ប្រភពពីសមត្ថកិច្ចពាក់ព័ន្ធមួយចំនួនបានឲ្យដឹងថា លោក ឯម ស៊ីថា ដែលជាមេគយច្រកភ្នំដិន កំពុងប្រព្រឹត្តអំពើពុករលួយបើកដៃឲ្យឈ្មួញនាំចូលទំនិញគេចពន្ធតាមច្រករបៀងពីរកន្លែង នៅក្បែរច្រកអន្តរជាតិភ្នំដិន យ៉ាងពេញបន្ទុក។ ឈ្មួញទាំងបីនាក់ដែលអាចនាំទំនិញគេចពន្ធចូលតាមច្រករបៀងតាមអំពើចិត្តនោះ មានឈ្មោះ ចែស្រី ឈ្មោះចន្ថា និងឈ្មោះ ចែពៅ អ្នកទាំងបីនេះរស់នៅក្នុងឃុំទន្លាប់ ស្រុកគិរីវង់ ខេត្តតាកែវ។ ការនាំចូលទំនិញគេចពន្ធរបស់ឈ្មួញទាំងបីនាក់នេះ បានធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗដូច្នេះ សូមលោក គុណ ញឹម ជាអគ្គនាយកនៃអគ្គនាយកដ្ឋានគយ ដែលទើបតែចូលកាន់តំណែងជំនួសលោក ប៉ែន ស៊ីម៉ន ចាត់វិធានការទប់ស្កាត់ជាបន្ទាន់បំផុតជុំវិញបញ្ហានេះ។
ប្រភពបានឲ្យដឹងទៀតថា ឈ្មួញឈ្មោះចែស្រី ឈ្មោះចន្ថា និងឈ្មោះពៅ បានដឹកទំនិញតាមច្រករបៀងពីរកន្លែង ជិតច្រកភ្នំដិន មកស្តុកទុកនៅតំបន់ច្បារអំពៅ ខណ្ឌមានជ័យ រាជធានីភ្នំពេញ ដើម្បីចែកចាយឲ្យម៉ូយបន្ត។ ជាទូទៅទំនិញគេចពន្ធទាំងនោះមានដូចជាឥវ៉ាន់ចាប់ហួយ គ្រឿងអេឡិចត្រូនិក នាំចូលពីប្រទេសយួន ហើយត្រូវគេដឹកចេញតាមច្រករបៀងក្នុងមួយយប់យ៉ាងតិចពី១០ទៅ១២រថយន្តទួរីស ដោយក្នុង១រថយន្តមានចំណុះប្រមាណ៣តោន។ ទំនិញទាំងនោះត្រូវបានគេដឹកចេញតាមច្រករបៀងនៅវេលាម៉ោង៨និង៣០នាទី ដល់ម៉ោង៩យប់ ហើយធ្វើដំណើរតាមផ្លូវជាតិលេខ២ ឆ្ពោះមកតំបន់ច្បារអំពៅនៅវេលាម៉ោងជាង១២ ឬម៉ោង១ រំលងអធ្រាត្រ។
គេមិនដឹងថា លោក ឯម ស៊ីថា ទទួលបានផលប្រយោជន៍ក្នុងកម្រិតណាពីឈ្មួញទាំងបីនាក់ខាងលើនេះទេ ទើបបានជាបណ្តោយឲ្យមានការនាំចូលទំនិញគេចពន្ធជាពិសេសគ្រឿងអេឡិចត្រូនិក ដែលត្រូវបង់ពន្ធក្នុងកម្រិតខ្ពស់។ ដូច្នេះសូមលោក គុណ ញឹម ដែលជាអគ្គនាយកគយថ្មីចាត់វិធានការទប់ស្កាត់អំពើពុករលួយរបស់មេគយច្រកភ្នំដិន ជាបន្ទាន់បំផុត ដើម្បីកុំឲ្យឃុបឃិតជាមួយឈ្មួញខិលខូចតទៅទៀត។ មានន័យថា លោក គុណ ញឹម ត្រូវអនុវត្តន៍តាមគោលនយោបាយកែទម្រង់ស៊ីជម្រៅរបស់រដ្ឋាភិបាលលោក ហ៊ុន សែន ជាបន្ទាន់ហើយមិនត្រូវទុកឲ្យមេគយច្រកភ្នំដិននេះ និងឈ្មួញខិលខូចឃុបឃិតគ្នាបំផ្លាញចំណូលពន្ធរដ្ឋតទៅទៀតឡើយ៕
