កំពតៈ តាមប្រភពព័ត៌មានពីប្រជាពលរដ្ឋដែលរកស៊ីដឹកទំនិញតិចតូចចេញចូលតាមច្រកព្រែកចាកបានឲ្យដឹងថាលោក ណុប សារឹម បានចាត់តាំងឲ្យនគរបាលអន្តោប្រវេសន៍ក្រោមការគ្រប់គ្រងរបស់ខ្លួន ដំទ្បើងថ្លៃសេវា ការឆ្លងដែនទៅមកនិងគាបសង្កត់អាជីវករដែលរកស៊ីដឹកទំនិញបន្តិចបន្តួចដោយតម្រូវឲ្យបង់ប្រាក់ក្នុងម៉ូតូមួយគ្រឿងដល់ទី២ម៉ឺនរៀល។
ចំពោះករណីរឿងអាស្រូវពុករលួយរបស់លោក ណុប សារឹម មេនគរបាលអន្តោប្រវេសន៍ច្រកព្រែកចាក ស្រុកកំពង់ត្រាច ខេត្តកំពត កំពុងត្រូវបានលាតត្រដាងជាសាធារណៈដើម្បីឲ្យក្រសួងមហាផ្ទៃ និងអគ្គស្នងការនគរបាលជាតិបានជ្រួលជ្រាមអំពីបញ្ហានេះ។
ប្រជាពលរដ្ឋរកស៊ីដឹកទំនិញឆ្លងកាត់ច្រកព្រំដែនព្រែកចាកបានឲ្យដឹងទៀតថា ឥទ្បូវនេះពួកគាត់ពិបាករកស៊ីចិញ្ចឹមជីវិតខ្លាំងណាស់ព្រោះលោក ណុប សារឹម ដែលជាមេនគរបាលអន្តោប្រវេសន៍ថ្មីកំពុងប្រព្រឹត្តអំពើពុករលួយជំរិតយកលុយពីពួកគាត់តាមអំពើចិត្ត។ ពួកគាត់គ្រាន់តែដឹកទំនិញតិចតួចឆ្លងកាត់ព្រំដែន ត្រូវបង់ក្នុងម៉ូតូមួយគ្រឿង២ម៉ឺនរៀលហើយបើដឹកមនុស្សឆ្លងដែនក៏ត្រូវគេដំទ្បើងថ្លៃក្នុងម្នាក់១០ម៉ឺនដុងផងដែរ ដែលកន្លងមកបង់ត្រឹម៥ម៉ឺនដុងប៉ុណ្ណោះ។ គេមិនដឹងថា លោក ណុប សារឹម ចំណាយលុយប៉ុន្មានដើម្បីបានកាន់តំណែងជាមេនគរបាលអន្តោប្រវេសន៍ច្រកព្រែកចាកនោះទេទើបបុគ្គលនេះខំប្រឹងប្រព្រឹត្តអំពើពុករលួយស្រង់ដើមយ៉ាងក្រអឺតក្រទមបំផុត។
ប្រជាពលរដ្ឋដែលចេញចូលឆ្លងដែនតាមច្រកព្រែកចាកបានឲ្យដឹងថា ចាប់តាំងពីពេលលោក ណុប សារឹម មកឈរជើងនៅទីនេះគាត់បានប្រមូលលិខិតឆ្លងដែនបោះត្រាក្នុងមួយក្បាលតម្លៃ៣០ដុល្លារ ដោយមានអ្នករត់ការទៀតផង។ អាចនិយាយបានថា លោក ណុប សារឹម កំពុងប្រើប្រាស់គ្រប់មធ្យោបាយដើម្បីប្រមូលផលប្រយោជន៍ផ្ទាល់ខ្លួនយ៉ាងងងើលបំផុត ដែលសូម្បីដែលអាជ្ញាធរខេត្តកំពត និងស្នងការនគរបាលខេត្តកំពតក៏មិនសប្បាយចិត្តចំពោះទង្វើរបស់បុគ្គលនេះដែរ។ ដូច្នេះសូមរដ្ឋមន្ត្រីក្រសួងមហាផ្ទៃក៏ដូចជាលោក នេត សាវឿន អគ្គស្នងការនគរបាលជាតិត្រូវចាត់វិធានការទប់ស្កាត់អំពើពុករលួយរបស់បុគ្គល ណុប សារឹម និងបក្ខពួកជាបន្ទាន់កុំឲ្យអំពើពុករលួយរាលដាលតទៅទៀត៕
