នៅក្នុងទឹកដីយោធភូមិភាគ១ និងយោធភូមិភាគ២ នរណាក៏ស្គាល់លោកស័ក្តិ៥ ថន ប៊ុនធី ហៅធីបាញ់ ដែលជាមន្ត្រីយោធា ល្បីល្បាញខាង ប្រព្រឹត្តបទល្មើសបំផ្លាញព្រៃឈើនិងដឹក ជញ្ជូនឈើប្រណីតធ្វើអាជីវកម្មខុសច្បាប់ដែរ ប៉ុន្តែពុំមាននរណាហ៊ានប៉ះពាល់ឡើយ។ កាលពីខែកក្កដា ឆ្នាំ២០១៤ ក្រុមឈ្មួញរកស៊ីឈើខុសច្បាប់ដែលជាបក្ខពួករបស់ ថន ប៊ុនធី ហៅធីបាញ់ បានប៉ះទង្គិចជាមួយសមត្ថកិច្ចចម្រុះ ហើយផ្ទុះអាវុធទៅត្រូវស្ត្រីកូនខ្ចីម្នាក់បណ្តាលឲ្យរងរបួស ដែលប្រតិបត្តិការនោះដឹកនាំដោយលោក ហាក់ ហ៊ាន ព្រះរាជអាជ្ញារងអមសាលាដំបូង ខេត្តក្រចេះ។
ប្រជាពលរដ្ឋរស់នៅតំបន់ភូមិភាគឦសាន នៃប្រទេសកម្ពុជា ជាពិសេសនៅក្នុងខេត្តក្រចេះ បានអំពាវនាវឲ្យលោក ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ ចាត់វិធានការលើមន្ត្រីយោធាឈ្មោះ ថន ប៊ុនធី ហៅធីបាញ់ ជាបន្ទាន់បំផុត ព្រោះជននេះ កំពុងមានឈ្មោះល្បីល្បាញខាងរកស៊ីឈើខុសច្បាប់ជាយូរមកហើយ។ ប្រសិនបើអគ្គមេបញ្ជាការនៃកងយោធពលខេមរភូមិន្ទ ព្រងើយកន្តើយទុកឲ្យបុគ្គល ថន ប៊ុនធី ហៅធីបាញ់ ប្រព្រឹត្តអំពើខុសច្បាប់តទៅទៀតនោះ អាចនាំឲ្យប៉ះពាល់ដល់កេរ្តិ៍ឈ្មោះស្ថាប័នកងយោធពលខេមរភូមិន្ទទាំងមូលតែម្តង។ ប្រជាពលរដ្ឋបានរិះគន់ថា មួយរយៈពេលចុងក្រោយនេះ ថន ប៊ុនធី ហៅធីបាញ់ បង្ហាញអំណាចកាន់តែខ្លាំងក្លាក្នុងការដឹកជញ្ជូនឈើខុសច្បាប់តាមរថយន្តធំៗ យកទៅលក់នៅស្រុកយួន យ៉ាងក្រអឺតក្រទមបំផុត។
សេចក្តីរាយការណ៍ពីសមត្ថកិច្ចពាក់ព័ន្ធមួយចំនួនបានឲ្យដឹងថា ថន ប៊ុនធី ហៅធីបាញ់ បានដឹកជញ្ជូនឈើចេញពីតំបន់ស្រែស្បូវ ដែលជាចំណុចព្រំប្រទល់បីខេត្ត គឺខេត្តស្ទឹងត្រែង រតនគិរី និងមណ្ឌលគិរី ឆ្លងកាត់តំបន់ខ្លាស្ទុះ មកស្រុកស្នួល ខេត្តក្រចេះ ឆ្ពោះទៅស្រុកមេមត់ ខេត្តត្បូងឃ្មុំ ហើយយកទៅលក់នៅស្រុកយួនយ៉ាងរលូន។ មេឈ្មួញឈ្មោះ ថន ប៊ុនធី ហៅធីបាញ់ ត្រូវបានគេដឹងថា ចំណុះឲ្យឧកញ៉ា សឹង សំអុល ដែលជាមេឈ្មួញរកស៊ីឈើខុសច្បាប់ដ៏ធំក្នុងខេត្តត្បូងឃ្មុំ ដោយបង់លុយឲ្យឧកញ៉ា សឹង សំអុល ក្នុងឈើ១ម៉ែត្រគូប ពី៧០០ទៅ៨០០ដុល្លារ។ សមត្ថកិច្ចពាក់ព័ន្ធនៃបណ្តាខេត្តខាងលើនេះ សុទ្ធតែទទួលបានផលប្រយោជន៍ពី ថន ប៊ុនធី ហៅធីបាញ់ និងឧកញ៉ា សឹង សំអុល ហេតុនេះហើយ ទើបគេបណ្តោយឲ្យឈ្មួញទាំងពីរនាក់នេះ ឃុបឃិតគ្នាដឹកជញ្ជូនឈើប្រណីតយកទៅលក់នៅស្រុកយួនយ៉ាងគគ្រឹកគគ្រេង៕
