បទល្មើសនៃការនាំទំនិញមិនបង់ពន្ធពីប្រទេសថៃចូលក្នុងប្រទេសកម្ពុជា តាមច្រកព្រំដែនក្នុងខេត្ដបន្ទាយមានជ័យស្ថិតនៅក្រោមការគ្រប់គ្រងរបស់លោក ចាប សុផារិទ្ធ ប្រធានការិយាល័យនគរបាលសេដ្ឋកិច្ចខេត្ដ ។ បែបបទនៃការរក លុយរបស់ក្រុមលោក ចាប សុផារិទ្ធ មិនខុសពីកុងត្រូលជជុះដែលប្រមុខរាជរដ្ឋា ភិបាលកម្ពុជាស្នើឱ្យអាជ្ញាធរគ្រប់លំដាប់ថ្នាក់លុបបំបាត់នោះទេ ។ សម្រាប់លោក ចាប សុផារិទ្ធ ហាក់ដូចជាមិនព្រឺចំពោះអនុសាសន៍ថ្មីៗរបស់សម្ដេចនាយករដ្ឋមន្ដ្រី ប្រមុខរាជរដ្ឋាភិបាលកម្ពុជានោះឡើយ ។
ទំនិញគេចពន្ធតាមរថយន្ដធំៗ ទាំងខ្សែទាំងៗឆ្លងកាត់ផ្លូវជាតិលេខ៥ សុទ្ធតែត្រូវ បង់ប្រាក់ឱ្យកុងត្រូលជជុះបណ្ដាក់ដូចខ្យងរបស់លោក ចាប សុផារិទ្ធ ។ ក្រុមបង្ក្រាប បទល្មើសសេដ្ឋកិច្ចថ្នាក់ខេត្ដរបស់លោក ចាប សុផារិទ្ធ មិនមែនជាអ្នកចាំចាប់ ទំនិញគេចពន្ធរកចំណូលចូលជាតិនោះទេ ប៉ុន្ដែគឺពួកគេដាក់កុងត្រូលខុសច្បាប់ ឬ ហៅថាកុងត្រូលជជុះ ដើម្បីយកប្រាក់ពីទំនិញគេចពន្ធនោះទៅវិញ ។
រឿងទំនិញគេច ពន្ធនេះនៅខេត្ដបន្ទាយមានជ័យគ្រាន់តែឈ្មួញឈ្មោះ រួម ម្នាក់ ក៏គ្រប់គ្រាន់សម្រាប់ លោក ចាប សុផារិទ្ធ ស៊ីឆ្ងាញ់ដេកស្រួលនោះដែរ ។ មួយយប់លោកបងរួមដឹក ទំនិញគេចពន្ធពីរឡានធំៗ ចេញពីស្រុកសៀម ចូលមកខេត្ដបន្ទាយមានជ័យ ។ នៅពេលដែលប្រមុខរាជរដ្ឋាភិបាល ស្នើឱ្យបង្ក្រាបបទល្មើសនានា ជាពិសេស បញ្ហាកុងត្រូលជជុះ បែរជាលោក ចាប សុផារិទ្ធ ដើរនិយាយថា ក្រុមរបស់ខ្លួនមិន មែនជាកុងត្រូលជជុះនោះទេ ហើយថា អនុសាសន៍របស់សម្ដេចនាយករដ្ឋមន្ដ្រី ហ៊ុន សែន សំដៅតែទៅលើក្រុមជញ្ជីងនៅតាមផ្លូវជាតិប៉ុណ្ណោះ ។ មិនមែនតែ លោក ចាប សុផារិទ្ធទេ ដែលច្នៃអនុសាសន៍សម្ដេចនាយករដ្ឋមន្ដ្រី ហ៊ុន សែននោះ សូម្បីតែមន្ដ្រីនគរបាលថ្នាក់ក្រសួងដែលប្រចាំការនៅខេត្ដបន្ទាយមានជ័យ ក៏និយាយ យ៉ាងនេះដែរ ។
ពួកគេមិនគួរយកអនុសាសន៍សម្ដេចហ៊ុន សែន ដើម្បីផលប្រយោជន៍បុគ្គល យ៉ាងនេះទេ ។ អ្វីដែលសំខាន់គឺតួនាទីជាអ្នកបង្ក្រាបបទល្មើស មិនមែនជាអ្នកសាង បទល្មើសនោះទេ ។ សព្វថ្ងៃនេះសកម្មភាពមន្ដ្រីនគរបាលនៅខេត្ដបន្ទាយមានជ័យ ទាំងថ្នាក់ខេត្ដ និងថ្នាក់ក្រសួងដែលមានភារកិច្ចបង្ក្រាបបទល្មើសសេដ្ឋកិច្ចនោះ គឺ ជាអ្នកកសាងបទល្មើសសេដ្ឋកិច្ចទៅវិញទេ ។ រឿងអ្នកបង្ក្រាបបទល្មើសសេដ្ឋកិច្ច ដែលអគ្គស្នងការនគរបាលជាតិបញ្ចេញពីក្រោលទៅនោះ គឺរកតែលុយ …. ៕
