ខេត្តបន្ទាយមានជ័យ ៖លោក ទុង ប៊ុនធឿន ដែលជាអនុសាខាគយនិងរដ្ឋាករខេត្តបន្ទាយមានជ័យកំពុងផ្គើនអនុសាសន៏សមេ្តចតេជោក្នុងការដាក់កុងត្រូលចាំទាយកលុយពីក្រុមឈ្មួញដោយមិនបានត្រួតពិនិត្យទំនិញល្មើសច្បាប់ឡើយ។ តែក្រុមអ្នករកស៊ីដឹកជញ្ជូនទំនិញបាននិយាយថាសេចក្តីណែនាំរបស់អភិបាលខេត្តបន្ទាយមានជ័យក្នុងការលុបបំបាត់កុងត្រូលជជុះធ្វើឡើងគ្រាន់តែល្អមើលប៉ុណ្ណោះពីព្រោះមន្ត្រីគយចល័តបានអះអាងថាទីតាំងឈរជើងរបស់ពួកគេនៅចំណុចសាលាក្រហមក្នុងភូមិសិង្ហខាងលិចឃុំសិង្ហ ស្រុកអូរជ្រៅ ខេត្តបន្ទាយមានជ័យ គឺជាចំណុចប៉ុស្តិ៍ត្រួតពិនិត្យស្របច្បាប់មិនមែនជាប្រភេទកុងត្រូលជជុះនោះទេ។
ទោះជាយ៉ាងណាក៏ដោយគេសង្កេតឃើញជំនាញគយចល័តនៅចំណុចសាលាក្រហមស្ថិតក្រោមការគ្រប់គ្រងដោយផ្ទាល់របស់លោក ទុង ប៊ុនធឿន ជាអនុសាខាគយនិងរដ្ឋាករខេត្តបន្ទាយមានជ័យបានបង្កភាពអនាធិបតេយ្យបង្ខំឲ្យអ្នករកស៊ីដឹកទំនិញតូចតាចត្រូវបង់លុយក្នុងមួយជើងចាប់ពី ២ម៉ឺនដល់៥ ម៉ឺនរៀល អាស្រ័យទៅតាមប្រភេទទំនិញ ។
ក្រុមគយចល័ត ខេត្តបន្ទាយមានជ័យនៅតែបន្តជំរិតក្រុមអ្នករកស៊ីដឹកជញ្ជូនទំនិញឲ្យបង់លុយតាមរបៀបកុងត្រូលជជុះផ្ទុយពីសេចក្តីណែនាំ របស់លោក គោ ស៊ុំសារឿតជាប្រធានគណៈអភិបាល ខេត្តបន្ទាយមានជ័យគ្មានការកែទម្រង់។
ក្រុមអ្នកដឹកទំនិញតាមប្រភេទ រថយន្តខ្សែធំៗ ដែលមានទំនាក់ទំនងល្អនិងបង់លុយដោយផ្ទាល់ជូនលោក ថោង សុខាំភូ ដែលជាប្រថានសាខាគយក៏ជាប់កាតព្វកិច្ច ចូលបង់លុយ ថ្លៃក្បាលឡាន ឲ្យជំនាញគយចល័តនៅចំណុចសាលាក្រហមផងដែរ។ ក្រុមអ្នករកស៊ីដឹកជញ្ជូនទំនិញបានរអ៊ូរទាំពីសកម្មភាពគាបជំរិត ឲ្យពួកគេបង់លុយដោយគ្មានការយោគយល់ ហើយសម្រាប់រថយន្តដឹកទំនិញមួយចំនួនដែលបើកហួសចំណុចសាលាក្រហម ភ្លេចចូលបង់លុយថ្លៃក្បាលឡានគេសង្កេតឃើញ គយចល័តទាំងនោះ ចេញរថយន្តតាមប្រដេញ ឡានដឹកទំនិញដើម្បីចាប់យកមកផាកពិន័យ ក្នុងកម្រិតខ្ពស់ដូចជារថយន្តដឹកផ្លែឈើប្រភេទនីសាន់ ឬកាមរីដែលត្រូវបង់ថ្លៃក្បាលឡានប្រមាណ ២ម៉ឺនទៅ៥ ម៉ឺនរៀលត្រូវគេបង្ខំឲ្យបង់ប្រាក់ពិន័យចាប់ពី ៥០ម៉ឺនរៀល ដល់២ លានរៀល។
លោក គោ ស៊ុំសារឿតអាចចាត់វិធានការលុបបំបាត់ កុងត្រូលជជុះរបស់គយចល័យ ខេត្តបន្ទាយមានជ័យនៅចំណុចសាលាក្រហម របស់លោក ទុង ប៊ុនធឿន បានឬក៏អត់ ព្រោះអំណាចនិងឥទ្ធិពលរបស់លោក ថោង សុខាំភូ ជាប្រធានសាខាគយនិងរដ្ឋាករខេត្តបន្ទាយមានជ័យ ។ រឿងសំខាន់ នោះជំនាញគយចល័ត ដែលដាក់ប៉ុស្តិ៍នៅចំណុច សាលាក្រហម គឺជាអ្នករកលុយមកផ្គត់ផ្គង់ឆ្នាំងបាយរបស់លោក ថោង សុខាំភូ ហើយក៏មានការបែងចែកផងដែរទៅឲ្យថ្នាក់ដឹកនាំខេត្ត ៕
