ខេត្តព្រៃវែងៈ ប្រភពចេញពីមន្រ្តីក្នុងមន្ទីរហិរញ្ញវត្ថុខេត្តព្រៃវែងបានឲ្យដឹងថា មន្ត្រីគណនេយ្យតាមបណ្តាមន្ទីរនានាជុំវិញខេត្តនិងម្ចាស់ក្រុមហ៊ុនមួយចំនួន ដែលរកស៊ីនៅក្នុងខេត្តព្រៃវែងបានរិះគន់ លោក ទួន សុគន្ធ ពីរឿងពូកែទារប្រាក់ទឹកតែ ហើយថែមទាំងមាន ល្បិចកលក្នុងការគាបសង្កត់លើមន្ត្រីគណនេយ្យតាមមន្ទីរនានានិងតាមក្រុមហ៊ុនដែលទទួលបានសិទ្ធិផ្គត់ផ្គង់សម្ភារៈសម្រាប់មន្ទីរនានាយ៉ាងប៉ិនប្រសប់។ បញ្ហានេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុគួរពិនិត្យមើលអំពើអាក្រក់របស់ប្រធានមន្ទីរហិរញ្ញវត្ថុខេត្តព្រៃវែងជាបន្ទាន់ដើម្បីកុំឲ្យធ្វើអ្វីៗតាមអំពើចិត្តទៀត។ ប្រភពចេញពីមន្ត្រីរាជការដដែលនេះបានឲ្យដឹងទៀតថា ចាប់តាំងពីលោក ទួន សុគន្ធ ទ្បើងកាន់តំណែងជាប្រធានមន្ទីរពេលណាបានប្រើប្រាស់តួនាទីរបស់ខ្លួនស្វែងរកផលប្រយោជន៍ដោយគ្មានសេចក្តីអៀនខ្មាសឡើយ។
តាមមតិពីមន្ត្រីរាជការក្រោមឱវាទលោក ទួន សុគន្ធ បានបង្ហើបឲ្យដឹងថានៅពេលមន្ទីរអង្គភាពនានាជុំវិញសាលាខេត្តព្រៃវែង រត់ឯកសារសុំដកសាច់ប្រាក់របស់ខ្លួនដោយត្រូវឆ្លងកាត់ការស៊ីញ៉េរបស់លោក ទួន សុគន្ធគឺសាមីមន្ទីរទាំងនោះត្រូវចំណាយប្រាក់ទឹកតែមួយផ្នែកទៅលោក ទួន សុគន្ធ និងមន្ត្រីជំនាញនៅការិយាល័យថវិកា។ ការទាមទារប្រាក់ទឹកតែត្រូវបានកំណត់តម្លៃសេវាទៅតាមទំហំសាច់ប្រាក់របស់មន្ទីរអង្គភាពនិមួយៗហើយប្រាក់ដែលគេទាមទារសេវាទឹកតែខ្ពស់គឺប្រាក់លទ្ធកម្មរហូតដល់ក្រុមហ៊ុនមួយចំនួនមិនចង់ហ៊ានចូលរួមដេញថ្លៃនិងពិគ្រោះថ្លៃលើការផ្គត់ផ្គង់សម្ភារៈបរិក្ខារសម្រាប់មន្ទីរនានាក្នុងខេត្តព្រៃវែងនោះទេ។អាចនិយាយបានថាលោក ទួន សុគន្ធ និងបក្ខពួករកគ្រប់វិធីដើម្បីប្រមូលផលប្រយោជន៍យកទៅចែកគ្នាធ្វើមានធ្វើបានតាមអំពើចិត្ត។
អំពើពុករលួយរបស់លោក ទួន សុគន្ធ និងបក្ខពួកបានធ្វើឲ្យមន្ត្រីគណនេយ្យតាមមន្ទីរអង្គភាពរដ្ឋនានា ចំណុះសាលាខេត្តព្រៃវែងមានការមិនសប្បាយចិត្តទាល់តែសោះហើយបានអំពាវនាវឲ្យលោក អូន ព័ន្ធមុនីរ័ត្នដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុចាត់វិធានការត្រួតពិនិត្យជាបន្ទាន់។ ដោយហេតុថាកន្លងមកលោក ទួន សុគន្ធ និងបក្ខពួកតែងតែជំរិតយកប្រាក់ទឹកតែយ៉ាងច្រើនពីប្រាក់លទ្ធកម្មសម្រាប់មន្ទីរនានា ហើយសូម្បីតែក្រុមហ៊ុនចូលរួមដេញថ្លៃផ្គត់ផ្គង់សម្ភារៈបរិក្ខារសម្រាប់មន្ទីរនានាក៏ប្រឈមនឹងការលំបាកដែរ។ មន្ត្រីរាជការនៅក្នុងខេត្តព្រៃវែងបានអំពាវនាវឲ្យលោក អូន ព័ន្ធមុនីរ័ត្ន ចាត់វិធានការលុបបំបាត់អំពើពុករលួយនៅក្នុងមន្ទីរហិរញ្ញវត្ថុខេត្តព្រៃវែងជាបន្ទាន់បំផុត ហើយត្រូវព្រមានក្រុមមន្ត្រីពុករលួយតាមច្បាប់ដោយមិនត្រូវយោគយល់នោះទ្បើយ៕
