ក្រុមហ៊ុន សុខ សំណាង ត្រូវបានគេស្គាល់ថា ជាក្រុមហ៊ុនដែលជាប់ពាក់ព័ន្ធបទល្មើសកាប់ឈើ និងដឹកជញ្ជូនឈើធ្វើអាជីវកម្មខុសច្បាប់ជាច្រើនឆ្នាំមកហើយ មិនដែលមានសមត្ថកិច្ចណាហ៊ានចាត់វិធានការទប់ស្កាត់នោះទេ។ ផ្ទុយទៅវិញសមត្ថកិច្ចមួយចំនួនអាចទទួលបានផលប្រយោជន៍ពីក្រុមហ៊ុននេះ ទើបបណ្តោយឲ្យក្រុមហ៊ុន សុខ សំណាង បន្តដឹកឈើធ្វើអាជីវកម្មខុសច្បាប់បំពានលើបទបញ្ជាលេខ០០២ របស់សម្តេច ហ៊ុន សែន ដោយគ្មានខ្លាចក្រែងអ្វីទាំងអស់។ ជាក់ស្តែង នៅពេលទទួលបានសិទ្ធិម៉ៅការកាប់ប្រមូលឈើបន្តពីក្រុមហ៊ុន ដាតារ៉ាប់ប័រ និងក្រុមហ៊ុន ទំរីងរ៉ាប់ប័រ ព្រមទាំងក្រុមហ៊ុនយួននៅតំបន់ព្រៃឡង់ គឺក្រុមហ៊ុន សុខ សំណាង បានធ្វើសកម្មភាពកាប់ឈើនិងដឹកជញ្ជូនឈើបំពានដល់ខាងក្រៅបរិវេណដីសម្បទានរបស់ក្រុមហ៊ុនទៀតផង។
ប្រភពដែលស្និទ្ធនឹងក្រុមហ៊ុន សុខ សំណាង បានឲ្យដឹងថា ក្រុមហ៊ុននេះ គ្មានអាជ្ញាប័ណ្ណដីព្រៃសម្បទានឬដីសម្បទានសេដ្ឋកិច្ចដោយខ្លួនឯងនោះទេ ប៉ុន្តែបានឃុបឃិតជាមួយក្រុមហ៊ុនដទៃទៀត គឺក្រុមហ៊ុន ដាតារ៉ាប់ប័រ និងក្រុមហ៊ុន ទំរីងរ៉ាប់ប័រ ដែលមានទីតាំងនៅស្រុកអន្លង់វែង និងស្រុកត្រពាំងប្រាសាទ ខេត្តឧត្តរមានជ័យ រួមទាំងក្រុមហ៊ុនយួននៅតំបន់ព្រៃឡង់ ហើយកាប់ឈើនិងប្រមូលទិញឈើយ៉ាងអនាធិបតេយ្យបំផុត។ ប្រការនេះ បានធ្វើឲ្យព្រៃឈើនៅស្រុកអន្លង់វែង និងស្រុកត្រពាំងប្រាសាទ ខេត្តឧត្តរមានជ័យ និងព្រៃឡង់ នៅខេត្តកំពង់ធំ កំពុងប្រឈមនឹងសេចក្តីវិនាសសាបសូន្យ។ ចំណែកអាជ្ញាធរខេត្តឧត្តរមានជ័យ ខេត្តកំពង់ធំ ក៏ដូចជាសមត្ថកិច្ចពាក់ព័ន្ធនៃខេត្តទាំងពីរនេះ គិតគូរតែរឿងផលប្រយោជន៍ប៉ុណ្ណោះ មិនខ្វល់ពីមហន្តរាយព្រៃឈើឡើយ។
សេចក្តីរាយការណ៍មួយចំនួនបានឲ្យដឹងថា ក្រុមហ៊ុន សុខ សំណាង ដឹកជញ្ជូនឈើតាមរថយន្តធំៗផ្ទុកលើសទម្ងន់ឆ្លងកាត់ផ្លូវជាតិក្នុងខេត្តសៀមរាប និងខេត្តកំពង់ធំ យ៉ាងពេញបន្ទុកទាំងយប់ទាំងថ្ងៃ ហើយមិនដែលឃើញសមត្ថកិច្ចពាក់ព័ន្ធចាត់វិធានការបង្ក្រាបម្តងណាឡើយ។ ក្រុមហ៊ុន សុខ សំណាង ដែលម៉ៅការកាប់ឈើពីដីសម្បទានសេដ្ឋកិច្ចរបស់ក្រុមហ៊ុននានា មានទីផ្សារលក់ចែកចាយឈើ តាមបណ្តាខេត្តជាច្រើន ស្ទើរពេញផ្ទៃប្រទេស ដូចជាខេត្តកំពង់ធំ សៀមរាប កំពង់ចាម ព្រៃវែង បន្ទាយមានជ័យ បាត់ដំបង និងរាជធានីភ្នំពេញជាដើម។ ហេតុនេះហើយ ទើបក្រុមហ៊ុន សុខ សំណាង ល្បីល្បាញខាងបំផ្លាញព្រៃឈើឲ្យរលត់រលាយព្រោះសូម្បីតែរដ្ឋមន្ត្រីក្រសួងបរិស្ថាន និងរដ្ឋមន្ត្រីក្រសួងកសិកម្មក៏បណ្តោយឲ្យក្រុមហ៊ុននេះ បំផ្លាញព្រៃឈើតាមអំពើចិត្តដែរ៕
