ប្រជាពលរដ្ឋនៅក្នុងឃុំពាមបាង ស្រុកស្ទោង ខេត្តកំពង់ធំ ជាប់បឹងទន្លេសាបបានឲ្យដឹងថាក្នុងមូលដ្ឋានពួកគាត់សព្វថ្ងៃមានបទល្មើសនេសាទកើតទ្បើងយ៉ាងពេញបន្ទុកព្រោះមន្ត្រីអាជ្ញាធរនិងមន្ត្រីរដ្ឋបាលជលផលឃុបឃិតគ្នាប្រមូលផលប្រយោជន៍ដាក់ហោប៉ៅធ្វើមានធ្វើបានផ្ទាល់ខ្លួនយ៉ាងក្រអឺតក្រទម។ ប្រភពបានឲ្យដឹងទៀតថាមេឃុំពាមបាងឈ្មោះ ផាន់ ផាន បានជួយជ្រោមជ្រែងឲ្យជនជាតិយួនម្នាក់ឈ្មោះទ្បាំ រត់ការសូកលុយគ្រប់ផ្នែកក្នុងមួយកន្លែងៗជាង១០លានរៀល ដើម្បីជាថ្នូរនឹងការមិនបង្ក្រាបបទល្មើសនេសាទ។ ដោយសារតែសមត្ថកិច្ចពាក់ព័ន្ធទទួលសំណូកពីជនល្មើសបែបនេះ ហើយទើបបទ ល្មើសនេសាទ ប្រើឧបករណ៍ខុសច្បាប់ ក្នុងមូលដ្ឋាន ឃុំ ពាមបាង នៅតែកើតទ្បើង យ៉ាង អនាធិបតេយ្យ។
មន្ត្រីអាជ្ញាធរមូលដ្ឋានមួយចំនួនបានឲ្យដឹងថាលោក ហួន ផល នាយសង្កាត់រដ្ឋបាលជលផលពាមបាងនិងលោក យ៉ាន់ វីសាក់ ហៅសែ នាយផ្នែកក្តាប់៤សង្កាត់រដ្ឋបាលជលផល ក្នុងស្រុកស្ទោងគឺជាអ្នកជាប់ពាក់ព័ន្ធ នឹង អំពើពុករលួយទទួលសំណូកពីជនជាតិយួនទើបពួកគេមិនចាត់វិធានការបង្ក្រាបបទល្មើស។ បញ្ហានេះលោក ណៅ ធួក ដែលជាមេរដ្ឋបាលជលផលត្រូវចាត់វិធានការលើមន្ត្រីពុករលួយទាំងនោះជាបន្ទាន់បំផុតព្រោះសព្វថ្ងៃនេះបទល្មើសនេសាទក្នុង ឃុំពាមបាងកំពុងកើត ទ្បើងយ៉ាងពេញបន្ទុក។ នៅពេលជនជាតិខ្មែរ ប្រើឧបករណ៍នេសាទខុសច្បាប់តិចតួចត្រូវសមត្ថកិច្ចបង្ក្រាបយ៉ាងកំរោល ប៉ុន្តែនៅពេលដែលជនជាតិយួនប្រើឧបករណ៍ខុសច្បាប់បំផ្លាញធនធានមច្ឆជាតិឲ្យរលត់រលាយ បែរជាគ្មានសមត្ថកិច្ចណាអើពើទាល់តែសោះ។
ប្រជាពលរដ្ឋបានលាតត្រដាងថា មេឃុំពាមបាងឈ្មោះ ផាន់ ផាន និងមន្ត្រីរដ្ឋបាលជលផលប្រចាំតំបន់នេះជាអ្នកឃុបឃិតគ្នាបើកដៃឲ្យមានបទល្មើសនេសាទឥតឈប់ឈរ ហើយបទល្មើសនេសាទ ប្រើឧបករណ៍ឆ្នុកកំពុងកើតទ្បើង រាប់រយកន្លែងដោយអាចប្រមូលត្រីបានពី២០ទៅ៣០តោនក្នុងមួយយប់។ ចំណែកលោក ប៉ែន វណ្ណារិទ្ធ នាយខណ្ឌរដ្ឋបាលជលផលខេត្តកំពង់ធំ មិនដែលយកចិត្តទុកដាក់បង្ក្រាបបទល្មើសនោះទេ គឺគិតគូរតែរឿងប្រមូលផលប្រយោជន៍ធ្វើមានធ្វើបានផ្ទាល់ខ្លួនយ៉ាងត្រជាក់ចិត្តបំផុត៕
