ថ្មីៗនេះអង្គភាពប្រឆាំងអំពើពុករលួយបានចាត់វិធានការលើមន្ត្រីនគរបាលសេដ្ឋកិច្ចក្រសួងមហាផ្ទៃ៤នាក់ដែលចុះទៅឈរជើងនៅខេត្តព្រះវិហារ ហើយប្រព្រឹត្តអំពើពុករលួយជំរិតយកលុយពីប្រជាពលរដ្ឋនៅពីឈ្មួញដឹកជញ្ជូនឈើខុសច្បាប់តាមអំពើចិត្ត។ ប៉ុន្តែមន្ត្រីនគរបាលសេដ្ឋកិច្ចក្រសួងមហាផ្ទៃឈរជើងតាមបណ្តាខេត្តនានាដែលប្រព្រឹត្តអំពើពុករលួយប្រើប្រាស់តួនាទីដើម្បីស្វែងរកផលប្រយោជន៍ផ្ទាល់ខ្លួនមិនទាន់ត្រូវបានអង្គភាពប្រឆាំងអំពើពុករលួយបកស្បែកមុខពួកគេនៅទ្បើយទេ។ ជាពិសេសមន្ត្រីនគរបាលសេដ្ឋកិច្ចក្រសួងមហាផ្ទៃដែលចុះទៅឈរជើងនៅខេត្តក្រចេះ ស្ទឹងត្រែង រតនគិរី មណ្ឌលគិរី ត្រូវបានគេដឹងថាជាអ្នកបើកដៃឲ្យឈ្មួញនាំឈើប្រណីតទៅលក់នៅស្រុកយួននិងបើកដៃឲ្យឈ្មួញនាំទំនិញគេច ពន្ធពីស្រុកយួនចូលទឹកដីខ្មែរយ៉ាងពេញបន្ទុក។
ប្រភពព័ត៌មានពីសមត្ថកិច្ចនៅក្នុងខេត្តមណ្ឌលគិរីបានឲ្យដឹងថាឈ្មោះ ហាក់ សុខគា ដែលជាមន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃមិនបានបង្ហាញវត្តមានក្នុងការិយាល័យធ្វើការងារទេ ប៉ុន្តែកំពុងដើរតួនាទីជាឈ្មួញកណ្តាលកេណ្ឌប្រមូលប្រជាពលរដ្ឋក្រីក្រឲ្យចូលព្រៃកាប់ឈើ និងឈើជើងចាប់ប្រមូលទិញឈើដែលគ្មានប្រភពច្បាស់លាស់ទៅលក់ឲ្យក្រុមហ៊ុនរបស់មេឈ្មួញ ទ្រី ភាព តាមអំពើចិត្ត។ ឈ្មោះ ហាក់ សុខគា បានក្លាយទៅជាឈ្មួញកណ្តាលឬមេការប្រមូលទិញឈើឲ្យក្រុមហ៊ុនទ្រីភាព ហើយមន្ត្រីនគរបាលសេដ្ឋកិច្ចរូបនេះមានឃ្លាំងស្តុកឈើមួយកន្លែងស្ថិតនៅក្នុងភូមិពូលុង សង្កាត់រមនា ក្រុងសែនមនោរម្យ ខេត្តមណ្ឌលគិរី។ ឈ្មួញច្រកក្រោមយីហោមន្ត្រីនគរបាលសេដ្ឋកិច្ចក្រសួងមហាផ្ទៃរូបនេះមានរថយន្តជាច្រើនគ្រឿងសម្រាប់ដឹកឈើចេញពីស្រុកពេជ្រាដា និងស្រុកកោះញែកទៅលក់នៅស្រុកយួនក្នុងនាមជាតំណាងក្រុមហ៊ុនទ្រីភាពគ្មាននរណាហ៊ានប៉ះពាល់ទ្បើយ។
ប្រភពបានឲ្យដឹងទៀតថាការដែលមន្ត្រីនគរបាលសេដ្ឋកិច្ចឈ្មោះ ហាក់ សុខគា អាចធ្វើអ្វីៗបានតាមអំពើចិត្តគឺមានការឃុបឃិតគ្នាជាមួយមន្ត្រីអាជ្ញាធរដែនដី មន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធជាច្រើនស្ថាប័ន។ ការដែលឈ្មោះ ហាក់ សុខគា ប្រើស្បែកជាមន្ត្រីនគរបាលសេដ្ឋកិច្ចក្រសួងមហាផ្ទៃទៅធ្វើជាមេការប្រមូលទិញឈើឲ្យក្រុមហ៊ុនរបស់មេឈ្មួញ ទ្រី ភាព នៅក្នុងខេត្តមណ្ឌលគិរីកំពុងធ្វើឲ្យប៉ះពាល់ដល់កិត្តិយសស្ថាប័ននគរបាលជាតិទាំងមូល៕
