រតនគិរីៈ សកម្មភាពដឹកជញ្ជូនឈើប្រណីតទៅលក់នៅស្រុកយួនតាមច្រកអន្តរជាតិអូរយ៉ាដាវខេត្តរតនគិរីពុំមានការថយចុះនោះទេ បើទោះបីទីផ្សារក្នុងប្រទេសយួនកំពុងប្រឈមនឹងបញ្ហាតម្លៃឈើយ៉ាងណាក៏ដោយ។ ជាក់ស្តែងឈ្មួញម្នាក់ឈ្មោះ ចែ កប កំពុងប្រមូលទិញឈើប្រណីតពីឈ្មួញផ្សេងៗទៀត ហើយដឹកជញ្ជូនទៅលក់នៅស្រុកយួន តាមច្រកទ្វារអន្តរជាតិអូរយ៉ាដាវដោយរលូន ព្រោះមានការឃុបឃិតជាមួយសមត្ថកិច្ចពាក់ព័ន្ធដូចជាមន្ត្រីរដ្ឋបាលព្រៃឈើ នគរបាលប្រឆាំងបទល្មើសសេដ្ឋកិច្ច មន្ត្រីគយ និងនគរបាលអន្តោប្រវេសន៍ជាដើម។ ហេតុនេះហើយទើប ចែ កប អាចប្រើប្រាស់រថយន្ត២គ្រឿង ម៉ាកសាំយ៉ុង និងរថយន្តកាមរីហើម ដឹកជញ្ជូនឈើទៅស្រុកយួនយ៉ាងសុខស្រួល។
សេចក្តីរាយការណ៍ពីសមត្ថកិច្ចពាក់ព័ន្ធបានឲ្យដឹងថា កាលពីថ្ងៃទី២៦ ខែវិច្ឆិកា ឆ្នាំ ២០១៤វេលាម៉ោង៦ព្រឹកនៅត្រង់ចំណុចមុខបារ៉ាស់ច្រកទ្វារអន្តរជាតិអូរយ៉ាដាវ រថយន្តដឹកឈើទាំង២គ្រឿងនេះត្រៀមដឹកឈើចេញទៅស្រុកយួន។ សមត្ថកិច្ចច្រកទ្វារព្រំដែនមិនធ្វើការបង្ក្រាបនោះទេព្រោះ ចែ កប បានបង់លុយឲ្យសមត្ថកិច្ចពាក់ព័ន្ធជាប្រចាំដើម្បីឲ្យជួយសម្របសម្រួលមុខរបរខុសច្បាប់របស់ខ្លួន។ បើនិយាយពីមន្ត្រីរដ្ឋបាលព្រៃឈើខេត្តរតនគិរីនិងនគរបាលប្រឆាំងបទល្មើសសេដ្ឋកិច្ចខេត្តនេះពួកគេគិតតែរឿងប្រមូលលុយពីក្រុមឈ្មួញរកស៊ីឈើខុសច្បាប់ប៉ុណ្ណោះ ហើយមិនគិតគូរទប់ស្កាត់បទល្មើសនោះទេ។
ឈ្មួញដឹកជញ្ជូនឈើប្រណីតទៅស្រុកយួនឈ្មោះ ចែ កប បានប្រាប់ក្រុមអ្នកកាសែតថាចង់ថតរូបភាពរថយន្តដឹកឈើរបស់គាត់សូមថតតាមចិត្តទៅព្រោះគាត់បានបង់លុយឲ្យស្ថាប័នមេព្រៃរហូតដល់ថ្នាក់ខេត្ត បើនិយាយពីនគរបាលវិញចាប់តាំងពីថ្នាក់មេប៉ុស្តិ៍ដល់ស្នងការនករបាលខេត្ត ហើយបើនិយាយពីសមត្ថកិច្ចច្រកអន្តរជាតិអូរយ៉ាដាវគឺបង់គ្រប់ស្ថាប័នពាក់ព័ន្ធទាំងអស់។ ដោយសារតែសមត្ថកិច្ចពាក់ព័ន្ធ ប្រព្រឹត្តអំពើពុករលួយទទួលផលប្រយោជន៍ពី ក្រុមឈ្មួញរកស៊ីឈើខុសច្បាប់ ដូចជា ចែ កប បែបនេះហើយទើប បទល្មើសបំផ្លាញព្រៃឈើ ក្នុងខេត្តរតនគិរីកំពុងកើតទ្បើងយ៉ាងពេញបន្ទុកជាពិសេស នៅ ក្នុងឧទ្យានជាតិនិង ដែនជម្រកសត្វ។អ្នកដែលជាប់ពាក់ព័ន្ធ និង ផលប្រយោជន៍ខ្លាំងជាងគេគឺលោក វង្ស សុកសិរី ដែលជាមេរដ្ឋបាលព្រៃឈើខេត្តនិងនគរបាលប្រឆាំងបទល្មើសសេដ្ឋកិច្ចខេត្តតែម្តង៕
