សមាជមហាជនរបស់គណបក្សសង្គ្រោះជាតិ កាលពីថ្ងៃអាទិត្យម្សិលមិញ បានចេញសេចក្តីសម្រេច ដោយទាមទារឲ្យមានការបង្កើតរាជរដ្ឋាភិបាលស្រមោល ដើម្បីឲ្យគណបក្សកាន់អំណាចទទួលស្គាល់តួនាទីគណបក្សប្រឆាំង និងឲ្យមានតុល្យភាពអំណាចនៅរដុ្ឋសភា។
ការទាមទារនេះធ្វើឡើង នៅក្នុងសេចក្តីសម្រេចរបស់សមាជមហាជន កាលពីថ្ងៃទី០៦ ខែតុលា នៅទីលានប្រជាធិបតេយ្យ រាជធានីភ្នំពេញ ដែលមានប្រជាពលរដ្ឋជិតមួយម៉ឺននាក់ចូលរួម។ ការទាមទារនេះ ក៏ដើម្បីឲ្យមានការផ្លាស់ប្តូរតាមរយៈកំណែទម្រង់គោលនយោបាយ និងស្ថាប័នជាតិសំខាន់ៗ ធានាការពារផលប្រយោជន៍ជាតិ និងផលប្រយោជន៍ប្រជាពលរដ្ឋផងដែរ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បាននិយាយ នៅថ្ងៃចន្ទនេះថា ការទាមទារឲ្យបង្កើតរដ្ឋាភិបាលស្រមោល ជាកញ្ចក់មួយសម្រាប់ឆ្លុះបញ្ចាំង ពីសកម្មភាពរបស់រដ្ឋាភិបាលឲ្យស្របតាមឆន្ទៈរបស់ប្រជាពលរដ្ឋ ៖
ការទាមទាររបស់គណបក្សសង្គ្រោះជាតិ ត្រូវបានតំណាងរាស្ត្រ និងជាសមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា លោក ជាម យៀប យល់ថាមិនអាចធ្វើទៅរួចទេ ពីព្រោះរដ្ឋធម្មនុញ្ញនៃព្រះរាជាណាចក្រកម្ពុជា មិនបានចែងពីចំណុចនេះទេ ៖
អ្នកវិភាគនយោបាយ លោក សុខ ទូច ក៏យល់ដូច លោក ជាម យៀប ដែរថា រដ្ឋធម្មនុញ្ញមិនមានចែងពីបង្កើតរាជរដ្ឋាភិបាលស្រមោលទេ។ ប៉ុន្តែ លោក គិតថា រដ្ឋាភិបាលស្រមោលអាចត្រូវបានបង្កើតទ្បើង បើមានការចរចាផ្នែកនយោបាយ។ លោក បញ្ជាក់ថា ការទាមទារបង្កើតរដ្ឋាភិបាលស្រមោល ក៏ផ្តល់អត្ថប្រយោជន៍ដល់មន្ត្រីមួយចំនួនឲ្យមានបទពិសោធន៍សម្រាប់ដឹកនាំប្រទេសជាតិ នៅពេលអនាគតផងដែរ ៖
លោក បន្តថា រដ្ឋាភិបាលស្រមោលមិនមានកងកម្លាំងប្រដាប់អាវុធទេ។ តួនាទីរបស់រដ្ឋាភិបាលស្រមោល គឺតាមដាន និងត្រួតពិនិត្យការងារ នៅតាមក្រសួង និងស្ថាប័នរដ្ឋនានា។
