តកំពតបានឲ្យដឹងថាលោក ញា ប៊ុនថន ប្រធានមន្ទីរសុខាភិបាលខេត្តកំពតរួមនិងមនុស្សជំនិតមួយចំនួនត្រូវបានមន្ត្រីរាជការនៅក្នុងមន្ទីរមួយនេះអះអាងថាបានប្រព្រឹត្តអំពើពុករលួយយ៉ាងសកម្មចាប់តាំងពីរូបគាត់ត្រូវបានតែងតាំងជាប្រធានមន្ទីរដែលជាហេតុ ធ្វើឲ្យរដ្ឋបាត់បង់ថវិការក្នុងមួយឆ្នាំៗរាប់រយលានរៀល។
ប្រភពដដែលនោះបានបន្តទៀតថាចាប់តាំងពីការតែងតាំងលោក ញា ប៊ុនថន ជាប្រធានមន្ទីរសុខាភិបាលខេត្តកំពត ជំនួសលោក លឹម កាំងអៀង ដែលចូលនិវត្តន៍មក រូបគាត់បានរួមដៃជាមួយមន្ត្រីសំខាន់ៗក្នុងមន្ទីរ ជាពិសេសគឺរួមដៃជាមួយលោកប្រធានការិយាល័យគណនេយ្យឈ្មោះ ហែម ស៊ីថន និងអនុប្រធានការិយាល័យលោក សៀន សុផន ធ្វើការបំប៉ោងតួលេខចំណាយតាមជំពូក តាមគណនេយ្យនិងអនុគណនេយ្យនានាលើខ្ទង់ចំណាយថវិការរបស់មន្ទីរសុខាភិបាលដើម្បីជាប្រយោជន៍ធ្វើមានធ្វើបានសំរាប់តែក្រុមរបស់ពួកគាត់។
ប្រពភខាងលើបានបញ្ជាក់បន្លែមថាការប្រព្រឹត្តអំពើពុករលួយរបស់លោក ញា ប៊ុនថន និងគូកន គឺមានច្រើនករណី ប៉ុន្តែប្រាក់ដែលពួកគេ រួមគ្នាធ្វើការបំប៉ោងតួលេខចំណាយនោះភាគច្រើនជាប្រភេទថវិការបុរេប្រទាននិងប្រាក់ទូទាត់ត្រង់។ ហើយចំណុចពិសេសនៃ អំពើពុករលួយដែលពួកគេឃុបឃិតគ្នាកិបកេងយ៉ាងសាហាវនោះគឺថវិការជំនួយដល់ប្រជាជនសំរាកពេទ្យនិងថវិការសម្រាប់អាហារនិង សម្ភារៈ(របបអាហារអ្នកជម្ងឺ)ដែលថវិការសម្រាប់ចំណាយលើកម្មវិធីទាំងពីរនេះក្នុងមួយឆ្នាំៗចំណាយរាប់រយលានរៀល ឯណោះ ។
ប៉ុន្តែបើពិនិត្យមើលស្ថានភាពជាក់ស្តែង នៅតាមមន្ទីរពេទ្យបង្អែកទាំងបួនរបស់ខេត្តកំពត គឺឃើញថា មានអ្នកជម្ងឺយ៉ាងច្រើនបំផុតត្រឹម១០%នៃអ្នកជម្ងឺសរុបដែលទទួលយកបាននូវរបបអាហារក្នុងពេលចូលសម្រាកពេទ្យដែលមានតម្លៃអាហារត្រឹមតែ២៥០០រៀល សម្រាប់មួយថ្ងៃនោះ។
តាមដឹងថាអ្នកជំងឺទាំងអស់នៅពេលចូលសម្រាកព្យាបាលនៅតាមមន្ទីរពេទ្យបង្អែកទាំងបួនគឺពួកគាត់តែងតែត្រូវបានគេកត់ ឈ្មោះសម្រាប់ទទួលអាហារពេទ្យ ប៉ុន្តែជាក់ស្តែងគឺ៩០%នៃអ្នកជម្ងឺគឺពួកគាត់ពុំបានរបបអាហារដែលមានតម្លៃត្រឹម២៥០០៛ សម្រាប់ ពិសាចំនួនពីរពេល គឺពេលថ្ងៃនិងពេលល្ងាច តែទោះបីអ្នកជម្ងឺទាំងនោះមិនទទួលរបបអាហារពេទ្យក្តី ក៏មន្ត្រីនៅក្នុងមន្ទីរពេទ្យនិង ប្រធានអនុប្រធានការិយាល័យគណនេយ្យរួមនិងលោកប្រធានមន្ទីរ ញា ប៊ុនថន ធ្វើរបាយការណ៍ចំណាយទៅលើរបបអាហារអ្នកជំងឺ ទាំងនោះ ពុំមានបាត់ឈ្មោះនរណាមួយទេ។ ហើយថវិការនេះត្រូវបានលោក ញា ប៊ុនថន រួមនិងប្រធានការិយាល័យគណនេយ្យធ្វើ ការបែងចែកផលប្រយោជន៍គ្នាតាមឋានានុក្រមនៃក្រុមរបស់ពួកគាត់។
លោក ញា ប៊ុនថន ដើមឡើយគ្រាន់តែជាមន្ត្រីពេទ្យយោធាដែលសំបូរធនធានដោយឃើញ ឱកាសល្អរូបគាត់បានប្តូរមកបំរើការងារមន្ទីរសុខាភិបាលខេត្តកំពតកាន់កម្មវិធីអេដស៍ និងជាអនុប្រធានមន្ទីរមួយរយៈខ្លី ដោយសារ រូបគាត់ពូកែទំនាក់ទំនងជាមួយមន្ត្រីមានអំណាចនៅក្នុងខេត្តនិងក្រសួង រួមផ្សំនិងទឹកប្រាក់ដែលកឹបកេងបានពីកម្មពិធីអេដស៍ក៏បាន រត់ការយកតំណែងជាប្រធានមន្ទីរសុខាភិបាលជំនួសលោក លឹម កាំងអៀង ដែលដល់អាយុចូលនិវត្តន៍ ៕ អ្នកយកព័ត៌មានយើងមិនអាចសុំការបំភ្លឺពីលោក ញា ប៊ុនថន បានទេដោយមិនអាចរកលេខទូរសព្ទ័ទំនាក់ទំនងបាន។
