រាជរដ្ឋាភិបាលកម្ពុជាប្រកាសផ្អាកការប្រារព្ធពិធីបុណ្យអុំទូក ដែលធ្វើធំ ស្ទើរជារៀងរាល់ឆ្នាំនៅព្រះបរមរាជវាំងនោះ ដោយសារនៅឆ្នាំ២០១៣នេះ មានទឹកជំនន់ធ្ងន់ធ្ងរ។
សារាចរចុះហត្ថលេខាដោយលោកនាយករដ្ឋមន្ត្រី ហ៊ុន សែន នៅថ្ងៃទី៦ខែតុលានេះ បានឲ្យដឹងថា ការផ្អាកព្រះរាជពិធីបុណ្យអុំទូកនៅឆ្នាំនេះ ដើម្បីប្រមូលកម្លាំងសរុប មធ្យោបាយសរុប សម្រាប់ដោះស្រាយបញ្ហាទឹកជំនន់។ បើតាមសារាចរដដែលនេះ ទឹកជំនន់ទន្លេមេគង្គដែលមានសភាពធ្ងន់ធ្ងរ បានបណ្តាលឲ្យសាលារៀន វត្តអារាម មន្ទីរពេទ្យ ផ្ទះរបស់ប្រជាពលរដ្ឋ ផលដំណា និងសត្វពាហនៈជាច្រើន ត្រូវរងការបំផ្លាញ និងធ្វើឲ្យប្រជាជននៅតំបន់ទឹកលិចមួយចំនួនបាត់បង់ជីវិត។
ប៉ុន្តែសារាចរ បានបញ្ជាក់ថា ការរៀបចំពិធីបុណ្យអុំទូកបណ្តែតប្រទីប សំពះព្រះខែ និងអកអំបុក នៅតាមទីកន្លែងដទៃ នឹងប្រព្រឹត្តទៅជាធម្មតា តាមទម្លាប់ និងតាមប្រពៃណីរបស់ប្រជាពលរដ្ឋ។ ចំណែកការឈប់សម្រាកការងាររបស់មន្ត្រីរាជការ និងកម្មករនិយោជិកចំនួន៣ថ្ងៃនឹងអនុវត្តតាមប្រតិទិនឈប់សម្រាកជាធម្មតា។
ពិធីបុណ្យអុំទូក ធ្លាប់បានផ្អាកជាច្រើនដងមកហើយ ក្រោយពីការជាន់គ្នាស្លាប់មនុស្ស និងរបួស រាប់រយនាក់នៅស្ពានកោះពេជ្រ និងដោយសារការចូលរួមកាន់មរណទុក្ខដល់ព្រះបរមរតនៈកោដ្ឋ សម្តេចឳជាដើម៕
