សមត្ថកិច្ចក្រុងព្រះវិហារត្រូវបានប្រជាពលរដ្ឋក្នុងមូលដ្ឋានចោទប្រកាន់ថាមិនបានយកចិត្តទុកដាក់ទប់ស្កាត់ និងស៊ើបអង្កេតវែកមុខជនល្មើសដែលប្រព្រឹត្តអំពើខុសច្បាប់ផ្សេងៗទេ ព្រោះសមត្ថកិច្ចពាក់ព័ន្ធទាំងនោះរវល់ជាប់ដៃឃុបឃិតជាមួយបនល្បែងនៅក្រុងព្រះវិហារ ដើម្បីទទួលបានលាភសក្ការៈខ្លះពីម្ចាស់បនល្បែងទាំងនោះ។ បនល្បែងដែលលេចធ្លោជាងគេនោះត្រូវបានប្រជាពលរដ្ឋអះអាងថាមានទីតាំងនៅភូមិស្រម៉ូវ សង្កាត់ប៉ាលហាល ក្រុងព្រះវិហារ។ បនល្បែងដែលសមត្ថកិច្ចក្រុងព្រះវិហារមិនហ៊ានបង្ក្រាបនោះ គេសង្កេតឃើញថាមានដាក់សង្វៀនបញ្ជល់មាន់ ល្បែងបៀ និងល្បែងអាប៉ោងចាក់លុយច្រើនៗ។
ម្ចាស់បនល្បែងលេចធ្លោជាងគេនៅក្នុងក្រុងព្រះវិហារត្រូវបានគេដឹងថាមានឈ្មោះសាយ ជាអ្នកមកពីរាជធានីភ្នំពេញ ហើយក៏ជាអ្នកដែលគេដឹងថាមានទំនាក់ទំនងជិតស្និទ្ធជាមួយមន្ត្រីពាក់ព័ន្ធនៅក្នុងក្រុងព្រះវិហារនេះ។ ក្នុងមួយខែយ៉ាងហោចណាស់ឈ្មោះសាយ ត្រូវចំណាយប្រាក់ប្រហែលជាជាង១ពាន់ដុល្លារទៅឲ្យមន្ត្រីពាក់ព័ន្ធ នេះជាការអះអាងរបស់អ្នកដែលចូលទៅលេងល្បែងនៅទីនោះ។ ប្រជាពលរដ្ឋនៅក្នុងក្រុងព្រះវិហារបានលើកឡើងថា តាំងពីបនល្បែងបង្កើតមក គេសង្កេតឃើញថានៅក្នុងក្រុងព្រះវិហារមានករណីរបទល្មើសលួច ឆក់ ប្លន់ កើនឡើងគួរឲ្យកត់សម្គាល់ តែសមត្ថកិច្ចក្រុងព្រះវិហារដែលធ្លាប់រអ៊ូរទាំថាប្រាក់ខែតិចចាយមិនគ្រប់ ហាក់មិនបានយកចិត្តទុកដាក់ក្នុងការអនុវត្តច្បាប់នោះទេ ។ ប្រភពបានបន្តថាសមត្ថកិច្ចនៅក្នុងក្រុងព្រះវិហារនេះមិនត្រឹមតែមិនបង្ក្រាបបនល្បែង នៅពេលមានប្រជាពលរដ្ឋផ្តល់ព័ត៌មានទេ តែបែរជាចេញមុខការពារបនល្បែងមួយនេះជាសាធារណៈដោយមិនខ្លាចរអាអ្វីឡើយ។
ប្រជាពលរដ្ឋរស់នៅក្រុងព្រះវិហារបានលើកឡើងថា ពីមួយថ្ងៃទៅមួយថ្ងៃមានប្រជាពលរដ្ឋនៅក្នុងក្រុងព្រះវិហារកាន់តែច្រើនឡើងៗបាននាំគ្នាទៅលេងល្បែងយ៉ាងងប់ងុល ហើយថាអ្នកខ្លះបានលេងល្បែងចាញ់ប្រាក់រាប់ពាន់ដុល្លារ និងមានអ្នកខ្លះទៀតថែមទាំងដាក់បញ្ចាំម៉ូតូ ដើម្បីបានប្រាក់យកមកចាក់អាប៉ោង។ ប្រជាពលរដ្ឋក្រុងព្រះវិហារបានលើកឡើងថា ក្នុងក្រុងព្រះវិហារសព្វថ្ងៃនេះមានភាពអាប់អួខ្លាំងណាស់ ព្រោះមានប្រជាពលរដ្ឋខ្មែរមួយចំនួន បានចាកចេញទៅធ្វើការនៅប្រទេសសៀម រីឯប្រជាពលរដ្ឋដែលមិនចាកចេញទៅប្រទេសសៀម ហើយគ្មានការងារធ្វើផងនោះបាននាំគ្នាប្រព្រឹត្តអំពើអបាយមុខផ្សេងៗទៅវិញ។ ពួកគាត់បន្ថែមថា ល្បែងកន្ទុយលេខ ក៏កំពុងមានសកម្មភាពយ៉ាងរំជើបរំជួលខ្លាំងណាស់ដែរនៅក្នុងក្រុងព្រះវិហារនេះ ពោលគឺមានកន្លែងចាក់ឆ្នោតរាប់សិបកន្លែង។ ប្រជាពលរដ្ឋបានអះអាងថា មិនដឹងអាជ្ញាធរពាក់ព័ន្ធនៅក្នុងក្រុងព្រះវិហារទទួលបានផលប្រយោជន៍អ្វីខ្លះពីម្ចាស់បនល្បែង និងម្ចាស់កន្លែងចាក់កន្ទុយលេខទាំងនោះទេ ទើបបានជាពួកគេ ធ្វើមិនដឹងមិនឮចំពោះកម្មភាពខុសច្បាប់ទាំងនោះ៕
