បន្ទាប់បីមានភាពស្ងៀមស្ងាត់អស់មួយរយៈពេល ឥឡូវបទល្មើសព្រៃឈើនៅស្រុកអូរជុំ និងក្រុងបានលុង នៃខេត្តរតនគិរីចាប់ផ្តើមកម្រើកខ្លាំងឡើងវិញហើយ។ ការផ្តើមដឹកជញ្ជូនឈើប្រណីតនៅគ្រាចុងក្រោយនេះត្រូវគេមើលឃើញថា មានលក្ខណៈខុសប្លែកពីលើកមុនៗ ដែលភាគច្រើនដឹកតាមរថយន្តធុនតូច ខណៈនៅពេលនេះសកម្មភាពដឹកជញ្ជូនបានប្តូររូបភាពមកដឹកជញ្ជូនតាមរយៈការប្រើប្រាស់ម៉ូតូ។ តែទោះ ជាយ៉ាងណាលទ្ធភាពនៃការដឹកជញ្ជូន គឺមិនខុសគ្នានោះទេ ព្រោះសកម្មភាពខុសច្បាប់នេះ ត្រូវបានគាំពារដោយមន្ត្រីរដ្ឋបាលព្រៃឈើក្នុងក្រុងបានលុង។
ឈ្មួញដឹកឈើប្រណីតតាមម៉ូតូបានបង្ហើបឲ្យដឹងថា សមត្ថកិច្ចពាក់ព័ន្ធនៅក្នុងស្រុកអូរជុំ គឺជាអ្នកឃុបឃិតឲ្យមានការដឹកជញ្ជូនឈើប្រណីតខុសច្បាប់តាមម៉ូតូ ប៉ុន្តែមន្ត្រីរដ្ឋបាលព្រៃឈើក្រុងបានលុង ខេត្តរតនគិរី ដែលជាអ្នកឃុបឃិតដែរនោះ ទទួលបានផលប្រយោជន៍ច្រើន ជាង គេ។ ឈ្មួញឈើទាំងនោះបានបញ្ជាក់ថា ក្នុងម៉ូតូពួកគេមួយគ្រឿងត្រូវបង់លុយដល់សមត្ថកិច្ចពាក់ព័ន្ធយ៉ាងតិចជាង៣លានរៀល ក្នុងមួយ ខែ ទើបអាចធ្វើសកម្មភាពដឹកជញ្ជូនឈើប្រណីតបានដោយរលូន បើពុំដូច្នោះទេ កុំថាឡើយដឹកឈើប្រណីត ដឹកអូសដុតធម្មតា ក៏មិនអាចទៅរួចដែរ។ ប្រជាពលរដ្ឋនៅក្នុងស្រុកអូរជុំ និងប្រជាពលរដ្ឋនៅក្រុងបានលុង បានអះអាងថា ម៉ូតូឈ្មួញឈើអាចមានលទ្ធភាពដឹកឈើបានជាង១០ដុំ តែពួកគាត់មិនដឹងថាមួយថ្ងៃដឹកបានប៉ុន្មានជើងទេ។
ប្រជាពលរដ្ឋក្រុងបានលុង ខេត្តរតនគិរីបានលើកឡើងថា ការសន្យាបង្ក្រាបបទល្មើសព្រៃឈើ នៅក្នុងខេត្តរតនគិរី គ្មានប្រសិទ្ធភាពនោះទេ គឺប្រៀបបាននឹងវែកចកក្នុងទឹកអញ្ចឹង។ ពួកគាត់បន្តថាការពិតទៅអ្នកដែលទទួលបានផលប្រយោជន៍ធំជាងគេ ពីការប្រព្រឹត្តបទល្មើសព្រៃឈើនៅខេត្តរនតគិរី មិនមែនជាជនជាតិខ្មែរទេ តែភាគច្រើនជាជនជាតិយួន។ ប្រជាពលរដ្ឋក្នុងក្រុងបានលុងបានពន្យល់ថា ឈើប្រណីតទាំងនោះភាគច្រើនត្រូវបានដឹកជញ្ជូនទៅកាន់រោងសិប្បកម្មកែច្នៃឈើជាង៦០កន្លែងនៅក្នុងក្រុងបានលុង ដែលភាគច្រើនជារោងសិប្បកម្មខុសច្បាប់ ដែលមានមន្ត្រីមានអំណាចកាងពីក្រោយ។ ពួកគាត់សង្កត់ធ្ងន់ថា ឈើទាំងអស់ភាគច្រើនត្រូវបានឈ្មួញយួនសូកប៉ាន់ប្រាក់ដល់មន្ត្រីខ្មែរ ចូលមកប្រមូលទិញយកទៅប្រទេសយួនស្ទើរទាំងអស់៕
