ខេត្តរតនគិរី ៖ អាងខ្លូនជាកូនប្រសារលោកប្រធានមន្ទីរសាធារណការធ្វើអាជីវកម្មបូមខ្សាច់ដឹកជញ្ជូនបំផ្លាញផ្លូវរបស់ប្រជាជននៅស្រុកលំផាត់។ តាមការឲ្យដឹងថាផ្លូវលំមួយខ្សែមានប្រវែងជាង៥០០ម៉ែត្រដែលប្រជាពលរដ្ឋតែងធ្វើដំណើរឆ្លងកាត់ក្នុងភូមិបានរងនូវការខូចខ្ទេចខ្ទាំយ៉ាងធ្ងន់ធ្ងរ ដោយសារតែឈ្មួញធ្វើអាជីវកម្មបូមខ្សាច់ ហើយដឹកជញ្ជូនធ្ងន់បំផ្លាញផ្លូវមួយខ្សែនេះទាំងស្រុង តែអាជ្ញាធរ និងសមត្ថកិច្ចមូលដ្ឋានពុំមានវិធានការអសមត្ថភាពធ្វើការទប់ស្កាត់គិតគូរថែរក្សា ផ្លូវសាធារណៈបម្រើផលប្រយោជន៍ឲ្យប្រជាពលរដ្ឋនោះឡើយ ។
ជាក់ស្តែង នៅថ្ងៃទី១៨ ខែកញ្ញា ឆ្នាំ២០១៤ រថយន្តម៉ាកហ៊ីយ៉ានដាយចំណុះបាន១៥តោនកំពុងធ្វើចរាចរនៅលើកំណាត់ផ្លូវលំមួយខ្សែនេះ ហើយផ្ទុកដោយដីខ្សាច់ពេញប្រៀប បានជាប់ផុងនៅចំណុចដែលរងការខូចខាតមិនអាចទៅមកបាន ដោយសារផ្លូវលំនេះពីមួយថ្ងៃទៅមួយថ្ងៃបានស្រុតចុះក្លាយជារណ្តៅជ្រៅលិចកង់ឡាន ដែលជាផលប៉ះពាល់ដល់ការធ្វើដំណើររបស់ប្រជាពលរដ្ឋក្នុងតំបន់នេះទាំងមូល ។
ប្រជាពលរដ្ឋនិយាយថា លោក ស្រ៊ុន កូនប្រសាររបស់លោកប្រធានមន្ទីរសាធារណការខេត្តរតនគិរី កំពុងសកម្មក្នុងការបូមយកដីខ្សាច់ពីក្នុងទន្លេស្រែពកខួបប្រាំងខួបវស្សាធ្វើអាជីវកម្មធ្វើមាន ធ្វើបាន ពុំមានកង្វល់អ្វីឡើយដោយសារឈ្មួញរូបនេះអាងទៅលើឪពុកក្មេកជាប្រធានមន្ទីរសាធារណការស្រាប់ និងឃុបឃិតជាមួយអាជ្ញាធរមូលដ្ឋានផងនោះ បុគ្គលរូបនេះរិតតែមានមោទនភាពយ៉ាងក្រៃលែង ។
ចំណែកការពាក់ព័ន្ធករណីខាងលើនេះលោក ជីម ផាត់ មេឃុំជ័យឧត្តម និងលោក គង់ ស្រ៊ុន អភិបាលគណៈអភិបាលស្រុកលំផាត់ ធ្វើមិនដឹងមិនលឺ ហាក់បីដូចជាពួកគាត់ពុំបានឈរជើងនៅទីនោះ ចំណែកការដឹកជញ្ជូនរបស់រថយន្តធុនធ្ងន់ខាងលើក៏នៅដឹកបន្តកន្ទុយគ្នាដដែលឥតឈប់ឈរ ។
ប្រជាពលរដ្ឋក្នុងភូមិលំផាត់ ឃុំជ័យឧត្តម ស្រុកលំផាត់ បានសង្កេតឃើញថា មួយរយៈកន្លងទៅនេះ អាជ្ញាធរខេត្តក៏ដូចជាប្រមុខរាជរដ្ឋាភិបាលតែងតែគិតគូរជានិច្ចពីបញ្ហាអភិវឌ្ឍន៍មូលដ្ឋានជនបទ ក្នុងនោះក៏ផ្តោតយ៉ាងសំខាន់ទៅលើការកសាងហេដ្ឋារចនាសម្ព័នផ្លូវគមនាគមន៍ ជូនប្រជាពលរដ្ឋ ។ ប៉ុន្តែខណៈក្រុមឈ្មួញឆ្លៀតឱកាសធ្វើអាជីវកម្មបូមយកខ្សាច់បំផ្លាញផ្លូវដែលជាទ្រព្យសម្បត្តិរបស់ជាតិប៉ះពាល់ផលប្រយោជន៍របស់ប្រជាពលរដ្ឋ បែរជាគ្មានអ្នកណាមកអើពើទៅវិញ ។
ចាប់ដៃ ពុំអាចសុំការបំភ្លឺពីឈ្មួញឈ្មោះ ស្រ៊ុន ជុំវិញបញ្ហាអាជីវកម្មបូមខ្សាច់បំផ្លាញផ្លូវលំមួយខ្សែក្នុងភូមិលំផាត់ ឃុំជ័យឧត្តម ស្រុកលំផាត់ នៅថ្ងៃទី២០ ខែកញ្ញា ឆ្នាំ២០១៤ ដោយគ្មានលេខទូរស័ព្ទ ៕
