លោក ឱម យ៉ិនទៀង ជាទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយកំពុងរងការចោទប្រកាន់ថាបានប្រព្រឹត្តអំពើពុករលួយនិងបិទបាំងអំពើពុករលួយដើម្បីផលប្រយោជន៍ផ្ទាល់ខ្លួនយ៉ាងត្រជាក់ចិត្ត។ ជាក់ស្តែង ក្នុងយុទ្ធនាការប្រឆាំងអំពើពុករលួយរយៈពេលប៉ុន្មានឆ្នាំកន្លងទៅនេះ លោក ឱម យ៉ិនទៀង មិនដែលហ៊ានប៉ះពាល់មន្ត្រីពុករលួយធំៗដែលមានតំណែងជារដ្ឋមន្ត្រី រដ្ឋលេខាធិការ ឬអគ្គនាយក នៃអគ្គនាយកដ្ឋាននានា ដែលល្បីល្បាញខាងប្រព្រឹត្តអំពើពុករលួយនោះទេ។ ផ្ទុយទៅវិញលោក ឱម យ៉ិនទៀង ហ៊ានចាត់ការតែមន្ត្រីពុករលួយតូចតាចប៉ុណ្ណោះ ដូចជាការចាប់ខ្លួនលោក ហ៊ី ណារិន អធិការនគរបាលខណ្ឌមានជ័យ កាលពីថ្ងៃទី៣០ ខែកញ្ញា ឆ្នាំ២០១៤ ជាដើម។ ប្រការនេះហើយ ដែលលោក ឱម យ៉ិនទៀង កំពុងប្រឈមនឹងការរិះគន់យ៉ាងពេញបន្ទុកស្របពេលដែលគាត់មានទ្រព្យសម្បត្តិយ៉ាងមហាសាល និងមានភូមិគ្រឹះតម្លៃរាប់លានដុល្លារ។
ទាក់ទងទៅនឹងបញ្ហាខាងលើនេះ លោក សុន ឆ័យ តំណាងរាស្រ្តគណបក្សសង្គ្រោះជាតិ និងជាអនុប្រធានគណៈកម្មការទី២ ទទួលបន្ទុកហិរញ្ញវត្ថុ និងធនាគារ បានមានប្រសាសន៍ថា លោក ឱម យ៉ិនទៀង ជាមនុស្សមិនស្អាតស្អំ ជាមនុស្សជំនិតរបស់លោក ហ៊ុន សែន និងជាសេដ្ឋីដែលមានលុយ ហើយមានផ្ទះតម្លៃរាប់លានដុល្លារសហរដ្ឋអាមេរិក ហើយគួរតែប្រកាសទ្រព្យសម្បត្តិមុនគេ។ លោក សុន ឆ័យ បានបញ្ជាក់ថា “ត្រូវពិនិត្យពីទ្រព្យសម្បត្តិរបស់គាត់ ខ្ញុំទទួលបានព័ត៌មានថា គាត់ដូចជាមានបានឆាប់រហ័សណាស់ តាំងពីពេលទៅកាន់អង្គភាពនេះ តាំងតែពីទ្រព្យសម្បត្តិគាត់ តាំងតែពីផ្ទះគាត់ មានតម្លៃជាច្រើនលានដុល្លារ ជាដើម។ ដូច្នេះវាត្រូវតែមានអ្នកឯករាជ្យណាមួយទៅអង្កេតអំពីទ្រព្យសម្បត្តិប្រធានអង្គភាពនេះ។ ខ្ញុំអាចនិយាយលើសពីនេះបាន ទាល់តែមានការបង្កើតជាអង្គភាពឯករាជ្យទៅឆែកលើទ្រព្យសម្បត្តិរបស់គាត់ ហើយបើកចំហដល់អ្នកដែលពាក់ព័ន្ធឲ្យមានលទ្ធភាពផ្តល់ព័ត៌មាន”។
ចំណែកមន្ត្រីអង្គការក្រៅរដ្ឋាភិបាលបានរិះគន់ថា លោក ឱម យ៉ិនទៀង មានតួនាទីជាប្រធានអង្គភាពប្រឆាំងអំពើពុករលួយ ហើយកំពុងប្រើប្រាស់តួនាទីនោះ ដើម្បីបិទបាំងអំពើ ពុករលួយជាថ្នូរនឹងផលប្រយោជន៍ និងទ្រព្យសម្បត្តិយ៉ាងមហាសាល។ មន្ត្រីអង្គការក្រៅរដ្ឋាភិបាលឃ្លាំមើលអំពើពុករលួយក្នុងប្រទេសកម្ពុជាបានលើកឡើងថា មានភស្តុតាងយ៉ាងច្រើនទាក់ទងនឹងអំពើពុករលួយរបស់ក្រសួងសុខាភិបាល និងក្រសួងប្រៃសណីយ៍ ទូរគមនាគមន៍ ប៉ុន្តែអង្គភាពប្រឆាំងអំពើពុករលួយមិនដែលចាត់ការមន្ត្រីពុករលួយធំៗ ក្នុងក្រសួងទាំងពីរនេះនៅឡើយទេ។ មន្ត្រីអង្គការក្រៅរដ្ឋាភិបាលបានរិះគន់ថា លោក ឱម យ៉ិនទៀង ចាត់ការតែមន្ត្រីពុករលួយតូចតាចកេងប្រវ័ញ្ចថវិការដ្ឋដើម្បីរស់ ចំណែកមន្ត្រីពុករលួយធំៗដែលលួចជាតិបំផ្លាញជាតិក្នុងទឹកប្រាក់រាប់រយរាប់ពាន់លានដុល្លារ បែរជាអាចគេចផុតពីការដាក់ទោសយ៉ាងក្រអឺតក្រទម៕
