ខេត្តកោះកុង៖ ប្រជាពលរដ្ឋខេត្តកោះកុង ដែលបាននិងកំពុងរងគ្រោះដោយត្រូវក្រុមហ៊ុនអគ្គិសនីមួយ ឈ្មោះ យូធីហ្វ្រីសបកោះកុងគ្រប់គ្រងដោយជនជាតិថៃម្នាក់ឈ្មោះសុផាផា និងបុគ្គលិកជនជាតិខ្មែរម្នាក់ ឈ្មោះ ប៊ុន ថន ដែលទទួលបានសិទ្ធិវិនិយោគ ក្នុងការផ្គត់ផ្គង់អគ្គិសនីក្នុងទីក្រុងខេមរភូមិន្ទ ច្របាច់កពួកគាត់យកលុយ ឆៅៗ បានអំពាវនាវសុំដល់រដ្ឋមន្ត្រីក្រសួងឧស្សាហកម្មរ៉ឺនិងឋាមពលថ្មីមេត្តាចុះមកមើលផងព្រោះបើពឹងលើអាជ្ញាធរខេត្តកោះកុងកក់ក្តៅដូចអាំងផេះចឹង ។
ប្រជាពលរដ្ឋឲ្យដឹងថា ជាវិធីជម្រិតទារប្រាក់ពីប្រជាពលរដ្ឋ គឺក្រុមហ៊ុនឈ្មោះ យូធីហ្វ្រីសបកោះកុងដែលមិនដឹងយកក្បួនពីណា បានដាក់ល័ក្ខខណ្ឌ ដោយគ្មានភាពអៀនខ្មាស់ជាច្រើន មានដូចជា ទី១ ប្រជាពលរដ្ឋមុនសាងសង់ផ្ទះត្រូវ សុំច្បាប់ពីក្រុមហ៊ុនអគ្គីសនី ។
ទី២ ការតបណ្តាញអគ្គិសនីក្នុងផ្ទះ ត្រូវឲ្យក្រុមហ៊ុនជាអ្នកគូរឲ្យ ក្នុងតម្លៃចាប់ពី២០០ ទៅ៣០០ដុល្លារសហរដ្ឋអាមេរិក។ បើសង់ផ្ទះធំ ត្រូវក្រុមហ៊ុនយូធីហ្វ្រីសបកោះកុងទារ រាប់ពាន់ដុល្លាសហរដ្ឋអាមេរិក។ ទី៣ ខ្សែភ្លើង និងកុងទ័រ ត្រូវគេយកមកពីប្រទេសថៃ មិនថ្លឹង តាមលក្ខណៈបច្ចេកទេសរបស់ EDC ទេ។ តម្លៃកុងទ័រ ៥អំពែ ថ្លៃ ២៥០០បាត ចំណែក១៥អំពែ ត្រូវបង់ ៧៨០០បាត ។ ប្រសិនបើអ្នកប្រើលើសពី ១២៣KWម៉ោង ត្រូវឲ្យអ្នកប្រើប្រាស់ បង់លុយបន្ថែម ៨០០បាត។ ទី៤ ថ្លៃសេវាប្រើប្រាស់ចរន្តអគ្គីសនី ឲ្យអ្នកប្រើប្រាស់បង់ជាលុយបាត លុយខ្មែរ មិនទទួលយកទេ ។
ប៉ុន្តែបើទោះបីកើតមានទង្វើដូច្នេះក្ដី ក៏គេមិនដែលឃើញ អាជ្ញាធរខេត្តកោះកុងរបស់ លោក ប៊ុន ឡឺតចេញមុខអន្តរាគមន៏ ចំពោះវិបត្តិដែលធ្វើឲ្យប្រជាពលរដ្ឋក្ដៅក្រហាយ នេះឡើយ ។ ធ្ងន់ជាងនេះថែមទៀត ក្រុមប្រជាពលរដ្ឋ ក៏បានឲ្យដឹងថា សូម្បីតែប្រជាពលរដ្ឋក្រីក្រ គ្នានលទ្ធភាព តភ្លើងប្រើប្រាស់ ហើយពួកគាត់សុំតពីផ្ទះអ្នកជិតខាង ក៏ក្រុមហ៊ុនមិនអនុញ្ញាតឲ្យដែរ ។ ដោយចាត់វិធានការតឹង ប្រសិនបើអ្នកណាហ៊ានតឲ្យ ក្រុមហ៊ុននឹងកាត់ផ្តាច់ចរន្តអគ្គិសនីភ្លាម ។
ជាក់ស្តែងមានពលរដ្ឋម្នាក់ឈ្មោះលោក ចៅ ប៊ុនហួន ត្រូវ ក្រុមហ៊ុនអគ្គិសនីយូធីហ្វ្រីសបកោះកុងកាត់ផ្តាច់ចរន្តអគ្គិសនីផ្ទះរបស់គាត់ កាលពីថ្ងៃទី២៧ ខែកញ្ញា ឆ្នាំ២០១៣ ដើម្បីឲ្យលោកបង់លុយចំនួន ១៤៣.៤៥២បាត ជាតម្លៃប្តូរទីតាំងបង្គោលភ្លើងតង់ស្យុងខ្ពស់ នៅជិតផ្ទះ ។ ក៏ប៉ុន្តែផ្ទះលោក មិនប៉ះពាល់ នឹងបង្គោលអគ្គីសនីនោះទេ ព្រោះមានគណៈកម្មការខេត្តចុះមកពិនិត្យ និងវាយតម្លៃរួចហើយថា វាពុំមានផលប៉ះពាល់ នឹងការប្តូរទីតាំងបង្គោលភ្លើងនោះ ហើយទង្វើទាំងនេះជាការកៀបសង្កត់ ប្រជាជនក្រីក្រ ។
ក្នុងស្ថានភាពបែបនេះ ប្រជាពលរដ្ឋខេត្តកោះកុង បានសំណូមពរ ដល់លោកចមប្រសិទ្ធរដ្ឋមន្ត្រីក្រសួង ឧស្សាហកម្មរ៉ែ និងថាមពល ដែលទើប ចូលកាន់តំណែងថ្មី ជួយធ្វើអន្តាគមន៏រកយុត្តិធម៌ឲ្យពួកគាត់ផង ៕
