បទល្មើសនាំចូលទំនិញគេចពន្ធនិងទំនិញខុសច្បាប់ តាមច្រករបៀងមួយចំនួនក្នុងស្រុកម៉ាទ្បៃ បានកើតទ្បើង ជាយូរមកហើយ ប៉ុន្តែទាំងលោក គោ ស៊ុំសារឿត ដែលជាអភិបាលខេត្តបន្ទាយមានជ័យនិងលោក អាត់ ខែម ជាស្នងការនគរបាលខេត្តមិនចាត់វិធានការទប់ស្កាត់នោះទេ។ ប្រការនេះនាំឲ្យមានសេចក្តីសង្ស័យថា អភិបាលខេត្ត និង ស្នងការនគរបាលខេត្ត ទទួលបានផលប្រយោជន៍ពី បទល្មើសទាំងនោះដែរ ទើបបណ្តោយឲ្យបទល្មើសកើតទ្បើងយ៉ាងពេញបន្ទុកនាពេលបច្ចុប្បន្ន។ ក្រសួងនិងស្ថាប័នពាក់ព័ន្ធ មិនគួរមើលរំលង សកម្មភាព នាំទំនិញគេចពន្ធ ទំនិញខុសច្បាប់ ព្រមទាំងឈើគ្រញូងចូលតាមច្រករបៀងក្នុងស្រុកម៉ាទ្បៃនោះទេព្រោះធ្វើឲ្យរដ្ឋខាតបង់ប្រាក់ចំណូលយ៉ាងច្រើនសន្ធឹកសន្ធាប់ក្នុងមួយខែៗ។
ឥទ្បូវនេះប្រជាពលរដ្ឋរស់នៅភូមិចាន់គិរី ឃុំ អូរស្រទ្បៅ ស្រុក ម៉ាទ្បៃ ខេត្តបន្ទាយមានជ័យ បានឲ្យដឹងថា ពលករខ្មែរនៅ តែឆ្លងដែនចូលទៅទឹកដីសៀមនៅពេលយប់យ៉ាងគគ្រឹកគគ្រេង ព្រោះសមត្ថកិច្ចទប់ស្កាត់តែពេលថ្ងៃប៉ុណ្ណោះ។ កន្លែងដែល បើកឲ្យពលករខ្មែរឆ្លងដែនខុសច្បាប់ចូលទៅក្នុងទឹកដីសៀមច្រើនបំផុតគឺច្រករបៀងដែលគ្រប់គ្រងដោយវរនគរបាលការពារព្រំដែនគោក លេខ ៨១៥ ប្រចាំនៅខ្សែ ព្រំដែនភូមិចាន់គិរី។ សមត្ថកិច្ចឈរជើងក្នុងតំបន់នេះមិនដែលចាត់វិធានការទប់ស្កាត់បទល្មើសនោះទេ ផ្ទុយទៅវិញពួកគេបែរជាបណ្តោយឲ្យបទល្មើសកើតទ្បើងកាន់តែច្រើនដើម្បីប្រមូលផលប្រយោជន៍។ ជាការពិតមកទល់នឹងពេលនេះការបើកដៃ ឲ្យពលករខ្មែរឆ្លងដែន ពេលយប់នៅតែកើតទ្បើងយ៉ាងពេញបន្ទុកហើយទំនិញគេចពន្ធនិងទំនិញខុសច្បាប់ក៏ពុំមានការថយចុះទ្បើយ។
សូមបញ្ជាក់ដែរថាថ្មីៗកន្លងទៅនេះលោក ខេង សុមេថ អគ្គស្នងការរងនគរបាលជាតិនិងលោក គោ ស៊ុំ សារឿត អភិបាលខេត្តបន្ទាយមានជ័យ បានចេញបទបញ្ជារឹតបន្តឹងដល់សមត្ថកិច្ចតាមព្រំដែនឲ្យចាត់វិធានការបង្ក្រាបបទល្មើសផ្សេងៗប្រកបដោយប្រសិទ្ធភាព។ ប៉ុន្តែមេនគរបាលវរការពារព្រំដែនគោកលេខ៨១៥ ប្រចាំនៅស្រុកម៉ាទ្បៃមិនដែលអនុវត្តន៍តាមបទបញ្ជារបស់ថ្នាក់លើនោះទេ ហើយនៅតែបណ្តោយឲ្យបទល្មើសកើតទ្បើងទាំងយប់ទាំងថ្ងៃដើម្បីផលប្រយោជន៍ផ្ទាល់ខ្លួន។ បញ្ហានេះលោក គោ ស៊ុំសារឿត ដែលជាអភិបាលខេត្តនិងលោក អាត់ ខែម ជាស្នងការនគរបាលខេត្តបន្ទាយមានជ័យត្រូវចាត់វិធានការលើមន្ត្រីខិលខូចជាបន្ទាន់ដើម្បីកុំឲ្យពួកគេឃុបឃិតគ្នាធ្វើអ្វីៗយ៉ាងទទឹងទិសតទៅទៀត៕
