សមាជមហាជនគណបក្សសង្គ្រោះជាតិ នៅថ្ងៃទី០៦ខែតុលានេះ បានសម្រេចនូវការទាមទារចំនួន ១០ចំណុច ដោយរកយុត្តិធម៌ជូនម្ចាស់ឆ្នោត និងទាមទារឲ្យមានការផ្លាស់ប្តូរតាមរយៈកែទម្រង់នូវគោលនយោបាយ និងស្ថាប័នជាតិសំខាន់ៗ ដើម្បីធានាការពារផលប្រយោជន៍ជាតិ និងផលប្រយោជន៍ប្រជាពលរដ្ឋ។
នៅក្នុងសេចក្តីសម្រេចរបស់សមាជមហាជន ដែលធ្វើឡើងតាំងពីម៉ោង២រសៀលរហូតដល់ម៉ោងជាង៥ល្ងាចថ្ងៃទី០៦ខែតុលានេះ នៅទីលានប្រជាធិបតេយ្យ រាជធានីភ្នំពេញ បានឲ្យដឹងថា បន្ទាប់ពីបានស្តាប់នូវសេចក្តីថ្លែងគោលជំហររបស់គណបក្សសង្គ្រោះជាតិ និងយោបល់របស់ប្រជាពលរដ្ឋ ជុំវិញស្ថានភាពនយោបាយបច្ចុប្បន្ន អង្គសមាជមហាជនបានសម្រេច ទាមទារឲ្យគណបក្សសង្គ្រោះជាតិបន្តស្វែងរកយុត្តិធម៌ជូនមហាជនជាម្ចាស់ឆ្នោត តាមរយៈការធ្វើមហាបាតុកម្មជាទ្រង់ទ្រាយធំទូទាំងប្រទេស ធ្វើនយោបាយការទូតឲ្យទូលំទូលាយ ធ្វើញត្តិរាប់លានស្នាមមេដៃ ដាក់ជូនអង្គការសហប្រជាជាតិ និងប្រទេសជាម្ចាស់ហត្ថលេខីនៃកិច្ចព្រមព្រៀងទីក្រុងប៉ារីស២៣តុលា១៩៩១។
សេចក្តីសម្រេចរបស់សមាជមហាជន ក៏បានសម្រេចទាមទារឲ្យមានការផ្លាស់ប្តូរតាមរយៈកែទម្រង់នូវគោលនយោបាយ និងស្ថាប័នជាតិសំខាន់ៗ ដើម្បីធានាការពារផលប្រយោជន៍ជាតិ និងផលប្រយោជន៍ប្រជាពលរដ្ឋផងដែរ ដែលនៅចំពោះមុខ អង្គសមាជបានសម្រេចទាមទារចំណុចសំខាន់ៗចំនួន ១០ចំណុច ដូចជា ទាមទារឲ្យបង្កើតគណៈកម្មការស្វែងរកការពិតជូនម្ចាស់ឆ្នោត និងផ្លាស់ប្តូរសមាសភាពរបស់គណៈកម្មាធិការជាតិរៀបចំការបោះឆ្នោតបច្ចុប្បន្ន ដែលសមាសភាពថ្មីត្រូវមានការឯកភាពពីគណបក្សដែលមានអាសនៈនៅក្នុងរដ្ឋសភា, ទាមទារឲ្យមានតុល្យភាពអំណាចសភា និងទទួលស្គាល់គណបក្សប្រឆាំងដោយបង្កើតរាជរដ្ឋាភិបាលស្រមោល, ទាមទារឲ្យគណបក្សសង្គ្រោះជាតិទទួលបានអាជ្ញាប័ណ្ណវិទ្យុ ទូរទស្សន៍ ហើយលុបចោលកិច្ចសន្យាដែលមានលក្ខណៈគាបសង្កត់ បិទសិទ្ធិសេរីភាពក្នុងការប្រើប្រាស់ប្រព័ន្ធផ្សព្វផ្សាយ, បញ្ឈប់នូវការផ្តល់ដីសម្បទានសេដ្ឋកិច្ច និងពិនិត្យសើរើឡើងវិញនូវដីសម្បទានសេដ្ឋកិច្ច ដែលប៉ះពាល់ដល់ផលប្រយោជន៍ជាតិ និងប្រទេសជាតិ, បញ្ឈប់ការកាប់បំផ្លាញព្រៃឈើដោយបង្កើតយន្តការត្រួតពិនិត្យ ដើម្បីធានាឲ្យបាននូវប្រសិទ្ធភាព, ទាមទារឲ្យអនុវត្តច្បាប់អន្តោប្រវេសន្តឲ្យមានប្រសិទ្ធភាពដោយគ្មានការលើកលែង និងរើសអើង, បង្កើតគណៈកម្មការចម្រុះ ដែលមានសមាសភាពមកពីគណបក្សក្នុងរដ្ឋសភា ដើម្បីត្រួតពិនិត្យឡើងវិញពីការបោះបង្គោលព្រំដែន, ធ្វើវិសោធនកម្មនីតិវិធី ឬធ្វើច្បាប់ឲ្យមានការបោះឆ្នោតជ្រើសរើសមេភូមិដោយផ្ទាល់ពីប្រជាពលរដ្ឋ, ប្រធានតុលាការ ចៅក្រម ព្រះរាជអាជ្ញា គ្រប់លំដាប់ថ្នាក់ មិនត្រូវមានតួនាទីជាថ្នាក់ដឹកនាំរបស់គណបក្សនយោបាយ និងទាមទារឲ្យដោះលែងជាបន្ទាន់អ្នកជាប់ចោទ អ្នកជាប់ទោសមនសិការ នយោបាយ សកម្មជនការពារសិទ្ធិមនុស្ស សកម្មជនដីធ្លី និងសកម្មជនការពារព្រៃឈើ។
បន្ទាប់ពីធ្វើសមាជមហាជននេះ គណបក្សសង្គ្រោះជាតិ គ្រោងនឹងធ្វើមហាបាតុកម្មលើកទី៣ នៅថ្ងៃទី២៣ខែតុលា ខាងមុខនេះ ដោយប្រមូលស្នាមដៃរបស់ប្រជាពលរដ្ឋជាម្ចាស់ឆ្នោតប្រមាណ៣លានស្នាមមេដៃ ធ្វើជាញត្តិដាក់ជូនអង្គការសហប្រជាជាតិ និងប្រទេសហត្ថលេខី នៃកិច្ចព្រមព្រៀងទីក្រុងបារីស ២៣តុលា១៩៩១ ឲ្យជួយរកយុត្តិធម៌ជូនម្ចាស់ឆ្នោត ឲ្យស្របតាមកិច្ចព្រមព្រៀងនេះ តាមរយៈតំណាងរបស់ឧត្តមស្នងការអង្គការសហប្រជាជាតិប្រចាំនៅកម្ពុជា៕
