ប្រភពពីអាជីវករតូចតាចមួយចំនួនបានឲ្យដឹងថា លោក លឹម សុខឃាង អគ្គនាយករងម្នាក់នៃក្រុមហ៊ុនរបស់មេឈ្មួញ លី យ៉ុងផាត់ បាននាំចូលប្រេងគេចពន្ធចូលស្រុកខ្មែរយ៉ាងសកម្មក្នុងមួយខែៗរាប់សែនតោន ហើយគ្មានសមត្ថកិច្ចណាចាត់វិធានការទប់ស្កាត់ទ្បើយ។ ឈ្មួញម្នាក់នោះមានឈ្មួញ លឹម សុខឃាង ដែលមានទំនាក់ទំនងយ៉ាងជិតស្និទ្ធជាមួយលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករទើបហ៊ានធ្វើអ្វីៗតាមអំពើចិត្ត។ បច្ចុប្បន្នច្រកដែនសមុទ្រក្នុងខេត្តកោះកុង គឺជាទីកន្លែងដែលឈ្មួញនាំចូលប្រេងសាំងនិងទំនិញគេចពន្ធយ៉ាងអនាធិបតេយ្យ ដោយសារតែសមត្ថកិច្ចគយនិងសមត្ថកិច្ចពាក់ព័ន្ធដទៃទៀតគិតតែរឿងផលប្រយោជន៍ធ្វើមានធ្វើបានផ្ទាល់ខ្លួន។
តាមប្រភពដដែលពីក្រុមអាជីវករនៅខេត្តកោះកុង បានឲ្យដឹងថាឈ្មួញឈ្មោះ លឹម សុខឃាង គឺជាមនុស្សជំនិតរបស់មេឈ្មួញ លី យ៉ុងផាត់ ហើយឈ្មួញរូបនេះបានប្រើទូកនិងសាទ្បង់ធំៗដឹកប្រេងគេចពន្ធមកចែកចាយលើលំហសមុទ្រ យ៉ាងអនាធិបតេយ្យ។ មិនតែប៉ុណ្ណោះគេនាំប្រេងគេចពន្ធមកលក់ឲ្យក្រុមហ៊ុនបូមខ្សាច់ ក្រុមហ៊ុនអគ្គិសនីចិននិងទូកនេសាទក្នុងលំហសមុទ្រដោយគ្មានខ្លាចក្រែងអ្វីទាំងអស់ព្រោះមានមេឈ្មួញ លី យ៉ុងផាត់ នៅពីក្រោយខ្នង។ បើនិយាយពីសមត្ថកិច្ចគយមិនហ៊ានក្អកជាមួយមេឈ្មួញ លឹម សុខឃាង ទេ ព្រោះពួកគេដឹងថាឈ្មួញរូបនេះមានទំនាក់ទំនងជិតស្និទ្ធជាមួយលោក គុណ ញឹម អគ្គនាយកគយ និងរដ្ឋាករ។
សកម្មភាពនាំប្រេងគេចពន្ធពីប្រទេសសៀមមកចែកចាយលើលំហសមុទ្រដោយរលូនដូចសព្វថ្ងៃនេះគឺមេឈ្មួញ លឹម សុខឃាង បានប្រើប្រាស់មន្ត្រីនគរបាលម្នាក់ដែលជានាយផ្នែកនៅអធិការដ្ឋាននគរបាលស្រុកកែវសីមា ឈ្មោះ សៀង បូរី ឲ្យរត់ការទាក់ទងជាមួយសមត្ថកិច្ចគ្រប់ស្ថាប័ននៅលើផ្ទៃសមុទ្រ។ ទំហំនៃការនាំចូលប្រេងគេចពន្ធរបស់មេឈ្មួញ លឹម សុខឃាង មានទំហំធំធេងណាស់គឺអាចធ្វើឲ្យរដ្ឋបាត់បង់ចំណូលពន្ធរាប់សិបលានដុល្លារក្នុង១ខែៗ។ បញ្ហានេះអង្គភាពប្រឆាំងអំពើពុករលួយត្រូវចាត់វិធានការស៊ើបអង្កេតជាបន្ទាន់ ព្រោះការដែលមេឈ្មួញលឹម សុខឃាង ហ៊ានធ្វើអ្វីៗស្រេចតែអំពើចិត្តគឺដោយសារអាងមានទំនាក់ទំនងជិតស្និទ្ធជាមួយលោក គុណ ញឹម ជាអគ្គនាយកគយ និងរដ្ឋាករ៕
