បន្ទាយមានជ័យ ៖ តាមកាលឲ្យដឹងថានៅពេលថ្មីៗនេះ តាមបន្ទាត់ព្រំដែន កម្ពុជា-ថៃ មានការលួចបង្កើត ច្រករបៀងគ្មានច្បាប់ទម្លាប់ ចំនួន ២កន្លែង នៅចំណុច ភូមិក្បាលកោះ សង្កាត់-ក្រុងប៉ោយប៉ែត ខេត្តបន្ទាយមានជ័យ ដែលគ្រប់គ្រងដោយវរសេនាតូច ការពារព្រំដែនគោក លេខ៨៩១ ពេលដែលរាជរដ្ឋាភិបាល កំពុងរឹតបន្តឹងការលួចនាំ ទំនិញចេញចូលតាមច្រករបៀង ធ្វើឲ្យបាត់បង់ ចំណូលថវិកាជាតិ ក្នុងមួយឆ្នាំៗ រាប់រយលានរៀល។
តាមប្រភពពីប្រជាពលរដ្ឋ រស់នៅជិតទីតាំង ច្រករបៀង ដែលគេលួចបង្កើតថ្មីថ្មោង បានឲ្យដឹងថា ច្រករបៀងទី១ បានដឹកអាចម៍ដី យកមកចាក់លុប រាប់សិបឡាន ដើម្បីងាយស្រួល នាំយកទំនិញគេចពន្ធ ចេញទៅប្រទេសថៃ និងមានហ៊ុំព័ទ្ធ របងសង្ក័សីពណ៌ខៀវ មានកម្ពស់ជាង ២ម៉ែត្រ ដែលនៅទីនោះ មានការនាំទំនិញ គីបចេញផងដែរ។ ប្រភពបានបន្តថា ច្រកខាងលើនេះ គ្រប់គ្រោងដោយលោក ឈៀង ជាមេបញ្ជការរង វរសេនាតូច ការពារព្រំដែនគោក លេខ៨៩១ ទើបតែឡើងតំណែងថ្មីៗ។
ប្រភពបានបន្ថែមថា ច្រករបៀងទី២ គឺមានលួចនាំចេញ ទំនិញ គីបទៅប្រទេសថៃ ដោយមានការធ្វើក្បូន បណ្តែតទឹក អូសទំនិញឆ្លងកាត់ ដោយមានការ យកស័ង្កសីពណ៌ស ដែលមានកម្ពស់ជាង ២ម៉ែត្រ បិតបាំងកំហុសខ្លួន និងងាយស្រួល ក្នុងនាំទំនិញចេញចូលផងដែរ ហើយច្រកនេះ ស្ថិតក្រោមការគ្រប់គ្រោង ដោយលោក សឿន ហៅ៧៩ ជាអនុប៉ុស្តិ៍ក្បាលស្ពាន ។សូមបញ្ជាក់ថា ច្រកទាំង ២ ខាងលើនេះ នៅក្រោមការគ្រប់គ្រង ដោយប៉ុស្តិ៍ការពារព្រំដែនក្បាលស្ពាន ចំណុះឲ្យវរសេនាតូច ការពារព្រំដែនគោក លេខ៨៩១ ។
សូមរំលឹកផងថា កាលពីដើមឆ្នាំ២០១៤ លោកឧត្តមសេនីយ៍ ខេង សុមេធ អគ្គស្នងការរងនគរបាលជាតិ បានព្រមានដល់មេវរទាំងអស់ ដែលបានបង្កើកច្រករបៀង និងមានការធ្វើទូក ធ្វើក្បូន ខ្សែកាប ខ្សែរ៉ត ដើម្បីតភ្ជាប់ សម្រាប់ចម្លងទំនិញ ត្រូវបញ្ឈប់ជាបន្ទាន់ ដើម្បីជួយគ្នាទប់ស្កាត់ បទល្មើសឆ្លងដែន និងមិនចង់ឃើញ ភាពអសកម្មត្រូវផ្សព្វផ្សាយ នៅតាមប្រព័ន្ធផ្សព្វផ្សាយ ព័ត៌មាន ទាំងវេបសាយ ទាំងកាសែត ទាំងវិទ្យុ និងទាំងទូរសទ្សន៍ផងដែរ ហើយមួយថ្ងៃក្រោយមក វរការពារព្រំដែនគោកទាំងអស់ នៅក្នុងខេត្តបន្ទាយមានជ័យ បានរុះរើ មធ្យោបាយចម្លងទំនិញ ភ្លាមៗផងដែរ ។
រហូតមកដល់ពេលនេះ ស្រាប់តែលោក ឈៀង និងលោក សឿន ហៅ៧៩ បានលួចបើកច្រករបៀង ចំនួន ២កន្លែង ស្ថិតក្នុងភូមិសាស្ត្រ គ្រប់គ្រងដោយវរសេនាតូច ការពារព្រំដែនគោក លេខ៨៩១ ដោយគ្មានក្រែងញញើត អ្វីទាំងអស់។ ក្នុងនោះលោក សំ ជិត ស្នងការរង ទទួលបន្ទុកព្រំដែន បានប្រាប់អ្នកកាសែតថា ចំពោះច្រករបៀង ដែលគ្រប់គ្រងដោយ លោក ឈៀន មេបញ្ជាការរង វរសេនាតូចការពារព្រំដែនគោក លេខ៨៩១ លោកក៏ធ្លាប់ហៅ មកអប់រំម្តងដែរ ចំណែកឯការនាំទំនិញគីប នោះ ត្រូវបានបង់ពន្ធត្រឹមត្រូវ ព្រោះថ្មីៗនេះ តាមច្រកទ្វារអន្តរជាតិប៉ោយប៉ែត វាចង្អៀតពេក ហើយការចាក់អាចម៍ដី នៅចំណុចខាងលើនេះ គឺលោកពុំបានដឹងច្បាស់ទេ។
លោក សំ ជិត បានបន្តថា ចំពោះច្រកមួយទៀត ដែលគ្រប់គ្រងដោយ សឿន ហៅ៧៩ ក៏លោកពុំទាន់ដឹងដែរ ហើយលោកនឹង ចុះមកត្រួតពិនិត្យខ្លួនឯងផ្ទាល់ តែមិនដឹងមកមើលថ្ងៃណានោះទេ។ ក្នុងនោះលោកសឿន ហៅ៧៩ ក៏បានប្រាប់អ្នកកាសែតថា កន្លែងច្រករបស់ខ្លួនពេលនេះ គឺពុំមានការនាំទំនិញទៀតទេ ព្រោះប៉ុន្មានថ្ងៃនេះ ភាគីថៃមិនហ៊ាន មកយកទំនិញ ហើយក៏ធ្លាប់នាំចេញ ទំនិញគីប ៣ទៅ៤ ដងដែរ ដោយម្តងមានចំនួន ៧០០គីឡូក្រាម ទៅ ៨០០គីឡូក្រាម តែប៉ុណ្ណោះ។ ចំណែកលោក ឈៀង មេបញ្ជាការរង វរសេនាតូចលេខ ៨៩១ ពុំទាន់អាចសុំការបំភ្លឺបានទេ ព្រោះគ្មានលេខទូរស័ព្ទ សំរាប់ទំនាក់ទំនង៕
