ភ្នំពេញៈ «ក្លឹបអ្នកកាសែតឯករាជ្យ» ក៏ដូចជាសង្គមស៊ីវិល កំពុងតែបារម្ភពីសុវត្ថិភាពអ្នកសារព័ត៌មាន ខណៈដែលតុលាការសម្រេចដោះលែងបុរសពីរនាក់ ដែលជាប់ចោទពីបទផ្សំគំនិតសម្លាប់អ្នកកាសែតឈ្មោះ តាំង ទ្រី នៅខេត្តក្រចេះនាពេលកន្លងមក។តុលាការខេត្តក្រចេះ នឹងកោះហៅសាក្សីចំនួន ៨នាក់ ឲ្យចូលខ្លួនបំភ្លឺនៅចំពោះមុខចៅក្រមស៊ើបសួរ ក្នុងសំណុំរឿងបាញ់សម្លាប់អ្នកកាសែតឈ្មោះ តាំង ទ្រី នៅថ្ងៃទី១៣ ខែធ្នូ ខាងមុខនេះ។
«ក្លឹបអ្នកកាសែតឯករាជ្យ» និងមន្ត្រីសង្គមស៊ីវិលបានអះអាងថា ជនជាប់ចោទពីរនាក់ក្នុងចំណោមបីនាក់ ត្រូវបានតុលាការសម្រេចឲ្យនៅក្រៅឃុំ តាំងពីល្ងាចថ្ងៃទី៣ ខែធ្នូ មកម៉្លេះ។ក្លឹបអ្នកកាសែតឯករាជ្យនិង ក្រុមសង្គមស៊ីវិល សង្ស័យថា សំណុំរឿងនេះអាចមានបញ្ហាមិនប្រក្រតី ដ្បិតចៅក្រមនៅមិនទាន់បញ្ចប់ការសាកសួរនៅឡើយទេ។
កញ្ញា ហុង ជាវគុណ អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តក្រចេះ មានប្រសាសន៍ថា សាក្សីក្នុងសំណុំរឿងសម្លាប់អ្នកកាសែតនេះ មិនទាន់បានបំភ្លឺនៅមុខចៅក្រមស៊ើបសួរផង តុលាការខេត្តក្រចេះ បានសម្រេចដោះលែងជនជាប់ចោទពីរនាក់ក្នុងចំណោមបីនាក់ ឲ្យនៅក្រៅឃុំបាត់ទៅហើយ។ កញ្ញាបន្តថា សមាគមអាដហុក មិនទាន់ដឹងថាមូលហេតុអ្វី ទើបតុលាការដោះលែងជនជាប់ចោទបែបនេះទេ ហើយករណីនេះជាករណីដែលសង្គមស៊ីវិល ត្រូវតាមដាន និងសិក្សាបន្តទៀត។
អ្នកយកព័ត៌មានកាសែតវាលឥន្ទ្រីយ៍ លោក តាំង ទ្រី ត្រូវឃាតកបាញ់សម្លាប់កាលពីយប់ថ្ងៃទី១១ ឈានចូលថ្ងៃទី១២ តុលា ក្នុងពេលលោកចុះទៅយកព័ត៌មានពីបទល្មើសព្រៃឈើ។ បន្ទាប់ពីកើតហេតុភ្លាម នគរបាលបានចាប់ខ្លួនជនសង្ស័យបីនាក់ ដែលពាក់ព័ន្ធនឹងសំណុំរឿងនេះ។ ក្នុងនោះមានឈ្មោះ ឡា ណារ៉ុន ជាអតីតទាហាន និងជាអ្នកបាញ់ ត្រូវចៅក្រមចោទប្រកាន់ពីបទមនុស្សឃាត ឈ្មោះ ខិម ភក្ដី ជាមន្ត្រីកងរាជអាវុធហត្ថ និងជាម្ចាស់កាំភ្លើង ត្រូវចៅក្រមចោទប្រកាន់ពីបទធ្វេសប្រហែស និងផ្សំគំនិតអំពើឃាតកម្ម ឈ្មោះ ពិន ហ៊ាង ជាប៉ូលិស និងជាម្ចាស់រថយន្តដែលពួកគេជិះទៅបាញ់សម្លាប់ លោក តាំង ទ្រី ត្រូវចៅក្រមចោទប្រកាន់ពីបទប្រើប្រាស់អាវុធខុសច្បាប់ និងមិនប្ដឹងរាយការណ៍បទល្មើស។ លុះដល់ល្ងាចថ្ងៃទី៣ ខែធ្នូ ចៅក្រមបានសម្រេចដោះលែងជនជាប់ចោទពីរនាក់មានឈ្មោះ ខិម ភក្តី និងឈ្មោះ ពិន ហ៊ាង ឲ្យនៅក្រៅពន្ធនាគារតែម្តង។
លោកហ៊ុនសុខាប្រធាន «ក្លឹបអ្នកកាសែតឯករាជ្យ» បានឲ្យសារពត៌មានយើងដឹងថាសុវត្ថិភាពអ្នកកាសែតនៅខេត្តភាគឦសាន ស្ថិតនៅក្នុងស្ថានភាពផុយស្រួយ បន្ទាប់ពីឈ្មួញប្រព្រឹត្តិបទល្មើសព្រៃឈើបានសម្លាប់អ្នកាសែត។ ទោះជាយ៉ាងក៏ដោយលោកហ៊ុនសុខាប្រធានក្លឹបអ្នកកាសែតនិងមន្រ្តីសង្គមស៊ីវិលកញ្ញា ហុង ជាវគុណ បានអំពាវនាវឲ្យជួយចូលរួមឃ្លាំមើលស្វែងរកយុត្តិធម៌ជូនអ្នកកាសែតដែលស្លាប់ទៅនិងលើកស្ទួយសេរីភាពបញ្ចេញមតិនៅកម្ពុជាយើង។
គួរបញ្ជាក់ផងដែរថាចាប់តាំងពីឆ្នាំ១៩៩៣ មកដល់បច្ចុប្បន្ននេះ មានអ្នកកាសែតចំនួន ១៣នាក់ហើយ ដែលត្រូវបានសម្លាប់ តែឃាតករនៅក្រៅសំណាញ់ច្បាប់នៅឡើយ។ នៅឆ្នាំចុងក្រោយនេះដែរ អង្គការអ្នកសារព័ត៌មានគ្មានព្រំដែន (Reporter without Borders) បានចេញរបាយការណ៍ដោយចាត់ចំណាត់ថ្នាក់ប្រទេសកម្ពុជា ក្នុងលេខរៀង១៤៤ ក្នុងចំណោមប្រទេស១៨០ ស្ដីពីសិទ្ធិបញ្ចេញមតិដែលនៅអន់ថយនៅឡើយ។ សារពត៌មានយើងមិនអាចទាក់ទងចៅក្រមដែលទទួលខុសត្រូវក្នុងសំណុំរឿងនេះ បានទេ៕
