ភ្នំពេញៈ នាឱកាស១០ ធ្នូ ខាងមុខនេះ ដែលជា ទិវាសិទ្ឋមនុស្សអន្តរជាតិ លោក ហ៊ុន សុខា ប្រធានក្លឹបអ្នកកាសែតឯករាជ្យអំពាវ នាវដល់អ្នកកាសែតឲ្យប្រកាន់ក្រមសីលធម៌វិជ្ជាជីវៈឲ្យបានខ្ពស់ ក្លឹបអ្នកកាសែតឯករាជ្យ ក៏អំពាវនាវដល់អ្នកសារព័ត៌មានទាំងអស់ប្រកាន់យកនូវក្រមសីលធម៌ វិជ្ជាជីវៈ ដើម្បីចៀសសវាង នូវការគំរាមកំហែង ប្ដឹងផ្ដល់ និងរក្សាបាននូវព័ត៌មានសុក្រឹត ដែលអាចជឿទុកចិត្តបាន ឬជាអាវក្រោះសម្រាប់អ្នកសារព័ត៌មានផ្ទាល់ផងដែរ។
លោក ហ៊ុន សុខា លើកឡើងថា វិជ្ជាជីវៈអ្នកសារព័ត៌មាននៅកម្ពុជា នៅមានកម្រិតនៅឡើយ ដោយសារពួកគេមិនបានឆ្លងកាត់វគ្គបណ្តុះបណ្តាលអ្នកសារព័ត៌មានបាន ពេញលេញ គួបផ្សំនឹងប្រាក់ខែតិច ដែលជាចំណែកមួយធ្វើឲ្យបាត់បង់វិជ្ជាជិវៈក្រមសីលធម៌អ្នកសារព័ត៌មាន ។
លោក ហ៊ុន សុខា ថ្លែងថា សារព័ត៌មានដែលមានវិជ្ជាជីវៈ និងក្រមសីលធម៌ត្រឹមត្រូវ គឺស្តែងចេញពីឆន្ទៈផ្ទាល់របស់អ្នកសរសេរព័ត៌មាន ដែលកត្តាសំខាន់នេះ គឺទាមទារឲ្យអ្នកព័ត៌មាន ចៀសសផុតពីឥទ្ធិពលនានាពីប្រភពផ្តល់ព័ត៌មាន ដែលក្នុងនោះប្រាក់បៀវត្ស គឺជារឿងសំខាន់មួយ ។ ប្រាក់ខែតិចនាំឲ្យប៉ះពាល់ដល់ជីវភាពរបស់អ្នកសារព័ត៌មាន ហើយនាំឲ្យពួកគេប្រព្រឹត្តិនូវអំពើពុករលួយ ដោយមិនបានគ្រោងទុកមុន ដើម្បីបង្កើនចំណូលជីវភាពរស់នៅរបស់ពួកគេផងដែរ។ យើងឃើញថា នៅក្នុងប្រទេសយើងស្ថាប័នកាសែតយើង មិនទាន់ជាសហគ្រាសធំៗដូចគេ ដោយធានាបាននូវជីវភាពរបស់អ្នកកាសែតហ្នឹងឲ្យបានសមរម្យ គ្រប់គ្រាន់ គាត់អាចរស់នៅធ្វើការដោយប្រកបវិជ្ជាជីវៈដោយសេចក្តីថ្លៃថ្នូរ ពិតប្រាកដនៅឡើយ។
គួរបញ្ជក់ថា ចាប់តាំងពីឆ្នាំ១៩៩៣ ដល់ឆ្នាំ២០១៤ អ្នកសារព័ត៌មានចំនួន១៤នាក់ ត្រូវបានគេបាញ់សម្លាប់ ហើយរហូតមកទល់ពេលនេះ អាជ្ញាធរមិនទាន់វែកមុខឃាតករបាននៅឡើយទេ ។លោក ហ៊ុន សុខា អះអាងថា បច្ចុប្បន្ននេះសេរីភាពសារព័ត៌មាននៅកម្ពុជា ហាក់មានភាពប្រសើរជាងមុន បើទោះបីជាបញ្ហានិទណ្ឌភាពនៅមិនទាន់ត្រូវបានបញ្ចប់នៅ ឡើយក្តី ។ ប៉ុន្តែអ្នកសារព័ត៌មានខ្លះគាត់ពិបាកនឹងដាក់កំហិតចំពោះ អ្នកសារព័ត៌មាន ដើម្បីគោរពក្រមសីលធម៌ឲ្យបានហ្មត់ចត់ណាស់ ។ ប្រាក់បៀវត្សតិច ជាកត្តាធំជាងគេដែលជំរុញឲ្យអ្នកសារព័ត៌មានមួយចំនួន មិនគោរពតាមក្រមសីលធម៌វិជ្ជាជីវៈ ៕
