ខេត្តត្បូងឃ្មុំ ៖ យ៉ាងតិចក៏មានកុងត្រូលរបស់សមត្ថកិច្ចនគរបាលចំនួនពី៣ទៅ៥កន្លែង ត្រូវបានដាក់ពង្រាយយ៉ាងអនាធិតេយ្យតាមកំណាត់ផ្លូវជាតិលេខ៧ ក្រោមរូបភាពការពារសន្តិសុខ សណ្តាប់ធ្នាប់ និងត្រួតពិនិត្យច្បាប់ចរាចរណ៍ តែធាតុពិត ជាកុងត្រូលជជុះចាំយកប្រាក់ពីអ្នករកស៊ីដឹកទំនិញ និងប្រជាពលរដ្ឋដឹកកសិផលដូចជាការដឹកដំឡូង ជាដើម ។
ករណីនេះប្រឈមនឹងការរិះរន់យ៉ាងធ្ងន់ធ្ងរពីប្រជាពលរដ្ឋមកលើអាជ្ញាធរខេត្តថា គ្មានវិធានការលុបបំបាត់ អោយស្របតាមគោលការណ៍របស់រាជរដ្ឋាភិបាល ក៏ដូចជាអនុសាសន៍ដ៏ថ្លៃថ្លារបស់សម្តេចតេជោនាយករដ្ឋមន្ត្រីក្នុងទិសស្លោក”មើលផ្លូវ”នេះជាដើម ។
ប្រជាពលរដ្ឋបានបញ្ជាក់អោយដឹងថា ចាប់ពីចំណុចទីរួមខេត្តត្បូងឃ្មុំដល់ព្រំប្រទល់ខេត្តកំពង់ចាម មានកុងត្រូលចំនួន៣ទ្រង់ទ្រាយធំ និងបំបែកជា២បន្ថែមទៀត កាន់តែបង្កផលលំបាកពីមួយថ្ងៃទៅមួយថ្ងៃបង់ប្រាក់បន្តកន្ទុយគ្នា អាចជាការចាត់តាំងណាមួយពីសាម៉ីអង្គភាពខាងលើនេះ ។
ប្រភពពីសមត្ថកិច្ចបានបង្ហើបអោយដឹងថា ពិតជាមានកុងត្រូលដូចការអះអាងរបស់ប្រជាពលរដ្ឋ និងអ្នករកស៊ីពិតប្រាកដមែន គឺទីតាំងទី១-មានទីតាំងនៅចំណុចភូមិចំការគរ ឃុំដារ ស្រុកមេមត់ នគេបាលគ្រប់គ្រងនៅទីនោះមានឈ្មោះ ម៉ៅ សុខុន ត្រូវជាក្មួយលោកស្នងការ ហើយបុគ្គលរូបនេះប្រកបដោយឥទ្ធិពលបំផុតលើការគ្រប់គ្រងកុងត្រូលជជុះ រហូតពង្រីកកុងត្រូលចំនួន២បន្ថែមទៀត ទី១-ស្ថិតនៅគល់ស្ពានជ្រាវ និងទី២-ស្ថិតនៅច្រកចូលប៉ុស្តិ៍ចាន់មូល ជាមួយនឹងឈ្មោះទូចសម្បត្តិ ។
ទីតាំងទី២-នៅចំណុចភូមិហួចលិច ឃុំក្រែក ស្រុកពញាក្រែក ដឹកនាំដោយឈ្មោះ ឡេង ចិត្រា អ្នកបើករថយន្តឲ្យលោកអភិបាលខេត្ត ហើយកុងត្រូលជជុះនេះមានចម្ងាយមិនលើសពី១០០ម៉ែត្រខាងកើតសាលាខេត្តត្បូងឃ្មុំ ។ ទីតាំងទី៣-មានទីតាំងស្ថិតនៅសង្កាត់វិហារហ្លួង ក្រុងសួង ដឹកនាំដោយឈ្មោះ លី សុវណ្ណា ។
បើតាមការលើកឡើងពីនគរបាលបញ្ជាក់ថា កុងត្រូលជជុះទាំងនោះលោក គង់ វិចិត្រ ជាអ្នកគ្រប់គ្រងចំណូល សម្រាប់ជាសេដ្ឋកិច្ចដាក់ជូនមេនគរបាលខេត្ត ហើយលោក ឡេង ចិត្រា ជាអ្នករកចំណូលទៅខេត្ត ប៉ុន្តែករណីលោក ឡេង ចិត្រា ជាទម្លាប់យកឈ្មោះអភិបាលខេត្តប្រើប្រាស់ពង្រីកឥទ្ធិពល និងពេលខ្លះគាបសង្កត់ឈ្មួញឲ្យបង់លុយ ឬប្រជាពលរដ្ឋដឹកដំឡូងជាដើម សុទ្ធតែថ្លើមធំហ៊ានថាខ្លួនអនុវត្តតាមបទបញ្ជារបស់ថ្នាក់ខេត្ត។
ការពិតលោក ប្រាជ្ញ ចន្ទ ជាញឹកញាប់ក្រើនរំលឹកអោយលុបបំបាត់កុងត្រូលខុសច្បាប់ ចុះហេតុអ្វីបានជាអស់លោកទាំងនោះចូលចិត្តឆក់ឱកាសបង្កើតកុងត្រូលជជុះ ដើម្បីទាញរកលាភសក្ការទាំងបំពានច្បាប់ទៅវិញ ?
ពាក់ព័ន្ធនឹងកុងត្រូលទាំងនេះត្រូវបានថ្នាក់ស្នងការរងខ្លះលួចបង្ហើបថា អាចបង់អោយលោកស្នងការមួយកន្លែងៗចាប់ពី៣០០ដុល្លារឡើងទៅ ប៉ុន្តែករណីនេះលោកឧត្តមសេនីយ៍ត្រីស្នងការ ម៉ៅ ពៅ បានប្រាប់អ្នកយកព័ត៌មានតាមទូរស័ព្ទកាលពីព្រឹកថ្ងៃទី១៧ ខែតុលា ឆ្នាំ២០១៤ថា ”ខ្ញុំមិនអោយមានកុងត្រូលជជុះទេការដាក់នោះគឺរៀបចំសណ្តាប់ធ្នាប់ ត្រួតពិនិត្យច្បាប់ចរាចរណ៍ កុំថាឡើយហ៊ានយកលុយក្នុងមួយឡាន២០.០០០រៀលពីប្រជាពលរដ្ឋដឹកដំឡូង សូម្បីតែ១.០០០រៀលក៏ខ្ញុំមិនអនុគ្រោះដែរព្រោះជារឿងថ្នាក់លើហាមឃាត់” ។ លោកស្នងការបន្តថា ”ខ្ញុំអត់ងងុយរាល់យប់លើភារកិច្ច តួនាទីការពារប្រជាពលរដ្ឋដូច្នេះបើលោកណាបានឃើញឬដឹងពីនគរបាលណាឈ្មោះអីជួយរាយការណ៍មកខ្ញុំនឹងយកកម្លាំងតម្រួតទៅចាប់” ។
ក្រុមឈ្មួញមួយចំនួនបាននិយាយយ៉ាងដូច្នេះថា ចំពោះពួកខ្ញុំបង់លុយអោយថ្នាក់លើអស់ហើយ. មិនខ្វល់ពីកុងត្រូលទាំងនេះទេ តែអាណិតដល់ប្រជាពលរដ្ឋដឹកដំឡូងសោះក៏បង្ខំអោយគាត់បង់លុយមួយឡាន២០.០០០រៀល ខុសពីសមត្ថកិច្ចតាមច្រកព្រំដែន គ្រាន់តែយកលុយមួយឡាន៨.០០០រៀលសម្រាប់ថ្លៃបាយប៉ុណ្ណោះ ។
ប្រភពគួរឲ្យជឿទុកចិត្តបានបង្ហើបថា បើសមត្ថកិច្ចប្រចាំច្រកដូង៧ដើមចំណុះឲ្យស្នងការដ្ឋានខេត្តត្បូងឃ្មុំ ដែលរកចំណូលដោយអំពើពុករលួយបាន ត្រូវបង់ឲ្យស្នងការក្នុងមួយថ្ងៃ២លានរៀល ប៉ុន្តែករណីនេះអ្នកយកព័ត៌មានយើងមិនទាន់ទទួលបានការបញ្ជាក់នៅឡើយទេពីលោកស្នងការ។ មន្ត្រីនិងថ្នាក់ដឹកនាំនគរបាលខេត្តមានការថ្នាំងថ្នាក់ សតិអារម្មណ៍នឹងការងារអង្គភាព ខណៈមេប្រឹងកើបតែម្នាក់ឯង ហើយទុកអោយទទួលខុសត្រូវពីកំហុសនោះទាំងអស់ជាមួយថ្នាក់លើ។
មន្ត្រីបានបង្ហើបថា ក្នុងស្នងការដ្ឋាននគរបាលខេត្តលោកស្នងការទុកលទ្ធភាពឬផ្តល់ឥទ្ធិពលឲ្យលោកគង់ វិចិត្រ នឹងលោក ឡេង ចិត្រា នាយនាយរងការិយាល័យនគរបាលប្រឆាំងបទល្មើស ដាក់កុងត្រូលជជុះដ៏គឃ្លើននឹងបទបញ្ជាថ្នាក់លើ រហូតដល់ប្រជាពលរដ្ឋលើកឡើងផងដែរថា បើអាជ្ញាធរខេត្តមិនមានវិធានការណ៍លុបបំបាត់ អាចឈ្មួញនិងប្រជាពលរដ្ឋជាច្រើនដែលរងនូវការគាបសង្កត់ពីអស់លោកសមត្ថកិច្ចទាំងនេះអាចបង្ខំចិត្តប្តឹងទៅអង្គភាពប្រឆាំងអំពើពុករលួយ។
